सप्तताण्डवस्तोत्रम्
१. आनन्दताण्डवं
जटाटवीगलज्जलं तरङ्गिणीविनिर्गलं
कपर्दमध्यसंस्थितं प्रबालचन्द्रभासितम् ।
सुधांशुशीतलद्युतिप्रसन्नमोदमण्डितं
नमामि नृत्यताण्डवं शुभङ्करं सुपाटवम् ॥ १॥
२. सन्ध्याताण्डवं
डमड्डमड्डमड्डमध्वनिप्रबोधगम्भीरं
प्रनृत्यदङ्घ्रिपङ्कजप्रभाभिरुज्ज्वलीकृतम् ।
अनादिनादगम्भीरं प्रपञ्चकालिमाधरं
नमामि नृत्यताण्डवं शुभङ्करं सुपाटवम् ॥ २॥
३. कालीताण्डवं
भुजङ्गराजभूषितं भुजद्वयप्रसारितं
विरागभक्तिबोधितं विरक्तचित्तसेवितम् ।
कपालकालिकाधरं नृभस्मलेपतत्परं
नमामि नृत्यताण्डवं शुभङ्करं सुपाटवम् ॥ ३॥
४. त्रिपुरताण्डवं
मुनीन्द्रवृन्दवन्दितं सुरेन्द्रसिद्धसेवितं
गणेशषण्मुखार्चितं सनन्दिकालसेवितम् ।
भवच्छिदं मदच्छिदं कुदैत्यजीवनोच्छिदं
नमामि नृत्यताण्डवं शुभङ्करं सुपाटवम् ॥ ४॥
५. गौरीताण्डवं
सुधातरङ्गसुन्दरप्रवाहशीतलोज्ज्वलं
पिशाचभूतभैरवैर्ज्ज्वलत्सभासु सत्वरम् ।
शिवाशिवाभिरुर्जितं श्मशानभूमिमज्जितं
नमामि नृत्यताण्डवं शुभङ्करं सुपाटवम् ॥ ५॥
६. संहारताण्डवं
सपञ्चकृत्यकारणं विनाशपाशदारणं
स्वतन्त्रतत्त्वघोषकं चिदम्बरे सुनर्तकम् ।
दिगम्बरं महेश्वरं विराजराजशङ्करं
नमामि नृत्यताण्डवं शुभङ्करं सुपाटवम् ॥ ६॥
७. ऊर्ध्वताण्डवं
अघोरघोरघर्घरं हिमालयेषु निर्भरं
त्रिपुण्ड्रभस्मशेखरं तदुर्द्ध्वमोहिनीवरं
प्रसन्नवक्त्रमण्डितं निरोधशक्तिरुर्जितं
नमामि नृत्यताण्डवं शुभङ्करं सुपाटवम् ॥ ७॥
रचयिता प्रो. प्रदीप्तकुमारनन्दः (सेवानिवृत)
श्रीजगन्नाथसंस्कृतविश्वविद्यालयः, पुरी
Composed, encoded and proofread by Prof. Pradipta Kumar Nanda