राजाकृता शिवस्तुतिः
(शिवरहस्यान्तर्गते उग्राख्ये)
राजोवाच
श्रीमहादेव देवेश प्रसीद करुणानिधे ॥ ३८२॥
देवतासार्वभौमेश शरणागतवत्सल ।
मथ्यमानाब्धिसम्भूतकालकूटविषादन ॥ ३८३॥
चण्डगर्वपरिभ्राम्यन्नरसिह्मनिषूदन ।
सोमसूर्याग्निनयनभूषिताऽऽनन्दविग्रह ॥ ३८४॥
दिग्व्याप्तनानावदन धृतमेरुशरासन ।
मृत्युञ्जय महादेव महापातकमर्दन ॥ ३८५॥
निराकार निराधार निरीश्वर परात्पर ।
अनेकामेयकल्याणगुणसागर शङ्कर ॥ ३८६॥
धृतगुल्फपरिभ्राजदनेकमणिनूपुर ।
भक्तकल्पतरोऽनन्तसुरसङ्घनिषेवित ॥ ३८७॥
धृतरत्नकिरीटांशुपराभूतनिशाकर ।
निजाकारतिरोभूतसुधापूर महेश्वर ॥ ३८८॥
परिषेवितदिक्पाल कालकालामलामल ।
विशालभालविलसज्ज्वालामालाकुल प्रभो ॥ ३८९॥
(पाहि मां देहि मे मुक्ति द्रुतमानन्दरूपिणीं ।)
॥ इति शिवरहस्यान्तर्गते राजाप्रति विप्रैः प्रोक्तं काशीवासोपदेशं सम्पूर्णम् ॥
- ॥ श्रीशिवरहस्यम् । उग्राख्यः सप्तमांशः । अध्यायः २९ शिवगौरीसंवादे काशीप्रभावकथनम् । ३८२-३८९॥
- .. shrIshivarahasyam . ugrAkhyaH saptamAMshaH . adhyAyaH 29 shivagaurIsaMvAde kAshIprabhAvakathanam . 382-389..
Notes:
Rājā राजा eulogizes Śiva शिव as He makes an appearance while he is living in Kāśī काशी.
Proofread by Ruma Dewan