मलहानिकरेश्वराष्टकम्
तुङ्गोत्तमाङ्गविलसन्मृगभृत्कलाय
शृङ्गाद्रिवासरसिकाय महेश्वराय ।
शीतांशुभास्करकृशानुदृशे भवानी-
भर्त्रे नमोऽस्तु मलहानिकरेश्वराय ॥ १॥
शर्वाय कश्यपमुनीन्द्रकुलाब्धिचन्द्र-
श्रीमद्विभाण्डककृताग्र्यतपःफलाय ।
श्रीऋष्यशृङ्गमुनिसेव्यपदाम्बुजाय
नित्यं नमोऽस्तु मलहानिकरेश्वराय ॥ २॥
शृङ्गाद्रिदेशिकवरेण्यसुपूजिताय
नम्राखिलेष्टपरिपूरणतत्पराय ।
अस्तोकदुःखकृदवग्रहवारकाय
नित्यं नमोऽस्तु मलहानिकरेश्वराय ॥ ३॥
सच्चित्सुखाभिधगुरुप्रवरेण वामे
संस्थापिताद्रिसुतया सह विष्टपानि ।
गोपायते नृपकदम्बकसेविताय
पित्रेऽस्तु तारकजितः प्रणतिर्भवाय ॥ ४॥
श्रीमन्नृसिंहगुरुणाभिनवेन सद्यः
संस्थापितं निजतनूजमचिन्त्यशक्तिम् ।
स्तम्भस्थितं प्रथमपूज्यमवेक्ष्य नित्यं
मोमुद्यमानहृदयाय नमश्शिवाय ॥ ५॥
नित्योत्सवाय निगमागमतत्त्वविद्भिः
सङ्गीयमानविभवाय निरञ्जनाय ।
निर्वाणदाय निजभक्तततेश्च नाना-
मोहान्धकारमिहिराय नमश्शिवाय ॥ ६॥
पद्मोद्भवाब्जनयनप्रमथाधिपात्मा
सर्गस्थितिप्रलयकृत् गुणयोगतो यः ।
आनन्दबोधपरिपूर्णसदात्मकाय
तस्मै शिवाय नतिरस्तु गुणातिगाय ॥ ७॥
यस्मिन् विभाण्डकमुनिर्निजबोधयुक्तः
एकीबभूव विनिवृत्तसमस्तबन्धः ।
तस्मै सदा श्रुतिशिरःप्रतिपाद्यजीव-
ब्रह्मैक्यबोधनरताय नमश्शिवाय ॥ ८॥
इति दक्षिणाम्नाय-शृङ्गेरी-शारदापीठाधीश्वर-जगद्गुरु-शङ्कराचार्य-
श्रीश्रीश्रीभारतीतीर्थ-महास्वामि-करकमलसञ्जातैः
जगद्गुरु-श्रीश्रीविधुशेखरभारती-महास्वामिभिः विरचितं
मलहानिकरेश्वराष्टकं सम्पूर्णम् ।