Shri Namashshiva Ashtakam

 श्रीनमश्शिवाष्टकम् १ 
संसारदावानलशामकाय
      मृत्युञ्जयायामितविक्रमाय ।
सुरासुरौघार्चितपादुकाय
      शिवासमेताय नमः शिवाय ॥ १॥

कुन्देन्दुशङ्खस्फटिकोपमाय
      महेश्वरायाश्रितवत्सलाय ।
श्रीनीलकण्ठाय यमान्तकाय
      शिवासमेताय नमः शिवाय ॥ २॥

भुजङ्गचक्राधिपभूषणाय
      नानामणिभ्राजितकुण्डलाय ।
कर्पूरगौराय सुरेश्वराय
      शिवासमेताय नमः शिवाय ॥ ३॥

घोराधिकाघौघनिवारणाय
      स्वर्गापवर्गादिफलप्रदाय ।
निरामयायान्धकसूदनाय
      शिवासमेताय नमः शिवाय ॥ ४॥

त्रिकाग्निकालाय मनोन्मनाय ।
      त्रियम्बकाय त्रिपुरान्तकाय ।
कालाग्निरुद्राय जगन्मयाय
      शिवासमेताय नमः शिवाय ॥ ५॥

दयासमुद्राय निधीश्वराय
      धनेशमित्राय सुधामयाय ।
कारुण्यरूपाय मनस्कराय
      शिवासमेताय नमः शिवाय ॥ ६॥

ब्रह्मेन्द्रविष्ण्वादिसुरार्चिताय
      देवादिदेवाय दिगम्बराय ।
अनन्तकल्याणगुणार्णवाय
      शिवासमेताय नमः शिवाय ॥ ७॥

वेदान्तवेद्याय जगन्मयाय
      कैलासवासाय शिवाधराय ।
शिवस्वरूपाय सदाशिवाय
      शिवासमेताय नमः शिवाय ॥ ८॥

इति स्तुत्वा महादेवं सर्वव्यापिनमीश्वरम् ।
पुनः पुनः प्रणम्याथ स्कन्दस्तस्थौ कृताञ्जलिः ॥ ९॥

॥ इति श्रीनमश्शिवाष्टकं सम्पूर्णम् ॥


Proofread by Aruna Narayanan