गणैः कृता चन्द्रमौलीश्वरस्तुतिः
(शिवरहस्यान्तर्गते ईश्वराख्ये)
गणा (तुष्टुवुः)
यस्मिन् जगत्सर्वमिदं विभाति
यश्चाप्यनन्यः सकलप्रपञ्चात् ।
तिलेषु तैलोपममास्थितं त्वां
श्रीचन्द्रमौलीश्वरमाश्रयामः ॥ ३८॥
पश्यन्ति यन्न श्रुतयः शिरस्थं
शिरःस्थितं वस्त्विव सर्वलोकाः ।
त्वामात्मभूतं जगतां त्रयाणां
श्रीचन्द्रमौलीश्वरमाश्रयामः ॥ ३९॥
अणोरणीयान् महतो महीया-
नात्मा गुहायां निहितोऽस्य जन्तोः ।
तं सर्वभूतस्थितमात्मरूपं
श्रीचन्द्रमौलीश्वरमाश्रयामः ॥ ४०॥
यः सर्वसाक्षी तमसः परस्ता-
द्विभाति सर्वं किल यस्य भासा ।
त्वामागमान्तैरपि दुर्निरूपं
श्रीचन्द्रमौलीश्वरमाश्रयामः ॥ ४१॥
पुमानविज्ञाय शिवं कदाचि-(पि)
(दु)द्दुःखस्य नान्तं समुपैति धीरः ।
त्वां सच्चिदानन्दमयं प्रशान्तं
श्रीचन्द्रमौलीश्वरमाश्रयामः ॥ ४२॥
अजं पुराणं पुरुषं महान्तं
अनश्वरं वाङ्मनसो(सा)ऽति दूरम् ।
ज्ञानात्मनां हृद्यवभासमानं
श्रीचन्द्रमौलीश्वरमाश्रयामः ॥ ४३॥
वदन्त्यमी यत्पदमेव वेदा
ज्ञाते तु यास्मिन् सकलं विबुद्धम् ।
त्वां प्रत्यगात्मनमचिन्त्यशक्तिं
श्रीचन्द्रमौलीश्वरमाश्रयामः ॥ ४४॥
यं निर्विकल्पेन समाधिनैव
तपस्विनश्चेतसि वीतरागाः ।
ध्यायन्ति तेजोमयमद्भुतं त्वां
श्रीचन्द्रमौलीश्वरमाश्रयामः ॥ ४५॥
त्रिलोचनं चन्द्रकलावतंसं
गङ्गातरङ्गोल्लसदुत्तमाङ्गम् ।
स्मेरास्यमिष्टप्रदमष्टमूर्तिं
श्रीचन्द्रमौलीश्वरमाश्रयामः ॥ ४६॥
अपारसच्चित्सुखराशिमेक-
मनादिमध्यान्तमनन्तरूपम् ।
त्रिलोचनं नीलगलं प्रशान्तं
श्रीचन्द्रमौलीश्वरमाश्रयामः ॥ ४७॥
कैलासशैलेन्द्रशिरस्तटेषु
नगेन्द्रपुत्र्या सह संवसन्तम् ।
विभूति रुद्राक्षविभूषिताङ्गं
श्रीचन्द्रमौलीश्वरमाश्रयामः ॥ ४८॥
॥ इति शिवरहस्यान्तर्गते गणैः कृता चन्द्रमौलीश्वरस्तुतिः सम्पूर्णाः ॥
- ॥ श्रीशिवरहस्यम् । ईश्वराख्यः दशमांशः । अध्यायः ३३ चन्द्रमौलीश्वरस्तुतिः । ३८-४८॥
- .. shrIshivarahasyam . IshvarAkhyaH dashamAMshaH . adhyAyaH 33 chandramaulIshvarastutiH . 38-48..
Notes:
Gaṇāḥ गणाः eulogize Śiva शिव as Candramaulīśvara चन्द्रमौलीश्वर while worshipping the Sphaṭika Candramaulīśvara Śivaliñga स्फटिक चन्द्रमौलीश्चवर शिवलिङ्ग.
Proofread by Ruma Dewan