Shri Chidambarapanchakshara Stava

 श्री चिदम्बरपञ्चाक्षरस्तवः 
श्रीगणेशाय नमः ।
श्रीचित्सभेशाय नमः ।
ॐ ह्रीं श्रीं नमः शिवाय ।
श्रीस्कन्दः
ओङ्कारार्णवभासमानवपुषं ओङ्कारवाच्यं विभुं
      ओतप्रोतजगच्चराचरतनुं ओजस्विदूरङ्गमम् ।
ओड्याणाभिधपीठिकान्तरलसद्देवीसनाथं शिवं
      ओजोनायकमण्डलस्थमुडुराट्चूडं नटेशं भजे ॥ १॥

ह्रीम्मूर्त्या शिवया विराण्मयमहीहृत्पङ्कजस्थं सदा
      ह्रीणानां शिवकीर्तने हितकरं हेलाहृदां मानिनाम् ।
ह्रीबेरादिसुगन्धवस्तुरुचिरं हेमाद्रिबाणासनं
      ह्रीङ्काराङ्कितपादपीठमतुलं हृद्यं नटेशं भजे ॥ २॥

श्रीमद्ज्ञानसभान्तरे प्रविलसच्छ्रीपञ्चवर्णाकृतिं
      श्रीवाणीविनुताङ्घ्रिपङ्कजयुगं श्रीवल्लभेनार्चितम् ।
श्रीविद्यामनुमोदितं श्रितजनश्रीदायकं श्रीधरं
      श्रीचक्रान्तरवासिनं शिवमहं श्रीमन्नटेशं भजे ॥ ३॥

नव्याम्भोजमुखं नमज्जलनिधिं नारायणेनार्चितं
      नाकौकोनगरीनदीविलसितं नागाजिनालङ्कृतम् ।
नानारूपकनर्तनादिचतुरं नालीकजान्वेषितं
      नादात्मानमहं नगेन्द्रतनयानाथं नटेशं भजे ॥ ४॥

मध्यस्थं मधुवैरिमार्गितपदं मद्वंशनाथं प्रभुं
      मारारातिमतीव मञ्जुवपुषं मन्दारगौरप्रभम् ।
मायातीतमशेषमङ्गलनिधिं मद्भावनाभावितं
      मध्ये व्योमसभं लसन्तमखिलं मान्यं नटेशं भजे ॥ ५॥

शिष्टैःपूजितपादुकं शिवकरं शीतांशुरेखाधरं
      शिल्पं भक्तजनावने शिथिलिताघौघं शिवायाःप्रियम् ।
शिक्षाकारणमम्बुजासनशिरोभूषं सुशीलं प्रभुं
      शीतापाङ्गविलोकनं शिवकरं श्रीमन्नटेशं भजे ॥ ६॥

वाणीवल्लभवन्द्यवैभवयुतं वन्दारुचिन्तामणिं
      वाताशाधिपभूषणं वरकृपावारान्निधिं योगिनाम् ।
वाञ्छापूर्तिकरं वलारिविनुतं वाहीकृताम्नायकं
      वामाङ्गाप्तवराङ्गनं वरकृपावासं नटेशं भजे ॥ ७॥

यक्षाधीशसखं यमप्रमथनं यामिन्यधीशाननं
      यज्ञध्वंसकरं यतीन्द्रविनुतं यज्ञक्रियाधीश्वरम् ।
याज्यं याजकरूपिणं यमधनैर्यत्नोपलभ्याङ्घ्रिकं
      यानीभूतवृषं यदूद्भवनुतं देवं नटेशं भजे ॥ ८॥

श्रीमायाविलसच्चिदम्बरमहापञ्चाक्षरैरङ्कितान्
      श्लोकान् येऽनुदिनं पठन्ति नितरां चिन्तामणीनामकान् ।
तेषां भाग्यविशेषमायुरधिकं विद्या वरान् सत्सुतान्
      सर्वाभीष्टमसौ ददाति सहसा श्रीचित्सभाधीश्वरः ॥ ९॥

इति शिवरहस्यान्तर्गतः श्रीचिदम्बरपञ्चाक्षरस्तवः सम्पूर्णः ।


Proofread by Aruna Narayanan