चण्डीशकृता शिवस्तुतिः
रविशशिहुतभुक्त्रिधामनेत्रो ज्वलशूलानलदग्धकालकाल ।
कृतहालाहल नीलकण्ठ शम्भो परिपाहीश्वर देवसार्वभौम ॥ ५॥
भव भर्ग महेश भीम शङ्कर त्रिदशाधीश्वर सर्पजालमाल ।
अव भव दयया रसार्द्रलोकैः परिमुक्तोऽस्म्यघतः तवेश शम्भो ॥ ६॥
हर हर मगवन् पुरप्रहर्तः कुरु करुणां शशिधामचूड शम्भो ।
गरधर हरिशर गिरिवाह परिपाहीश्वर देवसार्वभौम ॥ ७॥
सङ्क्रन्दन भुजखण्डन वरतर करुणारुणाक्ष
देव प्रथितामोद पदान्ज देव शम्भो ।
यमभटपटलीविदूरिताघ ज्वलधीरामरदेवसार्वभौम ॥ ८॥
मन्दारवृन्दमुनिवेदकदम्बगीत गोविन्दपूज्यपदपद्म सनन्दवन्ध ।
मन्दारसुन्दरसदम्बुरुहोरुमाल देव त्वमेव निखिलेन्दुकलाललाम ॥ ९॥
अहीशमणिकुण्डलं रविजमण्डलान्तर्गतं
गणेन्द्रकृतताताण्डवप्रियमपारपिण्डोज्ज्वलम् ।
भजामि कनकाचलोल्लसितवामहस्ताम्बुजं
मुरारिशरकाण्डतोज्वलसुदक्षपाणिं भजे ॥ १०॥
उरगतुरगहेषहारप्रतुष्टं घनवासहामरवृन्दसार्वभौमम् ।
अजगजनिधनं प्रकृष्टनृत्तं भज भालस्फुरदुब्ज्वलत्रिपुण्डूम् ॥ ११॥
करुणावरुणालयं महेशं शरणं यामि शरण्यमीश्वरम् ।
अरुणाधिपकारणं महेशं धरणीधृग्वरहारमीशितारम् ॥ १२॥
कुमुदकमलगन्धवाहमित्रनेत्रं दहराकाशगतं भजामि शम्भुम् ।
श्रुतिशतविनुतापदानमीशं हरिपद्मासनमार्गितोत्तमाङ्गमूलम् ॥ १३॥
॥ इति शिवरहस्यान्तर्गते शिवाख्ये चण्डीशकृता शिवस्तुतिः सम्पूर्णा ॥
- ॥ श्रीशिवरहस्यम् । शिवाख्यः चतुर्थांशः । अध्यायः ८ । ५-१३॥
- .. shrIshivarahasyam . shivAkhyaH chaturthAMshaH . adhyAyaH 8 . 5-13..
Notes: Caṇḍīśa चण्डीश eulogises Śiva शिव
on being recruited as one of His gaṇa-s गण.
Proofread by Ruma Dewan