Shri Mallari Mahatmyam

श्रीमल्लारिमाहात्म्यम्

ध्यानम् - हेमाम्भोजप्रवालप्रतिमनिजरुचिं चारुखट्वाङ्गपद्मौ चक्रं शक्तिं सपाशं सृणिमतिरुचिरामक्षमालां कपालम् । हस्ताम्भोजैर्दधानं त्रिनयनविलसद्वेदवक्त्राभिरामं मार्ताण्डं वल्लभार्धं मणिमयमुकुटं हारदीप्तं भजामः ॥ मकुटमणिमयूखप्रोज्झिताशेषरत्नं विमलशशिकलाङ्कं सुन्दरेन्दीवराक्षम् । अनुकृतशशितेजः कुण्डलं चारुहासं प्रकटदशनशोभानिर्जितानेकहीरम् ॥ १॥ अभिनवमणिमुक्ताहारचाम्पेयमाला विविधकुसुमगुच्छैः शोभिवक्षःस्थलाढ्यम् । सफणपवनभुग्दोर्दण्डभूषाभिरामं करडमरुनिनादैः पूरितव्योमगर्भम् ॥ २॥ त्रिभुवनजगदीशं पीतकौशेयवासं दनुजदहनदक्षं प्रस्फुरत्खड्गहस्तम् । भुजगफणसुगुप्तैर्भूषणैर्न्यस्तभूषं प्रणतसुरकिरीटव्याप्तपादारविन्दम् ॥ ३॥ सितहयवरपत्रं हारसम्भूषिताङ्गं परिवृतमतिघोरैः सप्तभिः सारमेयैः । कनकगिरिसमाभं नैशचूर्णाभिरामं सकलनिगमगुह्यं नौमि मल्लारिदेवम् ॥ ४॥ इति श्रीमल्लारिमाहात्म्यं सम्पूर्णम् ।