Shri Ramakritam Ramanatha Stotram

श्रीरामकृतं रामनाथस्तोत्रम्

श्रीराम उवाच । नमो महात्मने तुभ्यं महामायाय शूलिने । स्वपदाम्बुजभक्तार्तिहारिणे सर्पहारिणे ॥ ५॥ नमो देवाधिदेवाय रामनाथाय साक्षिणे । नमो वेदान्तवेद्याय योगिनां तत्त्वदायिने ॥ ६॥ सर्वदाऽऽनन्दपूर्णाय विश्वनाथाय शम्भवे । नमो भक्तभयच्छेदहेतुपादाब्जरेणवे ॥ ७॥ नमस्तेऽखिलनाथाय नमः साक्षात्परात्मने । नमस्तेऽद्भुतवीर्याय महापातकनाशिने ॥ ८॥ कालकालाय कालाय कालातीताय ते नमः । नमोऽविद्यानिहन्त्रे ते नमः पापहराय च ॥ ९॥ नमः संसारतप्तानां तापनाशैकहेतवे । नमो मद्ब्रह्महत्याविनाशिने च विषाशिने ॥ १.४९.१०॥ नमस्ते पार्वतीनाथ कैलासनिलयाव्यय । गङ्गाधर विरूपाक्ष मां रक्ष सकलापदः ॥ ११॥ तुभ्यं पिनाकहस्ताय नमो मदनहारिणे । भूयो भूयो नमस्तुभ्यं सर्वावस्थासु सर्वदा ॥ १२॥ इति श्रीस्कन्दपुराणे ब्रह्मखण्डे सेतुखण्डे एकोनपञचाशत्तमाध्यायान्तर्गतं श्रीरामकृतं रामनाथस्तोत्रं समाप्तम् । स्कन्दपुराण । ब्राह्मखण्ड । सेतुखण्ड । अध्याय ४९/५-१२॥ skandapurANa . brAhmakhaNDa . setukhaNDa . adhyAya 49/5-12.. Proofread by PSA Easwaran