Brahmakritam Rudra Stotram

 ब्रह्मकृतं रुद्रस्तोत्रम् 

दृष्ट्वा ब्रह्मा हरं रुष्टं तुष्टाव परमेश्वरम् ।
चतुर्वक्त्रेण वेदोक्तस्तोत्रेण जगतां पतिः ॥ ९॥

ब्रह्मोवाच ।
प्रसीद दक्षयज्ञघ्न सूर्यं मच्छरणागतम् ।
त्वयैव सृष्टं सृष्टेश्च समारम्भे जगद्गुरो ॥ १०॥

आशुतोष महाभाग प्रसीद भक्तवत्सल ।
कृपया च कृपासिन्धो रक्ष रक्ष दिवानिशम् ॥ ११॥

ब्रह्मस्वरूप भगवन्सृष्टिस्थित्यन्तकारण ।
स्वयं रविं च निर्माय स्वयं संहर्तुमिच्छसि ॥ १२॥

स्वयं ब्रह्मा स्वयं शेषो धर्मः सूर्यो हुताशनः ।
इन्द्रचन्द्रादयो देवास्त्वत्तो भीताः परात्पर ॥ १३॥

ऋषयो मुनयश्चैव त्वां निषेव्य तपोधनाः ।
तपसां फलदाता त्वं तपस्त्वं तपसां फलम् ॥ १४॥

इत्येवमुक्त्वा ब्रह्मा तं सूर्यमानीय भक्तितः ।
प्रीत्या समर्पयामास शङ्करे दीनवत्सले ॥ १५॥

शम्भुस्तमाशिषं कृत्वा विधिं नत्वा जगद्विधिः ।
प्रसन्नवदनः श्रीमानालयं प्रययौ मुदा ॥ १६॥

इति धातृकृतं स्तोत्रं सङ्कटे यः पठेन्नरः ।
भयात्प्रमुच्यते भीतो बद्धो मुच्येत बन्धनात् ॥ १७॥

राजद्वारे श्मशाने च मग्नपोते महार्णवे ।
स्तोत्रस्मरणमात्रेण मुच्यते नात्र संशयः ॥ १८॥

इति श्रीब्रह्मवैवर्तपुराणे श्रीकृष्णजन्मखण्डे पूर्वे
         अष्टचत्वारिंशाध्यायान्तर्गतं
         ब्रह्मकृतं रुद्रस्तोत्रं समाप्तम् ।

ब्रह्मवैवर्तपुराण । श्रीकृष्णजन्म, पूर्वभाग । अध्याय ४८/१०-१८॥


brahmavaivartapurANa . shrIkRRiShNajanma, pUrvabhAga . adhyAya 48/10-18..

Proofread by PSA Easwaran