प्रतिमासकृते शिवस्तुतिः
(शिवरहस्यान्तर्गते महादेवाख्ये)
- शिवगौरीसंवादे -
ईश्वर उवाच ।
त्वयैव सृष्टमखिलं त्वय्येव सकलं स्थितम् ।
त्वया संह्रियते विश्वं प्रधानपुरुषात्मकम् ॥ ५५॥
त्वमेव पुरुषोऽनन्तः प्रधानं प्रकृतिस्तथा ।
भूमिरापोऽनलो वायुर्व्योमाहङ्कारमेव च ॥ ५६॥
यस्य रूपं नमस्यामि भवं त्वां ब्रह्मसम्भवम् ।
यस्य द्यौरभवन्मूर्धा पादौ पृथ्वी दिशोभुजः ॥ ५७॥
आकाशमुदरं तस्मै विराजे ते नमोनमः ।
हव्यं वहति यो नित्यं रौद्राग्नेयवपुश्च यः ॥ ५८॥
कव्ये पितृगणानां च तस्मै वह्न्न्यात्मने नमः ।
आप्याययति यो देवः स्वधाम्ना सकलं जगत् ॥ ५९॥
सोमः सोमात्मने तुभ्यमोषधीशात्मने नमः ।
बिभर्त्यशेषभूतानि योऽन्तश्चरति सर्वगः ॥ ६०॥
शक्तिर्माहेश्वरी साक्षात्तस्मै वाय्वात्मने नमः ।
सृजत्यशेषमेवेदं यस्य कर्मानुरूपतः ॥ ६१॥
स्वात्मन्येव स्थितं चैतत् चतुर्वक्त्रात्मने नमः ।
यः शेतेऽप्सु शिवं ध्यायन् पालयत्यखिलं जगत् ॥ ६२॥
नमो विश्वात्मने तुभ्यं विष्णवे पालनात्मने ।
यः संहरेज्जगज्जालं शूलेनैकेन शङ्करि ॥ ६३॥
तस्मै रुद्रात्मने तुभ्यं नमस्तेऽस्तु पिनाकिने ।
यं विनिद्रा जितश्वासाः पश्यन्ति परमेश्वरम् ॥ ६४॥
ज्योतिः पश्यन्ति युञ्जानास्तस्मै सर्वात्मने नमः ।
इति स्तवं प्रयुञ्जीत सर्वमासेषु शङ्करि ॥ ६५॥
मासपूजामिमां कृत्वा संवत्सरमतन्द्रितः ।
न स भूयोऽपि जायेत संसारे दुःखसागरे ॥ ६६॥
॥ इति शिवरहस्यान्तर्गते ईश्वरप्रोक्तं प्रतिमासकृते शिवस्तुतिः सम्पूर्णा ॥
- ॥ श्रीशिवरहस्यम् । महादेवाख्यः एकादशमांशः । अध्यायः २५ फाल्गुनमासार्चनम् । ५५-६६॥
- .. shrIshivarahasyam . mahAdevAkhyaH ekAdashamAMshaH . adhyAyaH 25 phAlgunamAsArchanam . 55-66..
Notes:
Śiva शिव; having detailed to Devī देवी; about His Worship during respective māsa मास in the ŚivaRahasyaṃ Mahādevākhyaḥ Ekādaśamāṃśaḥ Adhyāyaḥ 13-25 शिवरहस्यं महादेवाख्यः एकादशमांशः अध्यायः १३-२५, concludes with advising a ŚivaStutiḥ शिवस्तुतिः that can be recited in all māsa मास।
Proofread by Ruma Dewan