Shri Madhyarjuneshvara Stutih

 श्रीमध्यार्जुनेश्वरस्तुतिः 

मैथिल उवाच ।
नतोऽस्मि देवाय गिरीन्द्रवासिने
गिरीशकन्यार्द्धशरीररूपिणे ।
कालायकल्पायत्रिलोचनाय
मध्यार्जुनेशाय नमश्शिवाय ॥ १॥

गजासुरान्ताय महोदराय
चण्डाय चण्डीशनताय शम्भो ।
सद्भक्तसंरक्षणदीक्षिताय
मध्यार्जुनेशाय नमश्शिवाय ॥ २॥

ब्रह्मेन्द्रविष्ण्वर्कनिशीशपूर्व
गीर्वाणवर्यार्चितविग्रहाय ।
कल्याणदेहाय सदाशिवाय
मध्यार्जुनेशाय नमश्शिवाय ॥ ३॥

भवाब्धिपोताय भवान्तकाय
भवाय भर्त्रे भवभव्यरूपिणे ।
भवाय भानुस्तुतितोषकाय
मध्यार्जुनेशाय नमश्शिवाय ॥ ४॥

वृषाय विष्ण्वर्चितविग्रहाय
पापाचलच्छेदकुठाररूपिणे ।
समस्तकल्याणगुणाकराय
मध्यार्जुनेशाय नमश्शिवाय ॥ ५॥

यज्ञाय बोधाय फलाय शाम्भवी
प्रमोदसम्मोदकराय यज्वने ।
कपर्दिने तत्पुरुषाय धीमते
मध्यार्जुनेशाय नमश्शिवाय ॥ ६॥

अघोरदेवाय सहस्रकर्त्रे
नित्याय नान्ताय वृषध्वजाय ।
वृषेन्द्रवाहाय वृषाय मायिने
मध्यार्जुनेशाय नमश्शिवाय ॥ ७॥

उग्राय मध्याय त्रिलोचनाय
सिद्धाय शुद्धाय शिवाय श्रीमते ।
लोकान्तराय प्रभवे नयाय
मध्यार्जुनेशाय नमश्शिवाय ॥ ८॥

पापौघविध्वंसनदीक्षिताय
कृपासमुद्राय त्रियम्बकाय ।
कामादिशत्रुच्छिदिदीक्षिताय
मध्यार्जुनेशाय नमश्शिवाय ॥ ९॥

भवाटवीमेघवहाय तुभ्यं
दुर्ज्ञानसूर्याय सदाशिवाय ।
निस्सीममूर्ते सकलार्थदायिने
मध्यार्जुनेशायनमश्शिवाय ॥ १०॥

इष्टाय शिष्टाय सुगन्धकाय
बृहत्कुचानन्दकराय तुभ्यम् ।
निरस्तदोषाय कुमारपित्रे
मध्यार्जुनेशाय नमश्शिवाय ॥ ११॥

पित्रे च मात्रे गुरवे सुबन्धवे
मित्राय कान्ताय मदोन्नताय ।
कलिच्छिदे मारकमारकाय
मध्यार्जुनेशायनमश्शिवाय ॥ १२॥

शम्भो विभो पावन साम्बनाथ
गिरीश नित्याव्यय निर्विकार ।
श्रीकण्ठविश्वेश्वरमङ्गळाङ्ग
मध्यार्जुनेशसकलार्थदशान्तमूर्ते ॥ १३॥

॥ इति श्रीमध्यार्जुनेश्वरस्तुतिः सम्पूर्णा ॥



Encoded from Tamil and proofread by Brahmashri Balaji Dvivedi