सामवेदकृता शिवस्तुतिः
(शिवरहस्यान्तर्गते ईशाख्ये)
सामवेद उवाच ।
अग्निरूपो महादेवो मामायातु स वीतये ।
हव्यदातारमीशानं हव्यभोक्तारमीश्वरम् ॥ ३॥
गृभ्णामि वचसा साम्ना मनसैव महेश्वरम् ।
सवितुर्भासकं तेजो भर्गमेवमुपास्महे ॥ ४॥
स धियो सर्वजन्तूनां यो वः समयक्प्रचोदयात् ।
भूर्भुवःस्वस्तथा सत्यं स एव परमेश्वरः ॥ ५॥
तद्वो गायामि देवेशं पुरुषं परमेश्वरम् ।
आवोराजानमेवेशमध्वरस्य महेश्वरम् ॥ ६॥
होतारं सत्यजं देवं रोदस्योरीश्वरं परम् ।
अग्निमेवं विरूपाक्षं मरणात्पूर्वमीश्वरम् ॥ ७॥
हिरण्यरूपं देवेशं वृणुध्वमवशं सुराः ।
अर्थपतिर्मित्रपतिः शिवः क्षेत्रपतिः सुराः ॥ ८॥
शिवो धनपतिः शम्भुः सुवः पतिरपीश्वरः ।
नमस्तस्मै महेशाय नमस्तस्मै कपर्दिने ॥ ९॥
त्र्यम्बकाय नमस्तस्मै क्रव्येभ्यश्च नमो नमः ।
अन्नाय च नमो नित्यमन्नाधिपतये नमः ॥ १०॥
संवृते विवृते चैव प्रत्यश्राव्ये नमो नमः ।
क्रव्येभ्यश्च विरीकेभ्यो मृडाय च नमो नमः ॥ ११॥
मयि मन्युं क्षमस्वेश दोहं गायामि शङ्कर ।
त्वामर्चयामि विश्वेशं परमात्मानमीश्वरम् ॥ १२॥
यदिदं विश्वभूतं च त्वय्येव लयमेष्यति ।
नमो नमस्ते देवाय नमस्तेऽस्तु सदा मम ॥ १३॥
चन्द्ररूपाय च नमः शुक्ररूपाय ते नमः ।
मखाय च नमस्तुभ्यं ओजसे ते नमो नमः ॥ १४॥
सहसे ते नमस्तुभ्यं ऋतवे ते नमो नमः ।
बृहते नमस्तुभ्यं सुखाय च नमो नमः ॥ १५॥
ज्योतिषे ते नमस्तुभ्यं त्वां दधे हृदये सदा ।
एभिर्नामभिरेवेशं स्तोभैर्गायामि शङ्कर ॥ १६॥
औष्णैरित्वा महादेवं हवामि परमेश्वरम् ।
ॐ वाग्भा तव देवेश सर्वभासकरी प्रभो ॥ १७॥
सोमोऽयं जनिता देवः पवते शङ्करः स्वयम् ।
सोमोऽयं जनिता देवो मतीनां परमेश्वरः ॥ १८॥
सोमोऽयं जनिता देवो दिवः शङ्कर ईश्वरः ।
सोमोऽयं जनिता देवः पृथिव्याः परमेश्वरः ॥ १९॥
सोमोऽयं जनिता देवो अग्नेः साक्षान्महेश्वरः ।
सोमोऽयं जनिता देवः सूर्यस्य भव ईश्वरः ॥ २०॥
सोमोऽयं जनिता देवो विष्णोश्चापि त्रियम्बकः ।
एषोऽन्तरा महादेव आदित्ये श्रूयते विभुः ॥ २१॥
हिरण्यश्मश्रुरीशानो हिरण्मयसुकेशवान् ।
सर्व एव सुवर्णोऽयं शिवो ह्याप्रणखात्सुराः ॥ २२॥
सीमा भूमा महानात्मा विश्वरूपो महेश्वरः ।
कं खं ब्रह्मेश्वरो ह्येष महादेवः प्रकाशते ॥ २३॥
वैश्वानरात्मा त्रिमधुस्त्रिसुपर्णोह्यतीन्द्रियः ।
अपावृतं च तद्द्वारं सदा पश्यन्ति सूरयः ॥ २४॥
विराट् स्वराट् तथा संराट् भगवान् रुद्र एव हि ।
युजोत्वात्यादयो वाचं गायेत्त्वाशतवर्तनम् ॥ २५॥
महेन्द्रात्मा वामदेव्यो ज्येष्ठेराजानहिं कृतः ।
वैरूप वैश्वरूपात्मा सर्वात्मा परमेश्वरः ॥ २६॥
महावैराज सुप्रीतो वैश्वामित्रस्तुतः शिवः ।
अष्टदंष्ट्रारवप्रीत एक एव महेश्वरः ॥ २७॥
यजध्वं श्रीमहादेवं लभध्वं मुक्तिमुत्तमाम् । २८.१
॥ इति शिवरहस्यान्तर्गते सामवेदकृता शिवस्तुतिः सम्पूर्णा ॥
- ॥ श्रीशिवरहस्यम् । ईशाख्यः द्वादशमांशः । अध्यायः ४ सामवेदाथर्ववेदकृतस्तुतिः । ३-२८.१ ॥
- .. shrIshivarahasyam . IshAkhyaH dvAdashamAMshaH . adhyAyaH 4 sAmavedAtharvavedakRRitastutiH . 3-28.1 ..
Notes:
Sāmaveda सामवेद; delivers at the site of DakṣaYajña दक्षयज्ञ, a eulogy in favor of Śiva शिव.
Proofread by Ruma Dewan