शेषकृता हाटकेश्वरशिवस्तुतिः १
(शिवरहस्यान्तर्गते भीमाख्ये)
फणामणिगणव्रज प्रभवगर्भधामामृत-
प्रभं वर सुहाटकेश्वरमहोरुलिङ्गोत्तमम् ।
सुबिल्वदलपङ्कजैः कनकचम्पकैर्मल्लिका-
कदम्बकरवीरजैः सुमवरैः प्रपूज्योरगाः ॥ १३॥
लिङ्गं हाटकगर्भमण्डितमहागर्भोरुधामस्थितं
दिव्योत्तुङ्गवृषाद्यरत्नशिखरद्वाराङ्कितं सुन्दरम् ।
प्राकारप्रकरैरपारगणनाहीनस्वमौलीलस-
त्सद्रत्नच्छविभिः प्रदीपितमुमाकान्तलयेषूद्यताः ॥ १४॥
पातालगङ्गाम्बुघटीसहस्र-
धारादिभिः क्षीरदधिप्रभाज्यैः ।
प्राज्यैर्मधुप्रभवसारघटीसहस्रैः
सच्छर्कराफलरसैरपि चेक्षुनीरैः ॥ १५॥
सन्नारिकेलोदकजम्बुनीर -
रम्भाफलाम्रप्रभवैश्च पनसैः ।
गन्धोदकैश्चन्द्र उशीरपाटला-
तक्कोलकाङ्कोलसुवासितैर्जलैः ॥ १६॥
आज्यैश्च गव्यैर्वर पञ्चकाद्यै-
रालिप्य लिङ्गं धवलैश्चवस्त्रैः ।
सद्रत्नभूषाफणिगोलकाङ्कितै
रत्नैश्च निष्टप्तसुवर्णयुक्तैः ॥ १७॥
तगरागरुधूपसम्भवै-
रथ गन्धैर्मणिदीपकोटिभिः ।
परिफुल्लसुपङ्कजार्कबिल्वै-
रपि मल्लीकरवीरजाजिपुष्पैः ॥ १८॥
मरुवदमनकस्रजादिभारैः
परिपूज्य प्रमथाधिपोरुलिङ्गम् ।
भुजगा जगतां महेशमेवं
वरनैवेद्यभरैः फलैश्च भक्ष्यभोज्यैः ॥ १९॥
स्रक्ताम्बूलदुकूलवर्यविहितालङ्कारसच्चन्दना-
लिप्तं लिङ्गमुमापतेः प्रियतमं नीराजयन्ति द्विज
दीपानां च सहस्रकैर्वरमहाकर्पूरखण्डोत्थित-
ज्वालाजालनिरस्तदिक्तमततिं ते पन्नगाः शङ्करम् ॥ २०॥
हाटककटकं महेशलिङ्गे
परिसंवेष्ट्य मुदाननोत्त्थरत्नैः ।
स्वफणाछदि सुन्दरेशमूर्ध्नि
वरिवस्याभिरहो समर्चयन्ति ॥ २१॥
स्वच्छेन्दुधामपरिमण्डल सन्निभोरु-
निष्टप्तरुक्मवरदण्डसुमण्डितैश्च ।
सच्छत्रपङ्क्तिवरचामरकोटिकोटि-
भ्राजत्पताकनिकरैर्व्यजनैरपारैः ॥ २२॥
आदर्शदर्शवरनाट्यमहोत्सवोद्यद्-
ध्वानैर्जिताम्बुधिरवैर्वरदुन्दुभीनाम् ।
सत्काहलैर्वरमृदङ्गसुशङ्खनादैः
सङ्घोष्य शङ्करमहालयमध्यमेवम् ॥ २३॥
तौर्यत्रिकैर्हरहरेति रवैर्भुजङ्गा
नृत्यन्ति लिङ्गसविधे मुदिताः कृतार्थाः ॥ २४॥
श्रीरुद्रवीणायुतवाणिपाणि
पद्मप्रभोत्थैर्नखरैर्नखाग्रैः ।
तदुक्तिरागोत्तमगानधारा
नाम्नां च शम्भोश्च नयन्ति कालम् ॥ २५॥
तदङ्गणसुनीलिमाविधुतकालिनानं कुच-
प्रकर्षभुजगाङ्गनाः परिलसत्कपोलश्रियः ।
चलद्दलनमण्डनैः प्रथितकुण्डलान्दोलनै-
र्नयन्ति किल वीणया शिवमहेशगानादराः ॥ २६॥
ता नागाभरणोरुलिङ्गसदने नृत्यन्ति नागात्मजाः
नागास्याः प्रसभोरुकाण्डसुमहापादा झणन्नूपुराः ।
पश्येशेति हरेति शङ्करमहादेवेति नित्यं सदा
वीणावेणुमृदङ्गनिःस्वनलयैः सोमोरुधामाननाः ॥ २७॥
शेषोऽप्यशेषवदनैर्भुजगोरुभूष-
पूषोज्ज्वलाक्षभसितोत्तमभूषिताङ्गम् ।
योषार्धकाय नवमाषनिकाशकण्ठं
सन्तोष्य शङ्करमहो स्तुवति प्रदोषे ॥
(अस्तौत्प्रदोषसमये परितुष्टचेताः) ॥ २८॥
द्विजिह्वफणिभूषणं शशिहुताशसूर्येक्षणं
सुपङ्कजदलेक्षणं प्रथितपूजया तोषणम् ।
गरोल्बणविशेषणं मदनकालसंहारणं
कुरङ्गशिशु धारणं सुरवराद्यसत्कारणम् ॥ २९॥
॥ इति शिवरहस्यान्तर्गते शेषकृता हाटकेश्वरशस्तुतिः १ सम्पूर्णा ॥
- ॥ श्रीशिवरहस्यम् । भीमाख्यः अष्टमांशः । अध्यायः २७ शेषकृतहाटकेशार्चनम् । १३-२९॥
- .. shrIshivarahasyam . bhImAkhyaH aShTamAMshaH . adhyAyaH 27 sheShakRRitahATakeshArchanam . 13-29..
Notes:
Śeṣa (Nāga) शेष (नाग); eulogizes Hāṭakeśvara Śiva हाटकेश्वर शिव.
Proofread by Ruma Dewan