किरातमूर्तिस्तोत्रम्
नमः शिवाय भर्गाय लीलाशबररूपिणे ।
प्रपन्नार्तपरित्राणकरुणामसृणात्मने ॥ १॥
पिञ्छोत्तंसं समानीलश्मश्रुविद्योतिताननम् ।
उदग्रारक्तनयनं गौरकौशेयवाससम् ॥ २॥
कैलासशिखरोत्तुङ्गं छुरिकाचापधारिणम् ।
किरातमूर्तिं ध्यायामि परमं कुलदैवतम् ॥ ३॥
दुर्जनैर्बहुधाऽऽक्रान्तं भयसम्भ्रान्तमानसम् ।
त्वदेकशरणं दीनं परिपालय नाथ, माम् ॥ ४॥
मह्यं द्रुह्यन्ति रिपवो बाह्याश्चाभ्यन्तराश्च ये ।
विद्रावय दयासिन्धो चापज्यानिस्वनेन तान् ॥ ५॥
कूटकर्मप्रसक्तानां शत्रूणां शातनाय भोः ।
चालय छुरिकां घोरां शतकोटिसमुज्ज्वलाम् ॥ ६॥
विपद्दावानलज्वालासन्तप्तं रोगपीडितम् ।
कर्तव्यताविमूढं मां त्रायस्व गिरिशात्मज ॥ ७॥
नमः किरातवपुषे नमः क्षेमङ्कराय च ।
नमः पापविघाताय नमस्ते धर्मसेतवे ॥ ८॥
नमो महेश्वर्यदाय नमो भक्तप्रियाय ते ।
नमो वीर्यनिधानाय नमो गौरीसुताय च ॥ ९॥
नमो नमस्ते विश्वात्मन् विश्वमङ्गलदायक ।
नमो नमस्ते सर्वेश सर्वशक्तिसमन्वित ॥ १०॥
रागद्वेषादिदुर्जन्तुसङ्कुले मन्मनोवने ।
विधत्स्व मृगयां नित्यं विशिष्टशबराकृते ॥ ११॥
यद्यत् करोमि भगवन् मनोवाक्कायकर्मभिः ।
भवत्प्रसादत्तत्सर्वै भूयात्त्वच्चरणार्चनम् ॥ १२॥
इति श्रीवासुदेवन् एलयथेन विरचितं किरातमूर्तिस्तोत्रं सम्पूर्णम् ।
Proofread by PSA Easwaran