प्रतिमासे शिवार्चनफलोपदेशम्
(शिवरहस्यान्तर्गते महादेवाख्ये)
- शिवगौरीसंवादे -
चैत्रमासे शिवार्चनफलोपदेशम् -
स्कन्द उवाच ।
चैत्रे त्रिणेत्रपदपूजनकृद्वरिष्ठ-
श्चित्रैश्चपातकवरैः स हि मुक्त एव ।
सत्रातिरात्रशतकादपि पुण्यभाक् स्या-
त्पुत्रादिमित्रसुकलत्रयुतो भुविस्थः ॥ १४.६६॥
वैशाखमासे शिवार्चनफलोपदेशम् -
ईश्वर उवाच ।
विशाखे वैशाखे शिखिविशिखनेत्रार्चनपरो
मखानां सर्वेषां किल सुख(फल)मवाप्योन्नतमुखः ।
विशाखर्क्षे यो मां भजति वरदुःखोऽपि च नरो-
ऽवरो भूयात्सत्यं गिरिवरसुते मय्यभिमुखः ॥ १५.७७॥
विशाखे वैशाख्यां यदि सुकृतभाजोऽपि मनुजा
द्विजा ये शाखान्तप्रथितपदपूजासु निरताः
परं भस्मछन्नाः शिवतरमहाधामकलनाः
शिवेदध्नः पुण्यं त्वधहरमहाकम्बलमुमे
मम प्रीत्यै दद्युः प्रकटतरभक्त्यैव सुजनाः ॥ १५.७८॥
ज्येष्ठमासे शिवार्चनफलोपदेशम् -
ईश्वर उवाच ।
सदा कालकालं हृदा भावयन्तः
कृतान्ताद्भयं सन्त्यजन्त्येव सन्तः ।
मुदा बिल्वपत्रैः शिवं पूजयन्तः
भिदा नैव पश्यन्ति लोकं प्रशान्ताः ॥ १६.८०॥
ज्येष्ठे विशिष्टशिपिविष्टसदिष्टलिङ्ग
सम्पूकोऽष्टाकृतिवल्लभः स्यात् ।
दुष्टः कनिष्ठोऽपि च कुष्ठिताङ्गो
रुष्टश्च मद्भक्तवरो विशिष्टः ॥ १६.८१॥
आषाढमासे शिवार्चनफलोपदेशम् -
not specified in source text
श्रावणमासे शिवार्चनफलोपदेशम् -
स्कन्द उवाच ।
यः श्रावणेऽनिलसुपारणपूरणस्य
लिङ्गानि पार्थिवमयानि च सोमवारे ।
त्र्यक्षं क्षणप्रथितदोषहरेऽपि मासि
नक्ताशनो यदि भवेत्तपसा स मुक्तः ॥ १८.८२॥
पवित्राणि चित्राणि दत्वा त्रिणेत्रे
विचित्राणि पापानि नाशं प्रयान्ति ।
सुपुत्रैः कलत्रैर्युतः सर्वसत्रैः
फलं यच्च तच्चाप्नुयाद्देवि सत्यम् ॥ १८.८३॥
यः श्रावणे शशिविभूषणतुङ्गलिङ्गं
त्यक्तेषणोऽर्चितनरो धिषणोपमानः ।
स्नात्वाशिवे त्रिषवणं निशि सोमवारे
तन्मासि शङ्करगणो भविताग्रगण्यः ॥ १८.८४॥
भाद्रपदमासे शिवार्चनफलोपदेशम् -
स्कन्द उवाच ।
भाद्रेपदे भद्रपदं समर्च्य(र्चयन्)
रुद्रं दरिद्रो न स जातु भूयात् ।
सुवीरभद्रादिसमर्चितः स्या-
भद्राणि सर्वाणि लभेदतन्द्रः ॥ १९.७१॥
उमाकान्तं शान्तो भजति भवतान्तो द्विजगणः
कृतान्ताद्वा भीतः श्रुतिशिरसिभातं यमधनः ।
वसन्ते हेमन्ते कुसुमितदिनान्तेऽर्चति शिवं
अहोवर्षास्विष्टं भजति वरभाग्यैश्च निपुणः ॥ १९.७२॥
अश्वायुजमासे शिवार्चनफलोपदेशम् -
ईश्वर उवाच ।
पूजितो ब्रह्मविष्ण्वाद्यैः शक्रद्यैर्मुनिभिः सह ।
मासे चाश्वयुजि प्रसन्नहृदयो यो मां समर्च्यादरात् ।
सोऽयं संलभते मदीयमगजे लोकं च भक्त्यादरात्
स यायान् भविता जनेषु सुमहान् इज्यायुतानां फलं
भूयस्तस्य भवन्ति भूमिपतयः प्राज्यं स राज्यं लभेत् ॥ २०.७८॥
कार्तिकमासे शिवार्चनफलोपदेशम् -
ईश्वर उवाच ।
काञ्चनेन विमानेन वंश कोटिसमन्वितः ।
याति मत्सदनं देवि कैलासं दैवदुर्लभम् ॥ २१.७७॥
आर्तिक्यं कार्तिके यत्स्यात्कीर्तिदं तत्त्रिलोकके ॥ २१.७८॥
वर्तिं कुर्याद्योघृताक्तां प्रदीप्तां
पूजाकाले यः सकृच्छङ्करस्य ।
इष्टीरिष्ट्वा यत्फलं प्राप्नुयाद्वै
तल्लब्ध्वासौ याति शम्भौः पदं मे ॥ २१.७९॥
ऊर्जे स्फूर्जद्धूर्जटेर्लिङ्गमीक्ष्य
सायं सोमे वासरे पापसङ्घम् ।
गर्जन्त्येवं तर्जिता सोमदूता
वर्जन्त्येनं ते नरास्तूर्जिता हि ॥ २१.८०॥
पर्वण्युमानाथमखर्वपुण्यदं
दूर्वाभिरेवार्च्य सुपर्ववन्द्यम् ।
और्वानलेद्धस्त्विव पापनीर-
शेषो भवेत्पर्वतराजपुत्रि ॥ २१.८१॥
धात्रीपत्रैः पूजनं तूर्जमासि
तद्वै धर्त्रीप्रीति दातुः फलं हि ।
ते सावित्रीजापिनां संसवित्री-
भावं प्राप्ता गुह्यमेतत् शृणुष्व ॥ २१.८२॥
मार्गशीर्षमासे शिवार्चनफलोपदेशम् -
ईश्वर उवाच ।
यो मार्गशीर्षे विधिशीर्षमाला-
चलल्लसद्वक्षसमार्द्रकर्क्षे ।
सम्पूज्य तन्मासि मुदा ममेशि
नृत्तं च संवीक्ष्य विमुक्तिमेति ॥ २२.७०॥
यो मार्गशीर्षेऽर्चनकृद्भवानि
स मुक्तिमार्गं लभते मनुष्यः ।
पुष्पैरपामार्गदलैर्मुदा युतो
न दुर्गमां याति गतिं मदाश्रयः ॥ २२.७१॥
पौष्यमासे शिवार्चनफलोपदेशम् -
ईश्वर उवाच ।
पौष्ये विशिष्य शिवलिङ्गसमर्चतेन
तिष्योद्भवं भयमुमे न लभेन्मनुष्यः
आयुष्यमेति शतकं भुवि शम्भुनाम
घुष्यन् प्रयाति सदनं मदनान्कर्तुः ॥ २३.९३॥
माघमासे शिवार्चनफलोपदेशम् -
ईश्वर उवाच ।
प्राज्याज्यादिभिरीशलिङ्गमगजे यो वाऽभिषिच्यादरात्
साम्राज्यं लभते किलैष भवहृच्चेज्यायुतानां फलम् ।
माघे मासे मघर्क्षे त्वघशतभयतो मुक्त एवेह भक्तः
कुर्याद्यो घृतकम्बलं विधियुतं भुक्त्वैव भोगं भुवि
प्राप्यान्ते प्रमथाधिपत्यमगजे शैलाधिनाथे मम ॥ २४.४६॥
फाल्गुनमासे शिवार्चनफलोपदेशम् -
ईश्वर उवाच ।
यः फाल्गुने मासि शिवार्चको नरो
न फल्गुपापैर्भयमेति शङ्करि ।
संवल्गते धाम शिवस्य याने
तं चान्तिमग्लानिमवाप्य मोदते ॥ २५.६७॥
मधुकम्बलकृच्च फाल्गुने
वरपर्वण्यगजे धुनोति पापम् ।
मुखेमेतत्किल हाय तस्य गौरि
प्रथिता पौर्णमसी विशिष्टमासि ॥ २५.६८॥
- -
पूजाविशेष मासेषु कथितां प्रीतिदां मम ॥ २५.५३॥
यः कुर्यान्मनुजः सद्यो मुच्यते भवबन्धनात् ।
स्तवीत परया भक्त्या देवदेवं महेश्वरम् ॥ २५.५४॥
॥ इति शिवरहस्यान्तर्गते प्रतिमासे शिवार्चनफलोपदेशं सम्पूर्णम् ॥
- ॥ श्रीशिवरहस्यम् । महादेवाख्यः एकादशमांशः । अध्यायः १३-२५ फाल्गुनमासार्चनम् । वावृत्तश्लोकाः ॥
- .. shrIshivarahasyam . mahAdevAkhyaH ekAdashamAMshaH . adhyAyaH 13-25 phAlgunamAsArchanam . vAvRRittashlokAH ..
Notes:
Śiva शिव details to Devī देवी; about His Worship during each māsa मास, are mentioned in the ŚivaRahasyaṃ Mahādevākhyaḥ Ekādaśamāṃśaḥ Adhyāyaḥ 13-25 शिवरहस्यं महादेवाख्यः एकादशमांशः अध्यायः १३-२५.
Selected Śloka-s श्लोकाः from these Chapters mentioning the phala फल of the Śivārcana शिवार्चन during the respective months are collated on this page.
Proofread by Ruma Dewan