Hanumadadi Vanaraih Kritam Ramanatha Stotram

 हनुमदादि वानरैः कृतं रामनाथस्तोत्रम् 

हनूमानुवाच ।
देवदेव जगन्नाथ रामनाथ कृपानिधे ।
त्वत्पादाम्भोरुहगता निश्चला भक्तिरस्तु मे ॥ २६॥

यं विना न जगत्सत्ता तद्भानमपि नो भवेत् ।
नमः सद्भानरूपाय रामनाथाय शम्भवे ॥ २७॥

अङ्गद उवाच ।
यस्य भासा जगद्भानं यत्प्रकाशं विना जगत् ।
न भासते नमस्तस्मै रामनाथाय शम्भवे ॥ २८॥

जाम्बवानुवाच ।
सर्वानन्दो यदानन्दो भासते परमार्थतः ।
नमो रामेश्वरायास्मै परमानन्दरूपिणे ॥ २९॥

नील उवाच ।
यद्देशकालदिग्भेदैरभिन्नं सर्वदा द्वयम् ।
तस्मै रामेश्वरायास्मै नमोऽभिन्नस्वरूपिणे ॥ १.४९.३०॥

नल उवाच ।
ब्रह्मविष्णुमहेशाना यदविद्याविजृम्भिताः ।
नमोऽविद्याविहीनाय तस्मै रामेश्वराय ते ॥ ३१॥

कुमुद उवाच ।
यस्त्वरूपापरिज्ञानात्प्रधानं कारणत्वतः ।
कल्पितं कारणायास्मै रामनाथाय शम्भवे ॥ ३२॥

पनस उवाच ।
जाग्रत्स्वप्नसुषुप्त्यादियदविद्याविजृम्भितम् ।
जाग्रदादिविहीनाय नमोऽस्मै ज्ञानरूपिणे ॥ ३३॥

गज उवाच ।
यत्स्वरूपापरिज्ञानात्कार्याणां परमाणवः ।
कल्पिताः कारणत्वेन तार्किकापसदैर्वृथा ॥ ३४॥

तमहं परमानन्दं रामनाथं महेश्वरम् ।
आत्मरूपतया नित्यमुपासे सर्वसाक्षिणम् ॥ ३५॥

गवाक्ष उवाच ।
अज्ञानपाशबद्धानां पशूनां पाशमोचकम् ।
रामेश्वरं शिवं शान्तमुपैमि शरणं सदा ॥ ३६॥

गवय उवाच ।
साध्वस्तजगदाधारं चन्द्रचूडमुमापतिम् ।
रामनाथं शिवं वन्दे संसारामयभेषजम् ॥ ३७॥

शरभ उवाच ।
अन्तःकरणमात्मेति यदज्ञानाद्विमोहितैः ।
भण्यते रामनाथं तमात्मानं प्रणमाम्यहम् ॥ ३८॥

गन्धमादन उवाच ।
रामनाथमुमानाथं गणनाथं च त्र्यम्बकम् ।
सर्वपातकशुद्ध्यर्थमुपासे जगदीश्वरम् ॥ ३९॥

सुग्रीव उवाच ।
संसाराम्भोधि मध्ये मां जन्ममृत्युजले भये ।
पुत्रदारधनक्षेत्रवीचिमालासमाकुले ॥ १.४९.४०॥

मज्जद्ब्रह्माण्डखण्डे च पतितं नाप्तपारकम् ।
क्रोशन्तमवशं दीनं विषयव्यालकातरम् ॥ ४१॥

व्याधिनक्रसमुद्विग्नं तापत्रयझषार्तिनम् ।
मां रक्ष गिरिजानाथ रामनाथ नमोऽस्तु ते ॥ ४२॥

अन्यसर्वे वानरा ऊचुः ।
निन्द्यानिन्द्येषु सर्वत्र जनित्वा योनिषु प्रभो ।
कुम्भीपाकादिनरके पतित्वा च पुनस्तथा ॥ ४६॥

जनित्वा च पुनर्योनौ कर्मशेषेण कुत्सिते ।
संसारे पतितानस्मान् रामनाथ दयानिधे ॥ ४७॥

अनाथान्विवशान्दीनान्क्रोशतः पाहि शङ्कर ।
नमस्तेऽस्तु दयासिन्धो रामनाथ महेश्वर ॥ ४८॥

इति श्रीस्कन्दपुराणे ब्रह्मखण्डे सेतुखण्डे एकोनपञ्चाश-
त्तमाध्यायान्तर्गतं हनुमदादि वानरैः कृतं रामनाथस्तोत्रं
समाप्तम् ।

स्कन्दपुराण । ब्रह्मखण्ड । सेतुल्खण्ड । अध्याय ४९/२६-४८॥


skandapurANa . brahmakhaNDa . setulkhaNDa . adhyAya 49/26-48..

Proofread by PSA Easwaran