Brahmavishnukritam 2 Shiva Stotram

 ब्रह्मविष्णुकृतं २ शिवस्तोत्रम् 

विष्णुविधी ऊचतुः ।
देवदेव महादेव परब्रह्माखिलेश्वर ।
त्रिगुणातीत निर्व्यग्र त्रिदेवजनक प्रभो ॥ २७॥

वयं ते शरणापन्ना रक्षास्मान्दुखितान्विभो ।
शङ्खचूडार्दितान्क्लिष्टान्सन्नाथान्परमेश्वर ॥ २८॥

अयं योऽधिष्ठितो लोको गोलोक इति स स्मृतः ।
अधिष्ठाता तस्य विभुः कृष्णोऽयं त्वदधिष्ठितः ॥ २९॥

पार्षदप्रवरस्तस्य सुदामा दैवयन्त्रितः ।
राधाशप्तो बभूवाथ शङ्खचूडश्च दानवः ॥ ५.३०.३०॥

तेन निस्सारिताः शम्भो पीड्यमानाः समन्ततः ।
हृताधिकारस्त्रिदशा विचरन्ति महीतले ॥ ३१॥

त्वां विना न स वध्यश्च सर्वेषां त्रिदिवौकसाम् ।
तं घातय महेशान लोकानां सुखमावह ॥ ३२॥

त्वमेव निर्गुणस्सत्योऽनन्तोऽनन्तपराक्रमः ।
सगुणश्च सन्निवेशः प्रकृतेः पुरुषात्परः ॥ ३३॥

रजसा सृष्टिसमये त्वं ब्रह्मा सृष्टिकृत्प्रभो ।
सत्त्वेन पालने विष्णुस्त्रिभुवावनकारकः ॥ ३४॥

तमसा प्रलये रुद्रो जगत्संहारकारकः ।
निस्त्रैगुण्ये शिवाख्यातस्तुर्यो ज्योतिःस्वरूपकः ॥ ३५॥

त्वं दीक्षया च गोलोके त्वं गवां परिपालकः ।
त्वद्गोशालामध्यगश्च कृष्णः क्रीडत्यहर्निशम् ॥ ३६॥

त्वं सर्वकारणं स्वामी विधि विष्ण्वीश्वरः परम् ।
निर्विकारी सदा साक्षी परमात्मा परेश्वरः ॥ ३७॥

दीनानाथसहायी च दीनानां प्रतिपालकः ।
दीनबन्धुस्त्रिलोकेशश्शरणागतवत्सलः ॥ ३८॥

अस्मानुद्धर गौरीश प्रसीद परमेश्वर ।
त्वदधीना वयं नाथ यथेच्छसि तथा कुरु ॥ ३९॥

इति शिवपुराणे रुद्रसंहितायां युद्धखण्डे
त्रिंशाध्यायान्तर्गतं ब्रह्म-विष्णुकृतं शिवस्तोत्रं
समाप्तम् ।

शिवपुराण । रुद्रसंहिता । युद्धखण्ड । अध्याय ३०/३३-३९॥


shivapurANa . rudrasaMhitA . yuddhakhaNDa . adhyAya 30/33-39..

Proofread by PSA Easwaran