श्रीमेधादक्षिणामूर्तिमन्त्रवर्णपदस्तुतिः
ॐ नमो भगवते दक्षिणामूर्तये मह्यं मेधां प्रज्ञां प्रयच्छ स्वाहा ।
ओमित्येकाक्षरं ब्रह्म व्याहरन्ति त्रयश्शिखाः ।
तस्मै तारात्मने मेधादक्षिणामूर्तये नमः ॥ १॥
नत्वायं मुनयस्सर्वे परं यान्ति दुरासदम् ।
नकाररूपिणे मेधादक्षिणामूर्तये नमः ॥ २॥
मोहजालविनिर्मुक्तो ब्रह्मविद् याति यत्पदम् ।
मोकाररूपिणे मेधादक्षिणामूर्तये नमः ॥ ३॥
भवमाश्रित्य यं विद्वान् भवे नह्यभवत् पुनः ।
भकाररूपिणे मेधादक्षिणामूर्तये नमः ॥ ४॥
गगनाकारवद्भान्तमनुभात्यखिलं जगत् ।
गकाररूपिणे मेधादक्षिणामूर्तये नमः ॥ ५॥
वटमूलनिवासो यो गुरूणां गुरुरव्ययः ।
वकाररूपिणे मेधादक्षिणामूर्तये नमः ॥ ६॥
तेजोभिर्यस्य सूर्योऽसौ कालकॢप्तिकरो भवेत् ।
तेकाररूपिणे मेधादक्षिणामूर्तये नमः ॥ ७॥
दक्षत्रिपुर कामारिः यः कालविषभञ्जकः ।
दकाररूपिणे मेधादक्षिणामूर्तये नमः ॥ ८॥
क्षिप्रं भवति वाक्सिद्धिः यन्नामस्मरणान्नृणाम् ।
क्षिकाररूपिणे मेधादक्षिणामूर्तये नमः ॥ ९॥
णाकारवाच्यो वस्सुप्तं सन्दीपयति मे मनः ।
णाकाररूपिणे मेधादक्षिणामूर्तये नमः ॥ १०॥
मूर्तयोह्यष्टधा यस्य जगज्जन्मादिकारणम् ।
मूकाररूपिणे मेधादक्षिणामूर्तये नमः ॥ ११॥
तत्त्वमसीतिवाक्येन गुरूणा यत्प्रबोधितः ।
तकाररूपिणे मेधादक्षिणामूर्तये नमः ॥ १२॥
येयं विदित्वा ब्रह्माद्या ऋषयो यान्ति निर्वृतिम् ।
येकाररूपिणे मेधादक्षिणामूर्तये नमः ॥ १३॥
महामौनी करे मालां मुद्रां संविन्मयीं दधन् ।
मकाररूपिणे मेधादक्षिणामूर्तये नमः ॥ १४॥
ह्यम्बिकामुखपद्मार्को हेयोपादेयवर्जितः ।
ह्यकाररूपिणे मेधादक्षिणामूर्तये नमः ॥ १५॥
मेधाप्रदानदक्षाय मेरुकोदण्डपाणये ।
मेकाररूपिणे मेधादक्षिणामूर्तये नमः ॥ १६॥
धामत्रयात्मनेत्राढ्य धूर्जटे धवल प्रभ ।
धाकाररूपिणे मेधादक्षिणामूर्तये नमः ॥ १७॥
प्रकृतेर्यत्परं ध्यात्वा तादात्म्यं याति वै मुनिः ।
प्रकाररूपिणे मेधादक्षिणामूर्तये नमः ॥ १८॥
ज्ञानिनोयमुपास्यन्ति तत्त्वातीतं चिदात्मकम् ।
ज्ञाकाररूपिणे मेधादक्षिणामूर्तये नमः ॥ १९॥
प्रज्ञा सञ्जायते यस्य ध्याननामार्चनादिभिः ।
प्रकाररूपिणे मेधादक्षिणामूर्तये नमः ॥ २०॥
यस्य स्मरणमात्रेण नरोमुच्येत बन्धनात् ।
यकाररूपिणे मेधादक्षिणामूर्तये नमः ॥ २१॥
छन्ना यस्या छविर्मेघे सूर्यवन्मायया विभोः ।
छकाररूपिणे मेधादक्षिणामूर्तये नमः ॥ २२॥
स्वान्तेविदां जडानां यो दूरे तिष्ठति चिन्मयः ।
स्वाकाररूपिणे मेधादक्षिणामूर्तये नमः ॥ २३॥
हार्दाकाशविलासाय हाटकाभशरीरिणे ।
हाकाररूपिणे मेधादक्षिणामूर्तये नमः ॥ २४॥
इति श्रीमेधादक्षिणामूर्तिमन्त्रवर्णपदस्तुतिः सम्पूर्णा ।
Proofread by Narendran Madathil