महेश्वरस्तोत्रम् अथवा रुद्रस्तोत्रम्
श्रीविष्णुरुवाच -
एकाक्षराय रुद्राय अकारायात्मरूपिणे ।
उकारायादिदेवाय विद्यादेहाय वै नमः ॥ १॥
तृतीयाय मकाराय शिवाय परमात्मने ।
सूर्याग्निसोमवर्णाय यजमानाय वै नमः ॥ २॥
अग्नये रुद्ररूपाय रुद्राणां पतये नमः ।
शिवाय शिवमन्त्राय सद्योजाताय वेधसे ॥ ३॥
वामाय वामदेवाय वरदायामृताय ते ।
अघोरायातिघोराय सद्योजाताय रंहसे ॥ ४॥
ईशानाय श्मशानाय अतिवेगाय वेगिने ।
नमोऽस्तु श्रुतिपादाय ऊर्ध्वलिङ्गाय लिङ्गिने ॥ ५॥
हेमलिङ्गाय हेमाय वारिलिङ्गाय चाम्भसे ।
शिवाय शिवलिङ्गाय व्यापिने व्योमव्यापिने ॥ ६॥
वायवे वायुवेगाय नमस्ते वायुव्यापिने ।
तेजसे तेजसाम्भर्त्रे नमस्तेजोऽधिव्यापिने ॥ ७॥
जलाय जलभूताय नमस्ते जलव्यापिने ।
पृथिव्यै चान्तरिक्षाय पृथिवीव्यापिने नमः ॥ ८॥
शब्दस्पर्शस्वरूपाय रसगन्धाय गन्धिने ।
गणाधिपतये तुभ्यं गुह्यद्गुह्यतमाय ते ॥ ९॥
अनन्ताय विरुपाय अनन्तानामयाय च ।
शाश्वताय वरिष्ठाय वारिगर्भाय योगिने ॥ १०॥
संस्थितायाम्भसां मध्ये आवयोर्मध्यवर्चसे ।
गोप्त्रे हर्त्रे सदा कर्त्रे निधनायेश्वराय च ॥ ११॥
अचेतनाय चिन्त्याय चेतनायासहारिणे ।
अरूपाय सुरूपाय अनङ्गगायाङ्गहारिणे ॥ १२॥
भस्मदिग्धशरीराय भानुसोमाग्निहेतवे ।
श्वेताय श्वेतवर्णाय तुहिनाद्रिचराय च ॥ १३॥
सुश्वेताय सुवक्त्राय नमः श्वेतशिखाय च ।
श्वेतास्याय महास्याय नमस्ते श्वेतलोहित ॥ १४॥
सुताराय विशिष्टाय नमो दुन्दुभिने हर ।
शतरूप विरुपाय नमः केतुमते सदा ॥ १५॥
ऋद्धिशोकविशोकाय पिनाकाय कपर्दिने ।
विपाशाय सुपाशाय नमस्ते पाशनाशिने ॥ १६॥
सुहोत्राय हविष्याय सुब्रह्मण्याय सूरिणे ।
सुमुखाय सुवक्त्राय दुर्दमाय दमाय च ॥ १७॥
कङ्काय कङ्करूपाय कङ्कणीकृतपन्नग ।
सनकाय नमस्तुभ्यं सनातन सनन्दन ॥ १८॥
सनत्कुमार सारङ्गमारणाय महात्मने ।
लोकाक्षिणे त्रिधामाय नमो विरजसे सदा ॥ १९॥
शङ्खपालाय शङ्खाय रजसे तमसे नमः ।
सारस्वताय मेघाय मेघवाहन ते नमः ॥ २०॥
सुवाहाय विवाहाय विवादवरदाय च ।
नमः शिवाय रुद्राय प्रधानाय नमोनमः ॥ २१॥
त्रिगुणाय नमस्तुभ्यं चतुर्व्यूहात्मने नमः ।
संसाराय नमस्तुभ्यं नमः संसारहेतवे ॥ २२॥
मोक्षाय मोक्षरूपाय मोक्षकर्त्रे नमोनमः ।
आत्मने ऋषये तुभ्यं स्वामिने विष्णवे नमः ॥ २३॥
नमो भगवते तुभ्यं नागानां पतये नमः ।
ओङ्काराय नमस्तुभ्यं सर्वज्ञाय नमो नमः ॥ २४॥
सर्वाय च नमस्तुभ्यं नमो नारायणाय च ।
नमो हिरण्यगर्भाय आदिदेवाय ते नमः ॥ २५॥
नमोस्त्वजाय पतये प्रजानां व्यूहहेतवे ।
महादेवाय देवानामीश्वराय नमो नमः ॥ २६॥
शर्वाय च नमस्तुभ्यं सत्याय शमनाय च ।
ब्रह्मणे चैव भूतानां सर्वज्ञाय नमो नमः ॥ २७॥
महात्मने नमस्तुभ्यं प्रज्ञारूपाय वै नमः ।
चितये चितिरूपाय स्मृतिरूपाय वै नमः ॥ २८॥
ज्ञानाय ज्ञानगम्याय नमस्ते संविदे सदा ।
शिखराय नमस्तुभ्यं नीलकण्ठाय वै नमः ॥ २९॥
अर्धनारीशरीराय अव्यक्ताय नमो नमः ।
एकादशविभेदाय स्थाणवे ते नमः सदा ॥ ३०॥
नमः सोमाय सूर्याय भवाय भवहारिणे ।
यशस्कराय देवाय शङ्करायेश्वराय च ॥ ३१॥
नमोऽम्बिकाधिपतये उमायाः पतये नमः ।
हिरण्यबाहवे तुभ्यं नमस्ते हेमरेतसे ॥ ३२॥
नीलकेशाय वित्ताय शितिकण्ठाय वै नमः ।
कपर्दिने नमस्तुभ्यं नागाङ्गाभरणाय च ॥ ३३॥
वृषारूढाय सर्वस्य हर्त्रे कर्त्रे नमो नमः ।
वीररामातिरामाय रामनाथाय ते विभो ॥ ३४॥
नमो राजाधिराजाय राज्ञामधिगताय ते ।
नमः पालाधिपतये पालाशाकृन्तते नमः ॥ ३५॥
नमः केयूरभूषाय गोपते ते नमो नमः ।
नमः श्रीकण्ठनाथाय नमो लिकुचपाणये ॥ ३६॥
भुवनेशाय देवाय वेदशास्त्र नमोऽस्तु ते ।
सारङ्गाय नमस्तुभ्यं राजहंसाय ते नमः ॥ ३७॥
कनकाङ्गदहाराय नमः सर्पोपवीतिने ।
सर्पकुण्डलमालाय कटिसूत्रीकृताहिने ॥ ३८॥
वेदगर्भाय गर्भाय विश्वगर्भाय ते शिव । (३९)
इति श्रीलिङ्गमहापुराणे पूर्वभागे अष्टादशाध्यायान्तर्गतं
श्रीविष्णुकृतं महेश्वरस्तोत्रं अथवा रुद्रस्तोत्रं सम्पूर्णम् ।
॥ लिङ्गपुराणं ॥ पूर्वभागः । अध्यायः १८। १-३८॥
Encoded and proofread by Ruma Dewan