दक्षिणामूर्तिस्तोत्रम्
आधिक्यमस्मात् जगतोऽधिगन्तुं
विश्वाधिकोक्तेः विषयं प्रपद्ये ।
आद्यक्षणातङ्कनिवर्तनाय
प्रसूतिमत्तारहितं प्रपद्ये ॥ १॥
कालग्रहग्राहभयापनुत्यै
कृतान्तशिक्षाकृतिनं प्रपद्ये ।
शृङ्गारभूजृम्भणवारणाय
प्रसूनकोदण्डरिपुं प्रपद्ये ।
विनेतुमार्तिं विषयाध्वजन्यां
वटद्रुमाधोवसतिं प्रपद्ये ॥ २॥
मोहातिरेकस्मयमोषणाय
पादार्दितापस्मरणं प्रपद्ये ।
कर्माटवीपाटनकौतुकेन
पाणौ विराजत्परशुं प्रपद्ये ॥ ३॥
विशुद्धविज्ञानविकासहेतोः
प्रबोधमुद्राभरितं प्रपद्ये ।
तापत्रयाटोपसमापनाय
प्राळेयधामाभरणं प्रपद्ये ॥ ४॥
वैमल्यसम्पादनवाञ्छयाऽहं
मन्दाकिनीमाल्यधरं प्रपद्ये ।
प्रसादलाभं परमीहमानः
मुग्धस्मितोल्लासिमुखं प्रपद्ये ॥ ५॥
व्यथामशेषामपनेतुकामः
नाम्ना मृडं नाथमहं प्रपद्ये ।
अनाद्यविद्याशमनं प्रपद्ये
this line was composed by Maha Swamigal
नाम्ना महिम्नाऽपि च शङ्करं त्वाम् ॥ ६॥
सर्वज्ञतासारभृतं प्रपद्ये
निस्सीमसौहित्यनिधिं प्रपद्ये ।
अनादिबोधायतनं प्रपद्ये
स्वतन्त्रतायाः सदनं प्रपद्ये ॥ ७॥
हरं प्रपद्येऽहमलुप्तशक्तिं
अमेयसामर्थ्यमहं प्रपद्ये ।
शिवं प्रपद्ये जनकं विधातुः
ईशं हृषीकेशगुरुं प्रपद्ये ॥ ८॥
एवं प्रपत्तिमीशानं तन्वते तत्त्वदर्शिनः ।
तत्क्रतुन्यायरसिकाः तत्तादृशफलाप्तये ॥ ९॥
नमः श्री दक्षिणामूर्तये ।
इति समरपुङ्गवदीक्षितेन्द्रविरचितं दक्षिणामूर्तिस्तोत्रं सम्पूर्णम् ।
Source: yAtrAprabandha by samarapungavadIkShitendraH