निराश्रयाष्टकम्
हे नीलकण्ठ प्रियदेवदेव
कैलासवासिन्नटराजराज ।
गौरीपते हे करुणावतार
निराश्रयं मां जगदीश रक्ष ॥ १॥
हे लिङ्गराजेश्वर विश्वनाथ
श्मशानवासिन्भवभीतिहन्त ।
हे रोगशोकापह मुक्तिदातः
निराश्रयं मां जगदीश रक्ष ॥ २॥
हे व्याघ्रचर्मावृतयोगिराज
कारुण्यपात्राखिललोकबन्धो ।
मुक्तेश्वर प्रेममयादिदेव
निराश्रयं मां जगदीश रक्ष ॥ ३॥
हे पार्वतीवल्लभवामदेव
त्रिशूलधारिन् शवभस्मलिप्त ।
मृत्युञ्जयग्रामपते महात्मन्
निराश्रयं मां जगदीश रक्ष ॥ ४॥
हे वीरभद्राकृतिमान्महेश
दक्षाध्वरध्वंसकभूतपाल ।
ॐकारशब्दामृतशीतसिन्धो
निराश्रयं मां जगदीश रक्ष ॥ ५॥
हे विश्वकर्मन् सुरसौरदीप्त
त्रैगुण्यमूर्ते शिवपारकारिन् ।
विद्योतविश्वेश्वरसार्वभौम
निराश्रयं मां जगदीश रक्ष ॥ ६॥
हे पालभूगोलगलासुनील
गौराङ्गदीप्तोज्ज्वललोलभोल ।
कपालमालाधरनन्दिकेश
निराश्रयं मां जगदीश रक्ष ॥ ७॥
हे रुद्र आखण्डल सुन्दरास्य
त्रैलोक्यनाथ श्रितरक्षदक्ष ।
अद्वैतसिद्धेश्वर नन्दनाथ
निराश्रयं मां जगदीश रक्ष ॥ ८॥
इति नन्दप्रदीप्तकुमारविरचितं निराश्रयाष्टकं समाप्तम् ।
Composed, encoded, and proofread by
Dr. Pradipta Kumar Nanda, Kendrapara, Orisa pknanda65 at gmail.com