Devaih Kritam 18 Shiva Stotram

देवैः कृतं १८ शिवस्तोत्रम्

देवा ऊचुः । नमस्ते देवदेवेश महेश्वर नमो नमः ॥ ४५॥ न विद्मः परमं मूढा महिमानं तवातुलम् । यद्योगेन परं ब्रह्म भूतानां त्वं सनातनः ॥ ४६॥ प्रतिष्ठा सर्वभूतानां हेतुः सर्वस्य सर्जने । बिभर्षि चैव नेत्रस्थान्सोमसूर्यविभावसून् ॥ ४७॥ नामसङ्कीर्तनादेव मुच्यन्ते जन्तवोऽशुभात् । पृथिव्यबग्निचन्द्रार्कव्योमवायूपलक्षणाः ॥ ४८॥ मूर्तयस्ते महादेव व्याप्तमाभिरशेषतः । रजःसत्त्वतमोभावैर्भ्राम्यमाणं त्वया जगत् ॥ ४९॥ नावबुध्यति सर्वेश सर्वमूर्तिधरो यतः । ब्रह्मादीनां सुरेशानां सम्मोहनविमोहनम् । त्वं करोषि युगावर्तकाले काले च दुःसहम् ॥ १.२.५०॥ सनत्कुमार उवाच । प्रत्यक्षं दर्शनं दत्त्वा देवानामनुकम्पया । प्रसन्नवदनो भूत्वा देवैश्चापि नमस्कृतः ॥ ५१॥ वासयन्मोहनाम्ना तु सह देवैर्महेश्वरः ॥ ५२॥ एवं संस्तूयमानोऽसौ देवर्षिपितृमानवैः । अन्तर्हित उवाचेदं देवा ब्रूत यथेप्सितम् ॥ ५३॥ इति श्रीस्कन्दपुराणे आवन्त्यखण्डे अवन्तीक्षेत्रमाहात्म्ये द्वितीयाध्यायान्तर्गतं देवैः कृतं शिवस्तोत्रं समाप्तम् । स्कन्दपुराण । आवन्त्यखण्ड । आवन्त्यखण्ड । अध्याय २/४५-५०॥ skandapurANa . AvantyakhaNDa . AvantyakhaNDa . adhyAya 2/45-50.. Proofread by PSA Easwaran