Shri Parameshvara Ashtakam

 श्रीपरमेश्वराष्टकम् 
पङ्कजासनपद्मलोचनसद्गुरोऽतुलपावन
      वैभवाश्रितपारिजातक पाहि मां परमेश्वर ।
कामितार्थदपादपङ्कज कालकाल जगद्गुरो
      कुन्दभूरुहमन्दिरेश्वर सन्ददस्व मदीप्सितम् ॥ १॥

कारणत्रयमूल बालशशाङ्कखण्डशिरोमणे
      कार्मुकीकृतशीतगुम्फधराधरेन्द्र जगन्मणे ।
लोचनीकृतशीतरश्मि कृपीटयोनि नभोमणे
      कुन्दभूरुहमन्दिरेश्वर सन्ददस्व मदीप्सितम् ॥ २॥

कैटभारिशिलीमुखातुलकाश्यपीरथ धूर्जटे
      कल्पितावस कामितार्थप्रदान गौरनदीतटे ।
व्यालभूषणजालशोभित व्याघ्रचर्मलसत्कटे
      कुन्दभूरुहमन्दिरेश्वर सन्ददस्व मदीप्सितम् ॥ ३॥

वीतिहोत्रसुतीर्थतीरविहार विश्वधुरन्धर
      वीरवर्य विरिञ्चिसन्नुत वृक्षरूपकलेवर ।
नीतिपेशलमानसाम्बुजनित्यवास महाप्रभो
      कुन्दभूरुहमन्दिरेश्वर सन्ददस्व मदीप्सितम् ॥ ४॥

विध्यदृष्टसुशीर्षशोभित विष्ण्वदृश्यपदाम्बुज
      निर्जरद्रुमपुष्पजालसुगन्धितस्वदिगन्तरे ।
मित्रवह्निशशीमरुज्जलयज्वखावनिकाकृते
      कुन्दभूरुहमन्दिरेश्वर सन्ददस्व मदीप्सितम् ॥ ५॥

कालनीरदनीलकन्धर शूलपाशधराद्य मां
      पालयाखिलवैभवाजकपालभृत्करपङ्कज ।
कालगर्वहरान्धकान्तक कृत्तिवासक धूर्जटे
      कुन्दभूरुहमन्दिरेश्वर सन्ददस्व मदीप्सितम् ॥ ६॥

कुन्दभूरुहमूलमृत् तव जन्ममृत्युजराधिहा
      कोटिजन्मकृताघसंहृतिदीक्षिता भवभेषजी ।
तादृगद्भुतकुन्दभूरुहदर्शनादपवर्गकृत्
      कुन्दभूरुहमन्दिरेश्वर सन्ददस्व मदीप्सितम् ॥ ७॥

नामरूपविहीन निर्गुण निष्कलङ्क महामहः
      प्राणनाथ परात्पराच्युत कारणत्रयकारण ।
नादबिन्दुकलास्वरूप सहस्रपत्रनिकेतन
      कुन्दभूरुहमन्दिरेश्वर सन्ददस्व मदीप्सितम् ॥ ८॥

पर्वतेन्द्रसुताकृतं परमेश्वराष्टकमद्भुतं
      पावनं परमार्थदं परमात्मनायकसन्निधौ ।
भक्तियुक्तमनाः पठेद्यदि दुर्लभं परमं पदं
      प्राप्य निर्वृतिमेत्य शाश्वत एव तत्र वसेदसौ ॥ ९॥

इति पार्वतीकृतं श्रीपरमेश्वराष्टकं सम्पूर्णम् ।


Proofread by Mohan Chettoor, Aruna Narayanan