जैगीषव्यकृतं शिवस्तोत्रम्
जैगीषव्य उवाच ।
नमः शिवाय शान्ताय सर्वज्ञाय शुभात्मने ।
जगदानन्दकन्दाय परमानन्दहेतवे ॥ ३२॥
अरूपाय सरूपाय नानारूपधराय च ।
विरूपाक्षाय विधये विधिविष्णुस्तुताय च ॥ ३३॥
स्थावराय नमस्तुभ्यं जङ्गमाय नमोऽस्तुते ।
सर्वात्मने नमस्तुभ्यं नमस्ते परमात्मने ॥ ३४॥
नमस्त्रैलोक्यकाम्याय कामाङ्गदहनाय च ।
नमो शेषविशेषाय नमः शेषाङ्गदाय ते ॥ ३५॥
श्रीकण्ठाय नमस्तुभ्यं विषकण्ठाय ते नमः ।
वैकुण्ठवन्द्यपादाय नमोऽकुण्ठितशक्तये ॥ ३६॥
नमः शक्त्यर्धदेहाय विदेहाय सुदेहिने ।
सकृत्प्रणाममात्रेण देहिदेहनिवारिणे ॥ ३७॥
कालाय कालकालाय कालकूटविषादिने ।
व्यालयज्ञोपवीताय व्यालभूषणधारिणे ॥ ३८॥
नमस्ते खण्डपरशो नमः खण्डेन्दुधारिणे ।
खण्डिताशेष दुःखाय खड्गखेटकधारिणे ॥ ३९॥
गीर्वाणगीतनाथाय गङ्गाकल्लोलमालिने ।
गौरीशाय गिरीशाय गिरिशाय गुहारणे ॥ २.६३.४०॥
चन्द्रार्धशुद्धभूषाय चन्द्रसूर्याग्निचक्षुषे ।
नमस्ते चर्मवसन नमो दिग्वसनाय ते ॥ ४१॥
जगदीशाय जीर्णाय जराजन्महराय ते ।
जीवाय ते नमस्तुभ्यं जञ्जपूकादिहारिणे ॥ ४२॥
नमो डमरुहस्ताय धनुर्हस्ताय ते नमः ।
त्रिनेत्राय नमस्तुभ्यं जगन्नेत्राय ते नमः ॥ ४३॥
त्रिशूलव्यग्रहस्ताय नमस्त्रिपथगाधर ।
त्रिविष्टपाधिनाथाय त्रिवेदीपठिताय च ॥ ४४॥
त्रयीमयाय तुष्टाय भक्ततुष्टिप्रदाय च ।
दीक्षिताय नमस्तुभ्यं देवदेवाय ते नमः ॥ ४५॥
दारिताशेषपापाय नमस्ते दीर्घदर्शिने ।
दूराय दुरवाप्याय दोषनिर्दलनाय च ॥ ४६॥
दोषाकरकलाधार त्यक्तदोषागमाय च ।
नमो धूर्जटये तुभ्यं धत्तूरकुसुमप्रिय ॥ ४७॥
नमो धीराय धर्माय धर्मपालाय ते नमः ।
नीलग्रीव नमस्तुभ्यं नमस्ते नीललोहित ॥ ४८॥
नाममात्रस्मृतिकृतां त्रैलोक्यैश्वर्यपूरक ।
नमः प्रमथनाथाय पिनाकोद्यतपाणये ॥ ४९॥
पशुपाशविमोक्षाय पशूनां पतये नमः ।
नामोच्चारणमात्रेण महापातकहारिणे ॥ २.६३.५०॥
परात्पराय पाराय परापरपराय च ।
नमोऽपारचरित्राय सुपवित्रकथाय च ॥ ५१॥
वामदेवाय वामार्धधारिणे वृषगामिने ।
नमो भर्गाय भीमाय नतभीतिहराय च ॥ ५२॥
भवाय भवनाशाय भूतानां पतये नमः ।
महादेव नमस्तुभ्यं महेश महसां पते ॥ ५३॥
नमो मृडानीपतये नमो मृत्युञ्जयाय ते ।
यज्ञारये नमस्तुभ्यं यक्षराजप्रियाय च ॥ ५४॥
यायजूकाय यज्ञाय यज्ञानां फलदायिने ।
रुद्राय रुद्रपतये कद्रुद्राय रमाय च ॥ ५५॥
शूलिने शाश्वतेशाय श्मशानावनिचारिणे ।
शिवाप्रियाय शर्वाय सर्वज्ञाय नमोऽस्तु ते ॥ ५६॥
हराय क्षान्तिरूपाय क्षेत्रज्ञाय क्षमाकर ।
क्षमाय क्षितिहर्त्रे च क्षीरगौराय ते नमः ॥ ५७॥
अन्धकारे नमस्तुभ्यमाद्यन्तरहिताय च ।
इडाधाराय ईशाय उपेद्रेन्द्रस्तुताय च ॥ ५८॥
उमाकान्ताय उग्राय नमस्ते ऊर्ध्वरेतसे ।
एकरूपाय चैकाय महदैश्वर्यरूपिणे ॥ ५९॥
अनन्तकारिणे तुभ्यमम्बिकापतये नमः ।
त्वमोङ्कारो वषट्कारो भूर्भुवःस्वस्त्वमेव हि ॥ २.६३.६०॥
दृश्यादृश्यं यदत्रास्ति तत्सर्वं त्वमु माधव ।
स्तुतिं कर्तुं न जानामि स्तुतिकर्ता त्वमेव हि ॥ ६१॥
वाच्यस्त्वं वाचकस्त्वं हि वाक्च त्वं प्रणतोऽस्मि ते ।
नान्यं वेद्मि महादेव नान्यं स्तौमि महेश्वर ॥ ६२॥
नान्यं नमामि गौरीश नान्याख्यामाददे शिव ।
मूकोऽन्यनामग्रहणे बधिरोऽन्यकथाश्रुतौ ॥ ६३॥
पङ्गुरन्याभिगमनेऽस्म्यन्धोऽन्यपरिवीक्षणे ।
एक एव भवानीश एककर्ता त्वमेव हि ॥ ६४॥
पाता हर्ता त्वमेवैको नानात्वं मूढकल्पना ।
अतस्त्वमेव शरणं भूयोभूयः पुनःपुनः ॥ ६५॥
संसारसागरे मग्नं मामुद्धर महेश्वर ।
इति स्तुत्वा महेशानं जैगीषव्यो महामुनिः ॥ ६६॥
वाचं यमो भवत्स्थाणोः पुरतः स्थाणुसन्निभः ॥
इति श्रीस्कादपुराणे काशीखण्डे पूर्वार्द्धे त्रिषष्टितमा- ध्यायान्तर्गतं
जैगीषव्यकृतं शिवस्तोत्रं समाप्तम् ।
स्कन्दपुराण । काशीखण्ड । उत्तरखण्ड । अध्याय ६३/३२-६५॥
skandapurANa . kAshIkhaNDa . uttarakhaNDa . adhyAya 63/32-65..
Proofread by PSA Easwaran