Devaih Kritam 17 Shiva Stotram

 देवैः कृतं १७ शिवस्तोत्रम् 

देवा ऊचुः ।
भगवन्केन मार्गेण पूजनीयोऽसि भूतले ।
कस्याधिकारः पूजायां वक्तुमर्हसि तत्त्वतः ॥ २६॥

ततः सस्मितमालोक्य देवीं देववरो हरः ।
स्वरूपं दर्शयामास घोरं सूर्यात्मकं परम् ॥ २७॥

सर्वैश्वर्यगुणोपेतं सर्वतेजोमयं परम् ।
शक्तिभिर्मूर्तिभिश्चाङ्गैर्ग्रहैर्देवैश्च संवृतम् ॥ २८॥

अष्टबाहुं चतुर्वक्त्रमर्धनारीकमद्भुतम् ।
दृष्ट्वैवमद्भुताकारं देवा विष्णुपुरोगमाः ॥ २९॥

बुद्ध्वा दिवाकरं देवं देवीं चैव निशाकरम् ।
पञ्चभूतानि शेषाणि तन्मयं च चराचरम् ॥ ३०॥

एवमुक्त्वा नमश्चक्रुस्तस्मै चार्घ्यं प्रदाय वै ॥ ३१॥

स्तोत्रम्।सिन्दूरवर्णाय सुमण्डलाय सुवर्णवर्णाभरणाय तुभ्यम् ।
पद्माभनेत्राय सपङ्कजाय ब्रह्मेन्द्रनारायणकारणाय ॥ ३२॥

सुरत्नपूर्णं ससुवर्णतोयं सुकुङ्कुमाद्यं सकुशं सपुष्पम् ।
प्रदत्तमादाय सहेमपात्रं प्रशस्तमर्घ्यं भगवन्प्रसीद ॥ ३३॥

नमश्शिवाय शान्ताय सगणायादिहेतवे ।
रुद्राय विष्णवे तुभ्यं ब्रह्मणे सूर्यमूर्तये ॥ ३४॥

यश्शिवं मण्डले सौरे सम्पूज्यैव समाहितः ।
प्रातर्मध्याह्नसायाह्ने प्रदद्यादर्घ्यमुत्तमम् ॥ ३५॥

प्रणमेद्वा पठेदेताञ्छ्लोकाञ्छ्रुतिमुखानिमान् ।
न तस्य दुर्ल्लभं किञ्चिद्भक्तश्चेन्मुच्यते दृढम् ॥ ३६॥

इति शिवपुराणे वायवीयसंहितायां उत्तरखण्डे अष्टमाध्यायान्तर्गतं
         देवैः कृतं शिवस्तोत्रं समाप्तम् ।

शिवपुराण । वायवीयसंहिता । उत्तरभाग २ । अध्याय ८/२६-३६॥


shivapurANa . vAyavIyasaMhitA . uttarabhAga 2 . adhyAya 8/32-36..

Proofread by PSA Easwaran