Shiva Stuti by Brahmadya and Pushkareshvara Mahima Varnanam by Shiva

 ब्रह्माद्याकृता शिवस्तुतिरेवं शिवप्रोक्तं पुष्करेश्वरमहिमवर्णनम् 
(शिवगौरीसंवादे)
---
ब्रह्माद्याः -
त्वं राजा मखभाङ्महेश सततं त्वामाह्वयन्तेऽध्वरे
      साम्ना ऋय्ग्गणयाजुषैः प्रतिपदं रुद्रोऽ‍ग्निरित्याह हि ।
त्वन्मायाधिगमेन मोहमतयः सर्वामरैस्तुल्यतां
      दृष्ट्वा त्वामधिगम्य कष्टमखिलं त्यक्त्त्वा प्रमोदामहे ॥ ७९॥

अहो देव मुग्धेन्दुचूड प्रसीद निषद्यादिबर्हिस्त्वमीशान तुष्टः । (निषादादि)
प्रकृष्टं महाकष्टजालं ममाघं हरस्वेश शम्भो प्रसीद प्रसीद ॥ ८०॥

यया मायया मोहमायान्ति सर्वे तवाङ्के निषण्णा भवानीति गीता ।
भवान्मायिमायी भवानादिकर्ता भवत्तोऽखिलं जातमेदद्विचित्रम् ॥ ८१॥

---
ईश्वरः -
इत्थं स्तुतोऽहं देवेशि तैस्तदा दर्शितं मया ।
रूपं त्रिलोचनं साम्बं नीलग्रीवं त्रिशूलकम् ॥ ८२॥

पुनः प्रणेमुर्मां दृष्ट्वा ब्रह्मविष्णुसुरा द्विजाः ।
तदा प्राञ्जलयः सर्वे मां स्तुवन्ति तदांऽबिके ॥ ८३॥

---
ब्रह्माद्याः -
विश्वाधिकस्त्वं भगवान्महर्षिः हिरण्यगर्भं जायमानं च पश्येः ।
सत्यं देवः शुभया माम हि बुद्ध्या नियोजयस्वाशु महेश शम्भो ॥ ८४॥

त्वत्तः परं नापरमस्ति किञ्चित्त्वत्तो नाणीयान्न समश्चाधिको वा ।
वृक्ष इव त्वं स्थाणुरीशश्च नित्यस्त्वया पूर्ण जगदेतद्विचित्रम् ॥ ८५॥

न जानन्ति वेदा न जानन्ति देवा न जानति त्वामात्मसंस्थं महेशम् ।
प्रकृष्टोरुपुण्यैर्यदि त्यक्तमोहो भवत्पादसक्तो भवेत्तस्य सिद्धिः ॥ ८६॥

---
ईश्वरः -
देवि तेषां स्तुतिं श्रुत्वा तानवोचं प्रहर्षितः ।
पुष्करे संस्थिता विप्रा मत्पादशरणास्तथा ॥ ८७॥

क्षेत्रिणो भवता पूज्यास्तथान्येऽपि मुनीश्वराः ।
क्षेत्रमागत्य यः कोऽपि क्षेत्रस्थान्पूजयेत्पुरः ॥ ८८॥

अथान्यानर्चयेत्पश्चाद्यदि पात्रानहो विधे ।
मद्भक्ताः शाम्भवश्रेष्ठा भक्तपूजा ममेष्टदा ॥ ८९॥

विहाय भक्तान्मय्येव अन्यं सम्पूजयन्ति ये ।
तैः कष्टं प्राप्यते ब्रह्मन्पुष्करेऽन्यत्र वा सदा ॥ ९०॥

पुष्करे त्वत्कृतो यज्ञः स्वाद्वन्नो बहुदक्षिणः ।
मत्प्रीतिजनको जातः फलं तेऽष्टगुणं भवेत् ॥ ९१॥

यस्तु पुष्करमासाद्य नानाधर्मगणं चरन् ।
तस्याष्टगुणितं भूयादिति मे व्रतमाहितम् ॥ ९२॥

एतत्कपालानुगुणं जाताः पूर्वें पितामहाः ।
सप्रजानि व्यतीतानि मन्वन्तरशतानि च ॥ ९३॥

अस्मिन्संसारचक्रे त्वं मा गर्वं वह पद्मज ।
प्रणम्य मां तदा ब्रह्मा तान्विप्रान्पूजयत्तदा ॥ ९४॥

गोभिरन्यैश्च वासोभिः शाम्भवान्पुष्करस्थितान् ।
स्नानार्थं सरसस्तस्मादानीतेयं सरस्वती ॥ ९५॥

ज्येष्ठं पुष्करमासाद्य तरङ्गावलिभासुरा ।
तत्रावभृथमासाद्य रराज स पितामहः ॥ ९६॥

सावित्र्या चैव गायत्र्या ऋत्विग्भिश्च सुरासुरैः ।
पुष्करेशं समभ्यर्च्य स्तोत्रमेतज्जगाद च ॥ ९७॥

---
ब्रह्मा -
यं विभेय विमृशामहे शतम् ।
निदधामोऽञ्जलिजालव्रतैः ॥ ९८॥

अनेकविधि कल्पितं हर कपालमालाधर
      हरस्व विलसच्छ्रुतिप्रभव पापतापापह ।
अखर्वजनिदुर्दशां प्रतिपदं विनाशाशुभं
      महेश जनिमार्जनाद्भव भवादिबन्धं हर ॥ ९९॥

---
ईश्वरः -
स्तुत्वा मां स तदा ब्रह्मा प्रणम्याथ जगौ सुरान् ॥ १००॥

पुष्करे दुष्करो वासः पुष्करे दुष्करं तपः ।
पुष्करे दुष्करं दानं पात्रं तत्र सुदुष्करम् ॥ १०१॥

सरस्वती पुण्यतमा तदा याता महार्णवम् ।
कार्तिङ्क्यां तु विशेषेण स्नानं पुण्यं हि पुष्करे ॥ १०२॥

सूतः -
इत्थं स वेधाः प्रजगाम चोक्त्वा देवैः स्वलोकं परमं मुनीन्द्रैः ।
यः पुष्करं संस्मरति दिने दिने न तस्य पापानि भजन्ति वृद्धिम् ॥ १०३॥

॥ इति शिवरहस्यान्तर्गते शिवगौरीसंवादे ब्रह्माद्याकृता शिवस्तुतिरेवं शिवप्रोक्तं पुष्करेश्वरमहिमवर्णनं सम्पूर्णम् ॥

- ॥ श्रीशिवरहस्यम् । भर्गाख्यः पञ्चमांशः । अध्यायः ३५॥ ७९-१०३॥


- .. shrIshivarahasyam . bhargAkhyaH panchamAMshaH . adhyAyaH 35.. 79-103..

Notes:  
Having performed the MahaYagya at Pushkara Kshetra; Brahma, along with Savitri and Gayatri, worships Pushkareshwara Shiva. Shiva iterates the importance of worshipping at Pushkareshwara especially during Kartika-masa.

The shloka numbers have been maintained per the source text.

Proofread by Ruma Dewan