रत्नाकरकृता शिवस्तुतिः
रत्नाकरः -
क्व महेश्वरता क शम्भुता क्व कृपासागरता क्व चाज्ञता ।
क्व निरन्तरदीनबन्धुता क्व शिवाद्याप्यकृपैव मय्यपि ॥ ७०॥
क्व चतुर्दशलोकनाथता त्रिदशाधीश्वरता दयार्द्रता ।
क्व विलक्षणदक्षतापि ते क्व शिवाद्याप्यकृपैव मय्यपि ॥ ७१॥
क्व ललाटकृपीठयोनिता क्व जटाजूटतटेन्दुखण्डता ।
क्व तटित्तटिनीवधूटिता क्व शिवाद्याप्यकृपैव मय्यपि ॥ ७२॥
क्व तवामितवेदवेद्यता क्व तवापारगुणाम्बुराशिता ।
क्व विपद्गणशैलवज्रता क्व शिवाद्याप्यकृपैव मय्यपि ॥ ७३॥
क्व तवाद्भुतभूतिहेतुना क्व विभूतिव्रतपूतता तथा ।
क्व तवामितपुण्यकीर्तिता क्व शिवाद्याप्यकृपैव मय्यपि ॥ ७४॥
क्व सुरासुरवर्गवन्द्यता क्व महाशैवमहार्हणार्थता ।
क्व महोत्सवदानलोलता क्व शिवाद्याप्यकृपैव मय्यपि ॥ ७५॥
क्व तव त्रिपुरप्रहारिता क्व महाशूलविराजमानता ।
क्व सुमेरुपिनाकपाणिता क्व शिवाद्याप्यकृपैव मय्यपि ॥ ७६॥
क्व तवामरसुन्दरीकरप्रकरापारसरोजपूज्यता ।
क्व सुमेरुशरासनज्यता क्व शिवाद्याप्यकृपैव मय्यपि ॥ ७७॥
क्व भवाम्बुधिकर्णधारता क्व महामृत्युभयापहारिता ।
क्व शिवार्चककल्पवृक्षता क्व शिवाद्याप्यकृपैव मय्यपि ॥ ७८॥
क्व तवामितकालकालता क हालाहलनीलकण्ठता ।
क्व दिगम्बरतापि सांवता क्व शिवाद्याप्यकृपैव मय्यपि ॥ ७९॥
क्व परात्परतापि मित्रता क्व वरोरःसरराजहारता ।
क्व तवोन्नतपञ्चवक्त्रता क्व शिवाद्याप्यकृपैव मय्यपि ॥ ८०॥
क्व शिवार्चकजीवनार्थिता क्व महापापवनाग्नितापि ते ।
क्व शिवव्रतचित्तसङ्गिता क्व शिवाद्याप्यकृपैव मय्यपि ॥ ८१॥
किं त्वत्कारुणिकत्वमप्यघकुलारण्यानलत्वं च ते
किं तद्भुक्तिदमोक्षदत्वमपि ते नीतं गतं वा स्वतः ।
तच्चेदस्ति वशे तवापि किमिति त्वत्पादुकाराधकं
मामप्येवमुपेक्ष्य तिष्ठसि कथं श्रीनीलकण्ठाधुना ॥ ८२॥
विश्वस्येन्दुकलावतंसमसकृद्बिल्वीदलैः कोमलैः
गङ्गातुङ्गतरङ्गशीतलजलैवरेशलिङ्गं मुदा ।
प्राणाद्यैरुपहारतामुपगतैरभ्यर्चितं किं मया श्रीविश्वेश
न दुर्दशा परिहृता संसारजातार्जिता ॥ ८३॥
॥ इति शिवरहस्यान्तर्गते रत्नाकरकृता शिवस्तुतिः सम्पूर्णा सम्पूर्णा ॥
- ॥ श्रीशिवरहस्यम् । हराख्यः तृतीयांशः । उत्तरार्धम् । अध्यायः ३७। ७०-८३ ॥
- .. shrIshivarahasyam . harAkhyaH tRRitIyAMshaH . uttarArdham . adhyAyaH 37. 70-83 ..
Notes:
Ratnākara रत्नाकर; feeling forlorn, beseeches Śiva शिव to have mercy on him.
Proofread by Ruma Dewan