द्व्यर्थिषडाननस्तोत्रम्
%२३
दक्षेण हस्तेन गदां दधान क्रौञ्चञ्च वामेन सुसावधानः ।
स शुक्रजो वोऽवतु कार्तिकेयः षाण्मातुरः साम्बसुतोऽर्यजेयः ॥ १॥
षट्शिरो द्वादशकरो द्विगुणोऽत्रिज एव किम् ।
सोऽम्बसुतो द्विहस्तोऽत्र सुब्रह्मण्यो मयेक्षितः ॥ २॥
हत्वा बलात्सम्पदमाश्वदैवीं पुष्णाति गोपायति वैश्वदैवीम् ।
सुपूजितस्त्वं सुमनः स्वभक्तगते नमस्तेऽस्तु सदा विरक्तम् ॥ ३॥
विशेषतस्त्वां भुवि दाक्षिणात्या भजन्ति भक्त्या परयाज तेषाम् ।
अनुग्रहार्थं द्विभुजस्वरूपं प्रकाश्य चास्से दिशि दक्षिणस्याम् ॥ ४॥
स्त्रीसङ्गतिर्दुर्गतिरेव साक्षादित्थं समाख्यापयितुं वधूनाम् ।
सुस्पर्शगन्धोऽपि सुदूरतस्ते समुझ्झितो देव पदे नमस्ते ॥ ५॥
स्वामिन्नम्बास्नेहलतां विततामपि तां क्षणात् ।
मायामयीं निरस्याऽजो विजहार नमामि तम् ॥ ६॥
एकान्तसेविनमपि स्वामिनं त्वोपतस्थिरे ।
एकान्त भक्ता यच्चित्ते नैव कामोद्गतिः स्थिरे ॥ ७॥
स्वामिंस्तारकजित्सर्वलोककारकशक्तिधृक् ॥
अम्बासुत नमस्तेऽस्तु प्रसीद परिपाहि नः ॥ ८॥
योगापेक्षा मे न ते दर्शनार्थं नापेक्षा मे भाविपूज्योद्भवार्थम् ।
भक्त्या भूयाद्दर्शनं ते कदापि स्यात्साफल्यं जन्मनो मे ततोऽपि ॥ ९॥
स्मर्तृगामी कलौ योऽम्बातनयो द्विशयो मतः ।
चक्रे द्व्यर्थां तस्य नुतिं वासुदेवसरस्वती ॥ १०॥
इति श्रीवासुदेवानन्दसरस्वतीविरचितं कार्तिकस्वामीस्तोत्रं सम्पूर्णम् ।