द्विजप्रोक्तं बिल्वित्यादिना शिवार्चनोपदेशम्
(शिवरहस्यान्तर्गते उग्राख्ये)
द्विजः (उवाच) -
बिल्वपत्रान्तरालैस्तु सञ्छाद्य शिवमस्तकम् ।
शिवलोकमवाप्नोति शिवेन सह मोदते ॥ ३१६॥
बिल्वपत्रैः समभ्यर्च्य शङ्करं याति शङ्करम् ।
महद्भ्यः पातकेभ्योऽपि मुक्तिं यास्यत्यसंशयम् ॥ ३१७॥
त्रिदलं त्रिगुणाकारं त्रिणेत्रं च त्रियायुषम् ।
त्रिजन्मपापसंहारमेकवित्वं शिवार्पितम् ॥ ३१८॥
त्रिशूलसन्निभैरीशे बिल्वपत्रैः समर्चिते ।
सद्य एव विनश्यन्ति महापातककोटयः ॥ ३१९॥
बिल्वपत्रेण शुष्केणाप्यर्चितः पार्वतीपतिः ।
ददाति परमामृद्धिं सायुज्यं च तनुव्यये ॥ ३२०॥
बिल्वपत्रं स्वतः शुद्धं शिवप्रियकरं शुभम् ।
शुभे पर्युषितत्त्वं च बिल्वपत्रेषु न ध्रुवम् ॥ ३२१॥
बिल्वपत्रस्य चूर्णैरप्यर्चनीयः सदाशिवः ।
रत्नवद्रक्षणीयानि बिल्वपत्राणि सन्ततम् ॥ ३२२॥
बिल्वपत्रार्चनेनैव तुष्टो भवति शङ्करः ।
महादेवस्य साम्बस्य बिल्वपत्रमतिप्रियम् ॥ ३२३॥
यथा प्रिया हैमवती बिल्वपत्रं तथा प्रियम् ।
अखण्डैर्नूतनैः शुद्धैबिल्वपत्रैः प्रयत्नतः ॥ ३२४॥
यः पूजयति गौरीशं स गौरीशं प्रयास्यति ।
करवीरस्य पुष्पेण रक्तेन धवलेन वा ॥ ३२५॥
यः पूजयति गौरीशं स पापेभ्यो विमुच्यते ।
यत्पुण्यं लभते मर्त्यो शिवे रत्नसमर्चनात् ॥ ३२६॥
तत्पुण्यं लभते मर्त्यः करवीरस्य पूजया ।
सुवर्णकमलानां च पूजया गिरिजापतिः ॥ ३२७॥
हृष्टो ददाति सायुज्यमर्चकाय न संशयः ॥ ३२८॥
॥ इति शिवरहस्यान्तर्गते द्विजप्रोक्तं बिल्वित्यादिना शिवार्चनोपदेशं सम्पूर्णम् ॥
- ॥ श्रीशिवरहस्यम् । उग्राख्यः सप्तमांशः । अध्यायः २५। ३१६-३२८॥
- .. shrIshivarahasyam . ugrAkhyaH saptamAMshaH . adhyAyaH 25 . 316-328..
Proofread by Ruma Dewan