Himalayakritam 2 Shiva Stotram

 हिमालयकृतं २ शिवस्तोत्रम् 

हिमालय उवाच ।
देवदेव महादेव कपर्दिन् शङ्कर प्रभो ।
त्वयैव लोकनाथेन पालितं भुवनत्रयम् ॥ १२॥

नमस्ते देवदेवेश योगिरूपधराय च ।
निर्गुणाय नमस्तुभ्यं सगुणाय विहारिणे ॥ १३॥

कैलासवासिने शम्भो सर्वलोकाटनाय च ।
नमस्ते परमेशाय लीलाकाराय शूलिने ॥ १४॥

परिपूर्णगुणाधानविकाररहिताय ते ।
नमोऽनीहाय वीहाय धीराय परमात्मने ॥ १५॥

अबहिर्भोगकाराय जनवत्सल ते नमः ।
त्रिगुणाधीश मायेश ब्रह्मणे परमात्मने ॥ १६॥

विष्णुब्रह्मादिसेव्याय विष्णुब्रह्मस्वरूपिणे ।
विष्णुब्रह्मकदात्रे ते भक्तप्रिय नमोऽस्तु ते ॥ १७॥

तपोरत तपस्थानसुतपःफलदायिने ।
तपःप्रियाय शान्ताय नमस्ते ब्रह्मरूपिणे ॥ १८॥

व्यवहारकरायैव लोकाचारकराय ते ।
सगुणाय परेशाय नमोऽस्तु परमात्मने ॥ १९॥

लीला तव महेशानावेद्या साधुसुखप्रदा ।
भक्ताधीनस्वरूपोऽसि भक्तवश्यो हि कर्मकृत् ॥ ३.११.२०॥

मम भाग्योदयादत्र त्वमागत इह प्रभो ।
सनाथ कृतवान्मां त्वं वर्णितो दानवत्सलः ॥ २१॥

अद्य मे सफलं जन्म सफलं जीवनं मम ।
अद्य मे सफलं सर्वं यदत्र त्वं समागतः ॥ २२॥

ज्ञात्वा मां दासमव्यग्रमाज्ञान्देहि महेश्वर ।
त्वत्सेवां च महाप्रीत्या कुर्यामहमनन्यधीः ॥ २३॥

इति शिवपुराणे रुद्रसंहितायां पार्वतीखण्डे एकादशाध्यायान्तर्गतं
         हिमालयकृतं शिवस्तोत्रं समाप्तम् ।

शिवपुराण । रुद्रसंहिता । पार्वतीखण्ड । अध्याय ११/१२-२०॥


shivapurANa . rudrasaMhitA . pArvatIkhaNDa . adhyAya 11/12-20..

Proofread by PSA Easwaran