काश्यष्टकम्
श्रीगणेशाय नमः ।
पापौघविध्वंसकरीं प्रसिद्धां श्रीजाह्नवीभूषितदिव्यरूपाम् ।
निर्वाणदात्रीं निखिलैकपूज्यां शिवप्रियां चैव नमामि काशीम् ॥ १॥
देवासुरैर्वन्दितपादपद्मां गायन्ति मुनयः सुयशश्च दिव्याम् ।
प्रसिद्धवेदेषु प्रभावमस्याः शिवप्रियां चैव नमामि काशीम् ॥ २॥
मुमुर्षूणां चैव शिवप्रदायिनीं वैकुण्ठश्रेणिं गुणमन्दिरां च ।
शिवालयां शोकविनाशिनीं च शिवप्रियां चैव नमामि काशीम् ॥ ३॥
विनाशशून्यां शिवरूपिणीं च मोहान्धकारस्य विनाशिनीं च ।
ब्रह्मात्मिकां कामप्रदायिनीं च शिवप्रियां वै प्रणमामि काशीम् ॥ ४॥
विशुद्धविज्ञानघनां चिदात्मिकां मोहाटवीं चैव दवाग्निभूताम् ।
शुद्धां सुशान्तां शिवभक्तिदायिनीं शिवप्रियां वै प्रणमामि काशीम् ॥ ५॥
भूतौघसन्तापविनाशिनीं च लोकेश्वरैर्वन्दितदिव्यरूपाम् ।
महावतां गर्भनिवासकृन्तनीं शिवप्रियां वै प्रणमामि काशीम् ॥ ६॥
विज्ञानदात्रीं प्रणवस्वरूपां चिन्तामणिं भक्तिप्रदां च नित्याम् ।
गोलोकदात्रीं भवभक्तिदात्रीं शिवप्रियां वै प्रणमामि काशीम् ॥ ७॥
बुद्धेः परां शङ्करप्राणवल्लभां मोहार्णवं कुम्भसमुद्भवां च ।
पापेभव्याघ्रीं हरलोकदात्रीं शिवप्रियां वै प्रणमामि काशीम् ॥ ८॥
प्रातः प्रातः समुत्थाय यः पठेत्प्रयतः पुमान् ।
अन्यदेशेऽपि भक्त्या स काशीवासफलं लभेत् ॥ ९॥
इति श्रीगोपालव्यासविरचितं काश्यष्टकं सम्पूर्णम् ॥