Haradattakrita Shiva Stuti

 हरदत्तकृता शिवस्तुतिः 

(शिवरहस्यान्तर्गते सदाशिवाख्ये)
हरदत्त उवाच ।
महादेवो देवः श्रुतिशिखरमौलिस्थवचनै-
स्तथान्ये विष्ण्वाद्याविधिहरिहरेन्द्रानलयमाः ।
महादेवाज्जाताः श‍ृणुत वरसोमेन जनिता
अतो वेदैर्वेद्यो भवति शिव एकः शिवकरः ॥ ६३॥

मखानामेवायं प्रभुरखिलविश्वाधिक हरः
स वेदादौ चान्ते स्वरजनिततारः परशिवः ।
यतो ब्रह्मेन्द्राद्या हरिरविमुखा रुद्रनिवहाः
प्रसूता ध्येयोऽयं श्रुतिशिखवाक्यैः परशिवः ॥ ६४॥

ऋतं सत्यं देव पुरुषपरमो भूतहृदयो
नमोऽन्तानां शेषी श्रुतिवरमहारुद्रवचसाम् ।
रवेरन्तर्ध्येयो भवति स हि भर्गेन(ण)वचसा
द्विजैर्गायत्र्यां च प्रतिपदमुपास्यः परशिवः ॥ ६५॥

यतो वाचः शम्भोर्भवति च निवृत्ताश्च मनसा
महानन्दं यस्माद्भवति जनतास्वेव निपुणम् ।
जगद्यस्माज्जातं प्रभवति महेशेन जनितं
अतोऽन्ते तस्मिन्यद्द्भवति च विलीनं परशिवे ॥ ६६॥

द्विजानां जाबालश्रुतिगदितवर्णाश्रमविधिः
महात्रैविध्योक्तः श्रुतिगदितवर्णाश्रमविधिः ।
शिवस्यार्चालिङ्गे श्रुतिगदितभस्माक्षविधृति-
र्जपो रुद्रस्यायं श्रुतिगदितपञ्चाक्षरमनोः ॥ ६७॥

विष्णुब्रह्मानन्द्रा मुनिनृपदितिजा यस्य लिङ्गार्चनाद्वै
सम्प्राप्ताः पदवीं सदैव मुदितास्तैः कर्मदेवा जनाः ।
एतत्सत्यमहो त्रिसत्यमधुना वच्मीदमग्नीशितुः
सान्निध्ये निवसामितत्सुखमहं पद्मेवतत्पायसे ॥ ६०॥

इत्युक्त्वा हरदत्तकस्त्रिजगतीनाथं प्रणम्यादरा-
न्निस्तीर्णः सुमहायसोरुशयनादुत्तीर्य राज्ञार्चितः ।
शौवेन्द्रैर्हरभक्तिभावजनितैः सानन्दबाष्पाम्बुभिः
लोकैः साध्विति नन्दितो हरकृपापीयूषवारान्निधौ ॥ ६९॥

॥ इति शिवरहस्यान्तर्गते हरदत्तकृता शिवस्तुतिः सम्पूर्णा ॥

- ॥ श्रीशिवरहस्यम् । सदाशिवाख्यः नवमांशः । अध्यायः १७ गौरीहरदत्तचरितम् । ६३-६९॥


- .. shrIshivarahasyam . sadAshivAkhyaH navamAMshaH . adhyAyaH 17 gaurIharadattacharitam . 63-69..

Proofread by Ruma Dewan