देवैः कृतः महेशस्तवः
जय जय शङ्कर चन्द्रशेखर प्रमथाधीश्वर चारुचन्द्रचूड ।
जय जय निगमादिवन्द्यपादोज्वलितानलभाललोचनाद्य नः
(भाललोचनाव नः, भाललोचनाय नः) ॥ १॥
जय जय गजचर्मशोभिताङ्ग जय जय विश्वविधान शूलपाणे ।
जय जय त्रिपुरान्तकेश शम्भो जय जय शान्त शशाङ्कचारुमौले ॥ २॥
जय जय तटिनीजटोत्तमाङ्ग जय काकोदरवीरहार शम्भो ।
गरकन्धर भूरुहोरुवास त्रिजगत्तापहराव्ययेश देव ॥ ३॥
जय जय जगदीश दीनबन्धो मधुवैरिप्रकटाक्षिपूज्यपाद ।
जय जय मारहरात्तशूलपाणे प्रमथाधीश्वर पाहि भीतितोऽद्य नः ॥ ४॥
जय जय विबुधार्तिनाशहेतो जय जय भस्मविभूषणेषु तुष्ट ।
प्रसभं कष्टमपाकुरुष्व शम्भो गिरिजानाथ सनाथयाशु नः ॥ ५॥
(प्रसभं कष्टमपाकुरुष्व शम्भो गिरिजानाथ सनाथ याशु नः) ॥ ५॥
॥ इति शिवरहस्यान्तर्गते भवाख्ये देवैः कृतः महेशस्तवः ॥
- ॥ श्रीशिवरहस्यम् । भवाख्यः द्वितीयांशः । अध्यायः ८ ॥
- .. shrIshivarahasyam . bhavAkhyaH dvitIyAMshaH . adhyAyaH 8 ..
Shloka-s have been renumbered, as the shloka
numbering has been found to differ amongst
the two referenced source texts.
Proofread by Ruma Dewan