श्रीनटराजराजपञ्चावरणस्तोत्रम्
श्रीगणेशाय नमः ।
श्रीचित्सभेशाय नमः ।
॥ श्रीचित्सभाध्यानम् ॥
वामाद्या नवशक्तयो यदुपरि श्रीस्वर्णकुम्भानवै-
वास्यां चिन्मयसंसदि प्रतनुते नृत्तं नटेशः सदा ।
तद्वामे नगजा रहस्यमपि तद्दक्षेऽस्ति चैदम्बरं
श्रीव्याघ्राङ्घ्रिपतञ्जली मुनिवरौ तत्पार्श्वयोः संस्थितौ ॥ १॥
॥ श्रीरहस्यध्यानम् ॥
श्रीचक्रादिविशेषयन्त्रघटितं भित्तिस्वरूपं सदाऽऽ-
नन्दज्ञानमयं नटेशशिवयोः सम्मेलनं बोधयत् ।
श्रीजाम्बूनदबिल्वपत्ररचितैर्मालागणैर्लक्षितं
कस्तूरीमसृणं चिदम्बरमिदं स्थानं रहस्यं नुमः ॥ २॥
॥ नव चक्राणि ॥
श्रीचक्रं शिवचक्रं च ध्वनिचक्रं च ताण्डवम् ।
सम्मेलनं श्रीललिताचक्रं चिन्तामणेस्तथा ।
गणेशस्कन्दयोश्चैव चक्रं ज्ञेयं नवात्मकम् ॥ ३॥
॥ श्रीनटराजराजमूर्तिध्यानम् ॥
सप्तार्णवपरिक्षेपां द्वीपैस्सप्तभिरावृताम् ।
पञ्चाशत्कोटिविस्तीर्णां ध्यायेत्सर्वां सभां महीम् ॥ ४॥
तस्याश्च हृदयाम्भोजे मातृकाक्षरकेसरम् ।
ध्यायेदष्टदलं धीमान् महीहृदयपङ्कजम् ॥ ५॥
तस्य मध्ये त्रिकोणे तु तरुणेन्दु शिखामणिम् ।
चारुदीर्घजटापाशं चलद्भोगीन्द्रकुण्डलम् ॥ ६॥
त्रिपुण्ड्रविलसत्भालं चन्द्रार्कानललोचनम् ।
वामभागे स्थितां देवी लक्षयन्तमपाङ्गतः ॥ ७॥
अधरोल्लङ्घनाकारसन्दिहानस्मिताङ्कुरम् ।
कस्तूरिकासितोद्दामकालकूटलसद्गलम् ॥ ८॥
महाडमरुकाप्तोर्ध्वदक्षपाणिसरोरुहम् ।
तदन्यकरपद्मान्तर्ज्वलदुच्छिखपावकम् ॥ ९॥
दक्षाधः करपद्मेन हरन्तं प्राणिनां भयम् ।
विक्षिप्तान्यकरं तिर्यक् कुञ्चितेनाङ्घ्रिणा स्वयम् ॥ १०॥
वामेतरप्रकोष्ठान्तनृत्यत्फणधरेश्वरम् ।
कल्पब्रह्मकपालानां मालया लम्बमानया ॥ ११॥
स्वातन्त्र्यमात्मनो रूपं आचक्षाणं स्वभावतः ।
व्याघ्र चर्माम्बरधरं कटिसूत्रित पन्नगम् ॥ १२॥
दक्षपादाब्जविन्यासात् अधः कृततमोगुणम् ।
भस्मोद्धूलितसर्वाङ्गं परमानन्दताण्डवम् ।
एवं ध्यायेत् परेशानं पुण्डरीकपुरेश्वरम् ॥ १३॥
॥ श्रीशिवकामसुन्दरीध्यानम् ॥
ततस्स्वर्णनिभां देवीं विद्युल्लेखेव भास्वराम् ।
नीवारशूकवत्तन्वीं पीतां भास्वत्तनूपमाम् ॥ १४॥
स्वेच्छापङ्कजमध्यस्थां स्वेच्छाकल्पितविग्रहाम् ।
सद्विनेत्रां चतुर्हस्तां मध्ये सूक्ष्मां स्तनोन्नताम् ॥ १५॥
नितम्बतटविस्तीर्णां श्यामां नीलालकान्विताम् ।
हारकेयूररशनामेखलाद्युपशोभिताम् ॥ १६॥
स्फुरन्मकुटमाणिक्यकिङ्किणीरवशोभिताम् ।
दुकूलवसनोपेतां किञ्चित्प्रहसिताननाम् ॥ १७॥
अनौपम्यगुणां सौम्यां महासात्विकरूपिणीम् ।
दक्षिणोर्ध्वकराब्जेन चाक्षमालाधरां शिवाम् ॥ १८॥
वामेनोर्ध्वकराब्जेन शुकवत्सधरां पराम् ।
दक्षाधःकरपद्मेन फुल्लकल्हारधारिणीम् ॥ १९॥
लम्बितान्यकराब्जेन कटिदेशे समन्विताम् ।
ब्रह्मविष्ण्विन्द्रमकुटैः सन्धर्षितपदाम्बुजाम् ।
एवं ध्यायेत् परेशानीं पुण्डरीक पुरेश्वरीम् ॥ २०॥
॥ श्रीनटेशप्रथमावरणदेवतास्तोत्रम् ॥
पञ्च ब्रह्मदेवताः -
ॐ अघोरायनमः । ॐ ईशानाय नमः । ॐ तत्पुरुषाय नमः ।
ॐ वामदेवाय नमः । ॐ सद्योजाताय नमः ।
ॐ अघोराय नमः ॥
अघोरमञ्जनाभासं दधतं वह्निडिण्डिमौ ।
वराभयकरं दंष्ट्राभीमवक्त्रं महोज्ज्वलम् ॥ २१॥
नीलवस्त्र परिताङ्गं नीलोत्पलविभूषितम् ।
ज्वालाकेशोग्ररूपं च सोष्णीषं यज्ञसूत्रकम् ॥ २२॥
भस्मरुद्राक्षशोभाढ्यं वीरमासनसंस्थितम् ।
मौलौचन्द्रधरं श्यामं कुण्डलालङ्कृतं परम् ॥ २३॥
बभ्रूश्मश्रूशिरोजं च दंष्ट्रालं विकृताननम् ।
कपालमालाभरणं सर्पवृश्चिक भूषणम् ॥ २४॥
खट्वाङ्गकं कपालं च खेटकं पाशमेव च ।
वामहस्त चतुष्के तु दक्षहस्त चतुष्टये ॥ २५॥
त्रिशूलं परशुं खड्गं दण्डञ्चारिविमर्दनम् ।
देवं नवाम्बुदाभासं अघोरं सर्वकामदम् ।
यस्मात्परं न घोरोऽन्यः तं नमामि महेश्वरम् ॥ २६॥
कालाभ्रभ्रमराञ्जनद्युतिनिभं व्यावृत्तपिङ्गेक्षणं
कर्णोद्भासितभोगिमस्तकमणिप्रोद्भिन्नदंष्ट्राङ्कुरम् ।
सर्पप्रोतकपालशुक्तिशकलव्याकीर्णताशेखरं
वन्दे दक्षिणमीश्वरस्य वदनं चाथर्वनादोदयम् ॥ २७॥
कुठारखेटाङ्कुश शूलढक्कारुद्राक्षमालाग्निवरान् दधानः ।
चतुर्मुखो नीलरुचिस्त्रिणेत्रः पायादघोरो दिशि दक्षिणस्याम् ॥ २८॥
२. ॐ ईशानाय नमः ।
शुद्धस्फटिकसङ्काशं शुभवक्त्रं त्रिलोचनम् ।
साभयं वरदं चैव वज्रशूलधरं शिवम् ॥ २९॥
श्वेतवस्रपरीताङ्गं श्वेतमाल्यैर्विभूषितम् ।
रुद्राक्षमालाभरणं त्रिपुण्ड्राद्युपशोभितम् ॥ ३०॥
यज्ञसूत्रसमायुक्तं श्वेतोष्णीषविराजितम् ।
नागाभरणसंयुक्तं ऊर्ध्वमीशानकं स्मरेत् ॥ ३१॥
स्फटिकाभं जगद्धेतुं त्रिणेत्रं चन्द्रमौलिनम् ।
सौम्यं प्रसन्नमीशानं त्रिशूलाभयधारिणम् ।
वन्दे समस्तलोकस्य कारणं परमेश्वरम् ॥ ३२॥
व्यक्ताव्यक्तनिरूपितं च परमं षट्त्रिंशतत्त्वाधिकं
तस्मादुत्तरतत्त्वमक्षरमिति ध्येयं सदा योगिभिः ।
ओङ्कारादिसमस्तमन्त्रजनकं सूक्ष्मातिसूक्ष्मं परं
वन्दे पञ्चममीश्वरस्य वदनं खव्यापि तेजोमयम् ॥ ३३॥
वेदाभयेष्टाङ्कुश टङ्कपाशकपालढक्काक्षरशूलपाणिः ।
सितद्युतिः पञ्चमुखोऽवतान्मां ईशान ऊर्ध्वं परमप्रकाशः ॥ ३४॥
३. ॐ तत्पुरुषाय नमः ।
पुरुषं कुङ्कुमाकारं वरदाभीतिहस्तकम् ।
खड्ग परशुसंयुक्तं जटामकुटशोभितम् ॥ ३५॥
रक्तवस्रपरीताङ्गं सोष्णीषयज्ञसूत्रकम् ।
प्रसन्नवदनं सौम्यं रक्तपद्मोपशोभितम् ॥ ३६॥
नेत्रत्रयसमायुक्तं पूर्वास्यं च चतुर्मुखम् ।
सर्वाभीष्टप्रदं वन्दे सर्वदा सुखदायकम् ॥ ३७॥
स्फटिकाभं जगद्धेतुं त्रिनेत्रं चन्द्रमौलिनम् ।
भजे तत्पुरुषं कान्तं त्रिशूलाभयधारिणम् ॥ ३८॥
संवर्ताग्नितटित्प्रदीप्तकनकप्रस्पर्धितेजोऽरुणं
गम्भीरध्वनिसामवेदजनकं ताम्राधरं सुन्दरम् ।
अर्धेन्दुद्युतिलोलपिङ्गलजटाभारप्रबद्धोदकं
वन्दे सिद्धसुरासुरेन्द्रनमितं पूर्वं मुखं शूलिनः ॥ ३९॥
प्रदीप्तविद्युत्कनकावभासो विद्यावराभीतिकुठारपाणिः ।
चतुर्मुखस्तत्पुरुषस्रिणेत्रः प्राच्यां स्थितो रक्षतु मामजस्रम् ॥ ४०॥
४. ॐ वामदेवाय नमः ।
वामदेव महादेवं वरदाभयहस्तकम् ।
नागघण्टारवोपेतं रक्ताङ्गं रक्तलोचनम् ॥ ४१॥
भस्मरुद्राक्षशोभाढ्यं यज्ञसूत्रविराजितम् ।
तुङ्गनासं च सोष्णीषं मन्दहासमुखान्वितम् ॥ ४२॥
रक्तपद्मासनासीनं माल्यवस्रोपशोभितम् ।
वन्दे वाञ्छितलाभाय सर्वाभीष्टफलप्रदम् ॥ ४३॥
वामदेवं सुरक्ताभं माल्यवस्रोपवीतकम् ।
ध्यायेत् शिवं शिवानाथं खड्गखेटकधारिणम् ॥ ४४॥
गौरं कुङ्कुमपङ्किलं सुतिलकं आपाण्डुगण्डस्थलं
भ्रूविक्षेपकटाक्षवीक्षणलसत्संसक्तकर्णोत्पलम् ।
स्निग्धं बिम्बफलाधरं प्रहसितं नीलालकालङ्कृतं
वन्दे याजुषवेदघोषजनकं वक्त्रं हरस्योत्तरम् ॥ ४५॥
वराक्षमालाऽभयटङ्कहस्तः सरोजकिञ्जल्कसमानवर्णः ।
त्रिलोचनः चारु चतुर्मुखो मां पायादुदीच्यां दिशि वामदेवः ॥ ४६॥
५. ॥ ॐ सद्योजाताय नमः ॥
सद्योजातं च गोक्षीरसङ्काशमतिसुन्दरम् ।
वरदाभयहस्तं च पाशाङ्कुशधरं शिवम् ॥ ४७॥
यज्ञसूत्रसमायुक्तं भस्मरुद्राक्षभूषितम् ।
सितस्रग्गन्धभूषाढ्यं सितोष्णीषं सिताम्बरम् ॥ ४८॥
सौम्यं मौलीन्दुसम्पन्नं बालाकारं त्रिलोचनम् ।
सर्वलक्षणसम्पन्नं सद्योजातं विभावये ॥ ४९॥
सद्योजातं महादेवं ऋग्वेदप्रियमीश्वरम् ।
सर्वलक्षणसम्पन्नं शिवया सहितं भजे ॥ ५०॥
प्रालेयामलमिन्दुकुन्दधवलं गोक्षीरफेनप्रभं
भस्माभ्यङ्गमनङ्गदेहदहनज्वालावलीलोचनम् ।
विष्णुब्रह्ममरुद्गणार्चितपदं चर्ग्वेदनादोदयं
वन्देऽहं सकलं कलङ्करहितं स्थाणोर्मुखं पश्चिमम् ॥ ५१॥
कुन्देन्दुशङ्खस्फटिकावभासो वेदाक्षमालावरदाभयाङ्कः ।
त्र्यक्षश्चतुर्वक्त्र उरुप्रतापः सद्योऽधिजातोऽवतु मां प्रतीच्याम् ॥ ५२॥
अङ्गन्यासदेवताः
ॐ अस्राय नमः । ॐ कवचाय नमः । ॐ नेत्रत्रयाय नमः ।
ॐ शिखायै नमः । ॐ शिरसे नमः । ॐ हृदयाय नमः ।
१. ॐ अस्त्राय नमः ।
सम्प्रोक्ता असवः प्राणाः त्रायते हि च तान् सदा ।
प्राणानां त्राणहेतोश्च अस्त्रमित्यभिधीयते ॥ ५३॥
यज्ञस्य रक्षणार्थाय विघ्नविध्वंसनाय च ।
अशुद्ध शुद्धकरणायास्रमद्य नमाम्यहम् ॥ ५४॥
शुद्धस्फटिकसङ्काशं पञ्चवक्त्रं ससोमकम् ।
वक्त्रे वक्त्रे त्रिणेत्रं च दशबाहुं सुशोभितम् ॥ ५५॥
दुकूलाभरणोपेतं भस्मरुद्राक्षभूषितम् ।
लसन्मौक्तिकसङ्काशं जटामकुटशोभितम् ।
दन्तपङ्क्तिलसद्वक्त्रं सौम्यमस्त्रं भजाम्यहम् ॥ ५६॥
विनास्त्रराजं न शिवस्य यात्रा विनास्त्रराजं न च मज्जनादि ।
विनास्त्रराजं न महो भवस्य तमस्त्रराजं प्रणमामि मूर्ध्ना ॥ ५७॥
२. ॐ कवचाय नमः
कवचं हृदयत्राणं अस्त्रशस्त्रनिवारकम् ।
अलङ्काराय सन्धार्यं कवचं समुदाहृतम् ॥ ५८॥
तस्मात्तद्ध्यानतः सर्वरक्षा भवति सर्वदा ।
कवचं शुभ्रवर्णं च एकवक्त्रं चतुर्भुजम् ॥ ५९॥
वरं कपालं वामे चाभयं शूलं च दक्षिणे ।
बिभ्राणं शूलनेत्रं च भस्मरुद्राक्षभूषितम् ।
सर्वाभरणसंयुक्तं वन्दे मालासुशोभितम् ॥ ६०॥
३. ॐ नेत्रत्रयाय नमः
सूर्याचन्द्रमसौ वह्निः शिवनेत्रत्रयं स्मृतम् ।
तस्मान्नेत्रत्रयं प्रोक्तं तद्ध्यानं च प्रकीर्तितम् ॥ ६१॥
तेन नेत्रप्रकाशः स्यात् काणत्वं च निवर्तते ।
निर्मलं नेत्ररूपं च नित्यं श्यामाब्जसन्निभम् ॥ ६२॥
एकास्यं च त्रिशूलाही हस्तयोर्दधतं शुभम् ।
श्यामवस्त्रपरीधानं नीलोत्पलविभूषितम् ॥ ६३॥
सौम्यास्यं सौम्यरूपं च सोमवत्प्रियदर्शनम् ।
नीलमेघसमाकारं दृक्क्रियेच्छात्मकं विभोः ॥ ६४॥
त्रितत्त्वरूपवह्न्यादिमण्डलत्रितयाक्षयम् ।
वन्देऽहमिष्टलाभाय जगन्नेतृत्वलक्षितम् ॥ ६५॥
४. ॐ शिखायै नमः ।
वामदेवाधिदैवत्या शिखा प्रोक्ता सदाशिवा ।
अलङ्कारशतैर्युक्ता कपर्द इति च स्मृता ॥ ६६॥
सा ब्रह्मणापि न ज्ञाता आकाशगमनेन च ।
तस्मात्सर्वोत्तमा ध्येया शिखावान्पुरुषो विभुः ॥ ६७॥
शिखां सिन्दूरवर्णाभां शुक्लवस्त्रोत्तरीयकाम् ।
त्रिनेत्रां जटिलां सव्ये कपालं वरमेव च ॥ ६८॥
शूलाभयं दधानां च वामे रुद्राक्षभूषिताम् ।
वन्देऽहं सर्वलाभाय उष्णीषसहितां शिवाम् ॥ ६९॥
५. ॐ शिरसे नमः ।
द्वादशान्तमिति प्रोक्तं शिर एव सनातनम् ।
सहस्राधिकनाडीनां समुदायोऽत्र वर्तते ॥ ७०॥
शिरः प्रधानं सर्वेषु अङ्गेषु परिकीर्तितम् ।
गङ्गापन्नगचन्द्राश्च शिवस्य शिरसि स्थिताः ॥ ७१॥
एवं ध्येयं शिरःस्थानं सर्वाधारं च कीर्तितम् ।
महादेवाधिदैवत्यं शिर एतदुदाहृतम् ॥ ७२॥
शिरः काञ्चनवर्णाभं एकवक्त्रं त्रिलोचनम् ।
वरं कपालं वामे च दक्षे शूलाभये वरे ॥ ७३॥
जटामकुटशोभाढ्यं भस्मपाण्डरविग्रहम् ।
सर्वाभरणसंयुक्तं सर्वमाल्यैरलङ्कृतम् ।
भजे मङ्गलसम्प्राप्त्यै सर्वश्रेष्ठं पुरातनम् ॥ ७४॥
६. ॐ हृदयाय नमः ।
हृदि अयं इति प्रोक्तः शिव एव सनातनः ।
शतं चैका हृदयस्य नाड्यः तासां मूर्धानमभिनिस्सृतैका ॥ ७५॥
देहमध्यस्थितं ह्येतत् जीवाधारमिति स्मृतम् ।
जीवो ब्रह्मैव नापरः परमात्मेत्युदाहृतः ॥ ७६॥
परमं च रहस्यं च बोधयत् एतदेव हि ।
हृदयं शिवदैवत्यं इति मन्त्रेण कीर्तितम् ॥ ७७॥
एवं च हृदयं ध्येयं ध्यानावस्थितचेतसा ।
हृदयं शुक्लवर्णाभं त्रिणेत्रं चैकवक्त्रकम् ।
शूलाभये सव्यहस्ते दक्षे वरकपालके ॥ ७८॥
कदलीपुष्पसङ्काशं हृदयं सर्वदेहिनाम् ।
तस्य मध्यस्थितं पद्मं अष्टपत्रं सकर्णिकम् ॥ ७९॥
वितस्तिमात्रं हृदयं कमलं चतुरङ्गुलम् ।
अष्टाङ्गुलप्रमाणान्तं नाभेरूर्ध्वं व्यवस्थितम् ॥ ८०॥
पद्मनालं नवद्वारं समन्तात् कण्टकान्वितम् ।
अङ्गुष्ठपर्वतुल्याऽत्र कर्णिका सा सकेसरा ॥ ८१॥
कर्णिकायां भवेत्सूर्यः तस्य मध्ये तु चन्द्रमाः ।
चन्द्रमध्ये भवेद्वह्निः सौरे चानाहतं स्मरेत् ॥ ८२॥
अमनस्कं च सोमे च शिवमग्नौ विभावयेत् ।
पूजाहोमसमाधीनां त्रिविधं मूर्तिभेदकम् ॥ ८३॥
अनाहतशिवे पूजा अमनस्कशिवं हुनेत् ।
शिवे विलीनकं कृत्वा समाधिं परिभावयेत् ॥ ८४॥
॥ द्वितीयावरणदेवताध्यानम् ॥
ॐ अनन्ताय नमः । ॐ एकनेत्राय नमः । ॐ एकरुद्राय नमः ।
ॐ त्रिमूर्तये नमः । ॐ शिखण्डिने नमः । ॐ शिवोत्तमाय नमः ।
ॐ श्रीकण्ठाय नमः । ॐ सूक्ष्माय नमः ।
१. ॐ अनन्ताय नमः ।
अनन्तेशं चतुर्वक्त्रं जटामकुटमण्डितम् ।
खण्डेन्दुमौलिनं गङ्गाधरं पद्मासनस्थितम् ॥ ८५॥
खड्गखेटधनुर्बाणकमण्डल्वक्षसूत्रकान् ।
वराभये च बिभ्राणं भस्मरुद्राक्षभूषितम् ॥ ८६॥
२. ॐ एकनेत्राय नमः ।
भृङ्गाभमेकनेत्रं च साक्षमालाकमण्डलुम् ।
खड्गखेटधनुर्बाणवरदाभयशूलकम् ॥ ८७॥
इन्दुगङ्गाधरं देवं प्रसन्नवदनान्वितम् ।
सर्वाभरणसंयुक्तं पङ्कजोपरि संस्थितम् ॥ ८८॥
३. ॐ एकरुद्राय नमः ।
एकरुद्रं शशाङ्काभं गङ्गाचन्द्रकलाधरम् ।
खड्गखेटधनुर्बाणानक्षमालां कमण्डलुम् ॥ ८९॥
पाशं शूलं च बिभ्राणं मन्दस्मितमनोहरम् ।
सर्वाभरणसंयुक्तं भस्मरुद्राक्षशोभितम् ॥ ९०॥
४. ॐ त्रिमूर्तये नमः ।
हिमाङ्गञ्च त्रिमूर्तिश्च जटामकुटशोभितम् ।
अभयाक्षवरान् खड्गं धनुर्बाणञ्च खेटकम् ।
गण्डिकाञ्च तथा शूलं दधानं पद्मसंस्थितम् ॥ ९१॥
५. ॐ शिखण्डिने नमः ।
शिखण्डिनं शुभ्रवर्णं खड्गखेटकसंयुतम् ।
धनुर्बाणसमायुक्तं वराभयसमन्वितम् ।
अक्षशूलधरञ्चैव भस्मरुद्राक्षभूषितम् ॥ ९२॥
६. ॐ शिवोत्तमाय नमः ।
शिवोत्तमं नीलवर्णं गङ्गाचन्द्रजटाधरम् ।
चापबाणवराभीतिखड्गखेटाक्षशूलकान् ॥ ९३॥
पाणिपद्मेष्वादधानं प्रसन्नास्यं त्रिनेत्रकम् ।
पद्मासने समासीनं सर्वाभरणभूषितम् ॥ ९४॥
७. श्रीकण्ठाय नमः ।
श्रीकण्ठं रक्तवर्णञ्च गङ्गासोमजटान्वितम् ।
अभयाक्षवरासींश्च खेटकं चापबाणकौ ॥ ९५॥
शूलं वहन्तं हस्तेषु कुण्डलाद्युपशोभितम् ।
रक्तवस्त्रपरीताङ्गं रक्तपद्मासने स्थितम् ॥ ९६॥
८. ॐ सूक्ष्माय नमः ।
रक्ताङ्गं सूक्ष्मदेहं च वराभयकरान्वितम् ।
शूलाक्षगण्डिकां चैव धनुर्बाणासिधारिणम् ।
पद्मासने समासीनं पद्ममालाविभूषितम् ॥ ९७॥
॥ तृतीयावरणदेवता ध्यानम् ॥
ॐ चण्डेश्वराय नमः । ॐ गौर्यै नमः । ॐ नन्दिने नमः । ॐ भृङ्गिने
नमः । ॐ महाकालाय नमः । ॐ विष्णवे नमः । ॐ वृषभाय
नमः । ॐ षण्मुखाय नमः ।
१. ॐ चण्डेश्वराय नमः ।
चण्डेश्वरः स्थाणुसमानतेजाः
रुद्रेण सङ्क्षिप्तसमस्तभारः ।
यस्य प्रसादात्सफला शिवार्चा
तं चण्डिकेशं प्रणमामि देवम् ॥ ९८॥
चण्डेश्वरं चतुर्बाहुं चतुर्वक्त्रं त्रिलोचनम् ।
दधतं कमण्डलुं शूलं अक्षसूत्रं परश्वधम् ॥ ९९॥
महोरगोपवीताढ्यं तन्निर्वर्तितकङ्कणम् ।
वन्दे नवाम्बुदाभासं समयादिनियामकम् ॥ १००॥
२. ॐ गौर्यै नमः ।
गौरीं च स्फटिकाभासां पुण्डरीकदलेक्षणाम् ।
त्रिणेत्रां चैकवक्त्रां च साभयां वरदान्विताम् ॥ १०१॥
मृगशूलसमायुक्तां सर्वाभरणभूषिताम् ।
सिंहोपरि स्थितां पीतां करण्डमकुटान्विताम् ।
देवीं सदा प्रपद्येऽहं मुक्तामालाविराजिताम् ॥ १०२॥
३. ॐ नन्दिने नमः ।
शूलाक्षमाले दधतं कराभ्यां
वामेतराभ्यां जटिलं त्रिणेत्रम् ।
द्वार्दक्षिणस्थां समवाप्य शाखां
रक्तस्मितं नन्दिनमाश्रयामि ॥ १०३॥
धर्मस्त्वं वृषरूपेण जगदानन्दकारकम् ।
अष्टमूर्तेरधिष्ठानं शिवतुल्यं सनातनम् ॥ १०४॥
चामीकराचलप्रख्यं सर्वाभरणभूषितम् ।
बालेन्दुमकुटं सौम्यं त्रिणेत्रं च चतुर्भुजम् ॥ १०५॥
मृगवेत्रधरं देवं चन्द्रनिम्बसमाननम् ।
सुयशापतिमीशस्य ध्यानैकनिरतं शुभम् ।
नमामि परया भक्त्या सर्वलोकैरभिष्टुतम् ॥ १०६॥
४. ॐ भृङ्गिने नमः ।
निर्मांसविग्रहो भृङ्गी श्वेतो दण्डाक्षसूत्रभृत् ।
नृत्यन् त्रिणेत्रः सशिखः देवालोकनतत्परः ॥ १०७॥
अर्धनारीश्वरशिवोरुमध्ये भ्रमरीकृतः ।
प्रदक्षिणं शिवं कुर्वन् अम्बया शापितः किल ॥ १०८॥
तस्मात् निर्मांसदेहोऽभूत् शिवध्यानैकनिश्चलः ।
तं वन्दे परमेशानभक्तवर्यं सनातनम् ॥ १०९॥
५. ॐ महाकालाय नमः ।
महेशसव्यस्थितकृष्णवर्णं नागोपवीतं जटिलं त्रिणेत्रम् ।
कपालशूलान्वितवामदक्षकरं महाकालमहं प्रपद्ये ॥ ११०॥
त्रिणेत्रं पीतकृष्णाङ्गं बभ्रुश्मश्रुशिरोरुहम् ।
दण्डखड्गौ खेटशूले दधतं शिवरक्षकम् ।
महाकालं महात्मानं प्रणमामि सदा मुदा ॥ १११॥
६. ॐ विष्णवे नमः ।
विष्णुं चतुर्भुजं शङ्खगदाचक्राब्जहस्तकम् ।
नीलाम्बुधरसङ्काशं भस्मोद्धूलितविग्रहम् ।
रमया रममाणं च जगद्रक्षकमाश्रये ॥ ११२॥
श्रीमान् क्षीरार्णवान्तः फणिपति शयने चन्द्रखण्डातिगौरे
भूमानीलासमेतः सकलभुवन संरक्षणोपायचिन्तः ।
निद्राव्याजेन कुर्वन् निरवधिमहिमा नित्यमुक्ताभिवन्द्यः
शेते यः श्रीनिवासः प्रदिशतु सुतरां सन्ततं मङ्गलं नः ॥ ११३॥
७. ॐ वृषभाय नमः ।
रजतनिभशरीरं वेदपादं त्रिणेत्रं
अरुणमुदितशोभं श्याममुन्नम्रवक्त्रम् ।
विविधमणिविभूषं किङ्किणीशोभिकण्ठं
हरिहरविधिरूपं चादिदेवं वृषेशम् ॥ ११४॥
वृषं वृषपतिं त्र्यक्षं रुद्रैकगतमानसम् ।
साक्षात् धर्मस्वरूपं च शुद्धस्फटिकनिर्मलम् ।
वन्दे च शिवसेवायै शिवापरेति विश्रुतम् ॥ ११५॥
८. ॐ षण्मुखाय नमः ।
षड्वक्त्रं शिखिवाहनं त्रिणयनं चित्राम्बरालङ्कृतं
वज्रं शक्तिमसिं त्रिशूलमभयं खेटं धनुश्चक्रकम् ।
पाशं कुक्कुटमङ्कुशं च वरदं दोर्भिर्दधानं सदा
वन्दे सिद्धिदमीश्वरं शिवसुतं स्कन्दं सुराराधितम् ॥ ११६॥
उमाकोमलहस्ताब्ज सम्भावितललाटिकम् ।
महादेवगुरुं वन्दे कुमारं पुष्करस्रजम् ॥ ११७॥
॥ चतुर्थावरणदेवता ध्यानम् ॥
ॐ अग्नये नमः । ॐ इन्द्राय नमः । ॐ ईशानाय नमः । ॐ कुबेराय नमः ।
ॐ निरृतये नमः । ॐ ब्रह्मणे नमः । ॐ यमाय नमः ।
ॐ वरुणाय नमः । ॐ वायवे नमः । ॐ विष्णवे नमः ।
१. ॐ अग्नये नमः ।
सप्तार्चिषं च बिभ्राणं अक्षमालां कमण्डलुम् ।
ज्वालामालाकुलं रक्तं शक्तिहस्तं अजासनम् ॥ ११८॥
स्वाहादेवीसमायुक्तं स्वर्णवर्णमुपास्महे ।
२. ॐ इन्द्राय नमः ।
ऐरावतगजारूढं शचीजानिं किरीटिनम् ॥ ११९॥
सहस्रनयनं शक्रं वज्रपाणिं विभावये ।
३. ॐ ईशानाय नमः ।
ईशानं वृषभारूढं त्रिशूलव्यालधारिणम् ॥ १२०॥
पार्वतीस्कन्दविघ्नेशवीरभद्रयुतं शिवम् ।
शरचन्द्रनिभं वन्दे चन्द्रमौलिं त्रिलोचनम् ॥ १२१॥
४. ॐ कुबेराय नमः ।
कुबेरं मनुजासीनं सखर्वं खर्वविग्रहम् ।
पार्वतीशसखं देवं चित्रलेखापतिं शुभम् ।
स्वर्णच्छायं गदाहस्तं उत्तराशापतिं स्मरेत् ॥ १२२॥
५. ॐ निरृतये नमः ।
रक्तनेत्रं शवारूढं नीलोत्पल दलप्रभम् ॥ १२३॥
कृपाणपाणिमस्रौघं पिबन्तं राक्षसेश्वरम् ।
दीर्घादेवीसमायुक्तं यातुधानमहं भजे ।
६. ॐ ब्रह्मणे नमः ।
हंसारूढं चतुर्वक्त्रं सरस्वतीपतिमव्ययम् ।
रुद्राक्षपुस्तकाभीतिवरहस्तं विचिन्तये ॥ १२४॥
७. ॐ यमाय नमः ।
कृतान्तं महिषारूढं दण्डहस्तं भयानकम् ।
कालपाशधरं कृष्णं ध्यायेत् दक्षिणदिक्पतिम् ।
देव्यां श्यामलया युक्तं धर्मराजं महाबलम् ॥ १२५॥
८. ॐ वरुणाय नमः ।
नागपाशधरं सृष्टं रत्नौघद्युतिविग्रहम् ।
शशाङ्कं धवलं ध्यायेत् वरुणं मकरासनम् ।
कालिकापतिमीशानं हृदा ध्यायेत् जलाधिपम् ॥ १२६॥
९. ॐ वायवे नमः ।
आपीत हरितच्छायं विलोलध्वजधारिणम् ।
प्राणभूतञ्च भूतानां हरिणस्थं समीरणम् ।
अञ्जनापतिमीड्यं च सदा सञ्चारिणं भजे ॥ १२७॥
१०. ॐ महाविष्णवे नमः ॥
गरुडारूढं महाविष्णुं महालक्ष्मीधवं हरिम् ।
शङ्ख चक्रगदापद्मधरं वन्दे मनोहरम् ॥ १२८॥
॥ पञ्चमावरणदेवता ध्यानम् ॥
ॐ अङ्कुशाय नमः । ॐ खड्गाय नमः । ॐ गदायै नमः ।
ॐ चक्राय नमः । ॐ त्रिशूलाय नमः । ॐ दण्डाय नमः ।
ॐ पद्माय नमः । ॐ पाशाय नमः । ॐ वज्राय नमः । ॐ शक्तये नमः ।
१. ॐ अङ्कुशाय नमः ।
अङ्कुशं पुरुषं पीतं द्विभुजं च द्विनेत्रकम् ।
करण्डमकुटोपेतं ईषद्दंष्ट्रं कृताञ्जलिम् ।
पुष्पहस्तं पुनीतं च गजप्रेरकमाश्रये ॥ १२९॥
२. ॐ खड्गाय नमः ।
खड्गं च पुरुषं श्यामं द्विभुजं च द्विनेत्रकम् ।
करण्डमकुटोपेतं किञ्चित् दंष्ट्रासमन्वितम् ।
विष्णुहस्ते वीरभद्रकरे संस्थं नमाम्यहम् ॥ १३०॥
३. ॐ गदायै नमः ।
द्विनेत्रां द्विभुजां नीलां करण्डमकुटान्विताम् ।
सर्वाभरणसंयुक्तां गदां कर्णाकृतिं स्मरेत् ।
विष्णुहस्ते भीमहस्ते आञ्जनेयकरे स्थिताम् ॥ १३१॥
४. ॐ चक्राय नमः ।
नवीनाम्बुदसङ्काशं इन्दुसुन्दरविग्रहम् ।
चक्रं सतारसंयुक्तं मण्डलं हृदि भावये ।
विष्णुहस्ते तथा लक्ष्मीहस्ते स्थितं शुभम् ॥ १३२॥
५. ॐ त्रिशूलाय नमः ।
त्रिशूलः पुरुषो दिव्यो द्विनेत्रश्च कृताञ्जलिः ।
जीमूतसन्निभो रौद्रः किञ्चिद्दंष्ट्रो द्विबाहुकः ।
त्रिमूर्तिस्मारको यश्च तं वन्दे शिवहस्तगम् ॥ १३३॥
६. ॐ दण्डाय नमः ।
विद्युत्कान्तिप्रभं सूक्ष्मं दण्डं पुरुषरूपिणम् ।
कृताञ्जलिपुटोपेतं करण्डमकुटान्वितम् ।
सुब्रह्मण्यकरे संस्थं भजे दुष्टनिवारकम् ॥ १३४॥
७. ॐ पद्माय नमः ।
पद्मं कोशोज्वलं मौलिं शङ्खकुन्देन्दुसन्निभम् ।
महात्मशक्तिसंयुक्तं सर्वाभरणभूषितम् ।
पद्माकारं महाविष्णुलक्ष्मीहस्तस्थितं भजे ॥ १३५॥
८. ॐ पाशाय नमः ।
पाशः सप्तफणः सर्पः पुरुषः पुच्छसंयुतः ।
कृताञ्जलिपुटोपेतः द्विभुजश्च द्विलोचनः ॥
द्विजिह्व धर्मराजस्य यमस्य वरुणस्य च ।
करस्थः कीर्त्यते यश्च तं वन्दे देवरूपिणम् ॥ १३६॥
९. ॐ वज्राय नमः ।
वज्रं तु पुरुषाकारं मृडं कर्कशविग्रहम् ।
दधत्त्रिणेत्रं शक्तिं च करण्डमकुटान्वितम् ॥ १३७॥
१०. ॐ शक्तये नमः ।
स्त्रीरूपां त्रिगुणाकारां किञ्चिद्दंष्ट्रासमन्विताम् ।
द्विनेत्रां द्विभुजां शक्तिं करण्डमकुटान्विताम् ।
सुब्रह्मण्यकरे संस्थां वन्दे शक्तिप्रदायिनीम् ॥ १३८॥
इति श्री भृङ्गिरिटिसंहितायां पञ्चावरणस्तोत्रं समाप्तम् ।
Proofread by Aruna Narayanan