Girijakritam Shiva Stotram

 गिरिजाकृतं शिवस्तोत्रम् 

नमस्ते देवदेवाय महादेवाय मौलिने ।
जगद्धात्रे सवित्रे च शङ्कराय शिवाय च ॥ ७१॥

कपर्दिनेऽजयादाय ब्रह्मगर्भाय ते नमः ।
हिरण्यरेतसे तुभ्यं नीलग्रीवाय ते नमः ॥ ७२॥

नमो ब्रह्मण्य देवाय सितभूतिधराय च ।
पञ्चवक्त्राय रूपाय नीरूपाय नमो नमः ॥ ७३॥

सहस्राक्षाय शुभ्राय नमस्ते कृत्तिवाससे ।
अन्धकासुरमोक्षाय पशूनां पतये नमः ॥ ७४॥

विप्रवह्निमुखाग्राय हराय च भवाय च ।
शङ्कराय महेशाय ईश्वराय नमो नमः ॥ ७६॥

अमूर्तब्रह्मरूपाय मूर्त्तानां भावनाय च ।
नमः शिवाय चोग्राय हराय च भवाय च ॥ ७६॥

नमः कृष्णाय शर्वाय त्रिपुरान्तकहारिणे ।
अघोराय नमस्तेऽस्तु नमस्ते पुरुषाय ते ॥ ७७॥

सद्योजाताय तुभ्यं भो वामदेवाय ते नमः ।
ईशानाय नमस्तुभ्यं पञ्चास्याय कपालिने ॥ ७८॥

विरूपाक्षाय भावाय भगनेत्रनिपातिने ।
पूषदन्तनिपाताय महायज्ञनिपातिने ॥ ७९॥

मृगव्याधाय धर्माय कालचक्राय चक्रिणे ।
महापुरुषपूज्याय गणानां पतये नमः ॥ ८०॥

गङ्गाधराय मृडिने भवानीप्रियकारिणे ।
जगदानन्ददात्रे च ब्रह्मरूपाय ते नमः ॥ ९१॥

गुणातीताय गुणिने सूक्ष्माय गुरवेऽपि च ।
नमो महास्वरूपाय भस्मनो जन्मकारिणे ॥ ८२॥

वैराग्यरूपिणे नित्यं योगाचार्याय वै नमः ।
मयोक्तमप्रियं देव स्मरसंहारकारक ॥ ८३॥

क्षन्तुमर्हसि विश्वेश शिरसा त्वां प्रसादये ।
शापानुग्रह एवैष कृतस्ते वै न संशयः ॥ ८४॥

ममापराधजो मन्युर्न कार्यो भवताऽनघ ।
एवं प्रसादितः शम्भुर्हृष्टात्मा त्रिदशैः सह ॥ ८५॥

तीर्णव्रतपरानन्दनिर्भरः प्राह तामुमाम् ।
य इमां मत्स्तुतिं भक्त्या पठिष्यति तवोद्गताम् ।
तस्य चेष्टवियोगश्च न भविष्यति पार्वति ॥ ८६॥

जन्मत्रयधनैर्युक्तः सर्वव्याधिविवर्जितः ।
भुक्त्वेह विविधान्भोगानन्ते यास्यति मत्पुरम् ॥ ८७॥

इत्युक्त्वा तां महेशोऽपि स्वमङ्गं प्रददौ ततः ।
वैष्णवं वामभागं सा प्रतिजग्राह पार्वती ॥ ८८॥

इति श्रीस्कन्दपुराणे नागरखण्डे चतुऋपञ्चाशत्तमाधिक-
   द्विशततमाध्यायान्तर्गतं गिरिजाकृतं शिवस्तोत्रं समाप्तम् ।

स्कन्दपुराण । नागरखण्ड । अध्याय २५४/७१-८२॥


skandapurANa . nAgarakhaNDa . adhyAya 254/71-82..

Proofread by PSA Easwaran