Nagakumarikabhih Kritam Shiva Stotram

 नागकुमारिकाभिः कृतं शिवस्तोत्रम् 

ववन्दुरथ ता बाला ज्ञात्वा लक्ष्मभिरीश्वरम् ।
तुष्ट्वुश्च प्रहृष्टास्याः सन्नकण्ठ्योऽतिगद्गदम् ॥ १०४॥

जय शम्भो जयेशान जय सर्वग सर्वद ।
जय त्रिपुरसंहर्तर्जयान्धकनिषूदन ॥ १०५॥

जय जालन्धरहर जय कन्दर्पदर्पहृत् ।
जय त्रैलोक्यजनक जय त्रैलोक्यवर्धन ॥ १०६॥

जय त्रैलोक्यनिलय जय त्रैलोक्यवन्दित ।
जय भक्तजनाधीन जय प्रमथनायक ॥ १०७॥

जय त्रिपथगापाथःप्रक्षालितजटातट ।
जय चन्द्रकलाज्योतिर्विद्योतितजगत्त्रय ॥ १०८॥

जय सर्पफणारत्नप्रभाभासितविग्रह ।
जयाद्रिराजतनयातपःक्रीतार्धदेहक ॥ १०९॥

जय श्मशाननिलय जय वाराणसीप्रिय ।
जयानन्दवनाध्यासि प्राणिनिर्वाणदायक ॥ २.७६.११०॥

जय विश्वपते शर्व शर्वरीपरिवर्जित ।
जय नृत्यप्रियेशोग्र जय गीतविशारद ॥ १११॥

जय प्रणवसद्वास जय धाम महानिधे ।
जय शूलिन्विरूपाक्ष जय प्रणतसर्वद ॥ ११२॥

विधिः सर्वविधिज्ञोऽपि न त्वां स्तोतुं विचक्षणः ।
वाचो वाचस्पतेर्नाथ त्वत्स्तुतौ परिकुण्ठिताः ॥ ११३॥

विदन्ति वेदाः सर्वज्ञ न त्वां नाथ यथार्थतः ।
मनतीह मनो न त्वामनन्तं चादिवर्जितम् ॥ ११४॥

नमस्तुभ्यं नमस्तुभ्यं नमस्तुभ्यं नमो नमः ।
त्रिलोचन नमस्तुभ्यं त्रिविष्टप नमोऽस्तु ते ॥ ११५॥

इति श्रीस्कादपुराणे काशीखण्डे पूर्वार्द्धे षट्सप्ततितमा- ध्यायान्तर्गतं
         नागकुमारिभिः कृतं शिवस्तोत्रं समाप्तम् ।

स्कन्दपुराण । काशीखण्ड । उत्तरखण्ड । अध्याय ७६/१०४-११५॥


skandapurANa . kAshIkhaNDa . uttarakhaNDa . adhyAya 76/104-115..

Proofread by PSA Easwaran