Shri Krishnaproktam Shiva Stotram

श्रीकृष्णप्रोक्तं शिवस्तोत्रम्

स देवेन्द्रश्च वायुश्च सोऽश्विनौ स च विद्युतः । स चन्द्रमाः स चेशानः स सूर्यो वरुणश्च सः ॥ ३७॥ स कालः सोऽन्तको मृत्युः स तमो रात्र्यहानि च । मासार्धमासा ऋतवः सन्ध्ये संवत्सरश्च सः ॥ ३८॥ स धाता स विधाता च विश्वकर्मा स सर्ववित् । नक्षत्राणि दिशश्चैव प्रदिशोऽथ ग्रहास्तथा । विश्वमूर्तिरमेयात्मा भगवानमितद्युतिः ॥ ३९॥ एकधा च द्विधा चैव बहुधा च स एव च । शतधा सहस्रधा चैव तथा शतसहस्रधा ॥ ४०॥ ईदृशः स महादेवो भूयश्च भगवानतः । न हि शक्या गुणा वक्तुमपि वर्षशतैरपि ॥ ४१॥ इति महाभारते अनुशासनपर्वणि १४५ अध्यायान्तर्गतं श्रीकृष्णप्रोक्तं शिवस्तोत्रं सम्पूर्णम् । महाभारत । अनुपर्व । अध्याय १४५/३७-४१॥ mahAbhArata . anuparva . adhyAya 145/37-41.. Proofread by PSA Easwaran