शेषकृता नागेश्वरशिवस्तुतिः
विश्वेश विश्व मदनान्तक विविश्वम्भरा-
धरणकारण शक्तिदायिन् ।
भर्गान्तकान्तक महेश्वर कृत्तिवासः
पाह्याशु माऽखिलजगत्सनकादिपाल ॥ १॥
पाहीश मामकधिया परिपाहि शम्भो
दक्षाश्वमेधविधि शिक्षण कामशत्रो ।
सुत्रामवज्रकरदारण चण्डिकेश
गोत्रात्मजासखसुजात पुरां निहन्तः ॥ २॥
पिनाकविलसत्करं दिवसनायकान्तर्गतम् ।
विनायकसुतप्रियं भजत नागनाथस्तुतम् ॥ ३॥
यामिनीरमणशोभिमस्तकं भामिनीविधृतसामिविग्रहम् ।
योगिनीगणकृतस्तुतिप्रियं मोहिनीपतिमुपास्महे शिवम् ॥ ४॥
चारुभूधरशिरोविहारिणं भोगिभोगकृतकण्ठभूषणम् ।
क्षिप्रदग्धपुरकामवैरिणं चन्द्रचूडचरणं भजेऽन्वहम् ॥ ५॥
॥ इति शिवरहस्यान्तर्गते शेषकृता नागनाथशिवस्तुतिः सम्पूर्णा ॥
- ॥ श्रीशिवरहस्यम् । भर्गाख्यः पञ्चमांशः । अध्यायः १८। ४०-४४॥
- .. shrIshivarahasyam . bhargAkhyaH panchamAMshaH . adhyAyaH 18. 40-44..
Notes:
Adishesha worships Naganatha Shiva।
The shlokas have been renumbered for readers' convenience.
Proofread by Ruma Dewan