Mankanakarishikritam Rudra Stotram

मङ्कणकऋषिकृतं रुद्रस्तोत्रम्

ततो भस्म क्षताद्राजन्निर्गतं हिमसन्निभम् । तद्दृष्ट्वा व्रीडितो राजन्स मुनिः पादयोर्गतः ॥ १०७॥ नान्यं देवमहं मन्ये रुद्रात्परतरं महत् । सुरासुरस्य जगतो गतिस्त्वमसि शूलधृक् ॥ १०८॥ त्वया सृष्टमिदं विश्वं त्रैलोक्यं सचराचरम् । त्वामेव भगवन्सर्वे प्रविशन्ति युगक्षये ॥ १०९॥ देवैरपि न शक्यस्त्वं परिज्ञातुं कुतो मया । त्वयि सर्वे च दृश्यन्ते सुरा ब्रह्मादयोऽनघ ॥ ११०॥ सर्वस्त्वमसि लोकानां कर्ता कारयिता च ह । त्वत्प्रसादात्सुराः सर्वे मोदन्तीहाकुतोभयाः । एवं स्तुत्वा महादेवं स ऋषिः प्रणतोऽभवत् ॥ १११॥ इति महाभारते आरण्यकपर्वणि ८१ अध्यायान्तर्गतं मङ्कणकऋषिकृतं रुद्रस्तोत्रं सम्पूर्णम् । महाभारत । आरण्यकपर्व । अध्याय ८१/१०७-१११॥ mahAbhArata . AraNyakaparva . adhyAya 81/107-111.. Proofread by PSA Easwaran