नन्दिकेशप्रोक्तं शिवधर्मानुवर्णनम्
आराधनं च भवति करोति भगवानापि ।
सन्तुष्टो येन भगवान् सौभाग्यं स्थिरतामियात् ॥ १॥
इत्युक्त्वा सोऽपि सन्तुष्टो भोगारम्भसमावृतः ।
शिवार्चनपरो नित्यं शिवनामरतोऽभवत् ॥ २॥
तेनाप्युन्नतमुत्कृष्टं कारितं रत्नमन्दिरम् ।
तस्य नार्मदलिङ्गस्य सर्वाभरणभूषितम् ॥ ३॥
मणिमालासमाक्रान्तं रत्नप्राकारसंयुतम् ।
स पञ्चामृतकुल्याभिः चक्रे लिङ्गाभिषेचनम् ॥ ४॥
दिव्यनीरप्रवाहैश्च शीतलैर्गन्धसंयुतैः ।
कस्तूरीघनसारादिनानाद्रव्यसमन्वितैः ॥ ५॥
चन्दनं च घनीभूतं दिव्यगन्ध समन्वितम् ।
दत्तमीशाय तेनैव रत्नैरभ्यर्चितः शिवः ॥ ६॥
गोघृतेनैव दिव्येन दीपमालाः कृताः खलु ।
ताभिः प्रभान्वितं जातं सर्व ब्रह्माण्डमण्डलम् ॥ ७॥
बिल्वमन्दारकुसुमैः कमलैरमलैरपि ।
अन्यैश्च विविधैः पुष्पैः गन्धासारसमन्वितैः ॥ ८॥
सुवर्णपुष्पमालाभिः नानारत्नसमन्वितैः ।
मुक्ताहारैरविरलैः नीलमालाभिरादरात् ॥ ९॥
बिल्वपल्लवमालाभिरमलाभिर्विशेषतः ।
अतुलाभिरमूल्याभिः पूजयामास शङ्करम् ॥ १०॥
नानाविधैर्धूपदीपैः धूपयित्वा सदाशिवम् ।
नैवेद्यं कल्पयामास स चान्नैर्विविधैरपि ॥ ११॥
परमान्नप्रवाहैश्च शर्कराज्यसमन्वितैः ।
वटकाद्यैर्भक्षसङ्घैः अपारैर्मधुरैरपि ॥ १२॥
नारिकेलजलानां च प्रवाहैः शीतर्लैजलैः ।
एलालवङ्गसंयुक्तैः ताम्बूलैरमलैरपि ॥ १३॥
रत्नछत्रैश्चामरैश्च दुकूलैर्दर्पणैरपि ।
प्रणामैरपि नाट्यैश्च तोषयामास शङ्करम् ॥ १४॥
दिव्यान्नैः शिवनैवेद्यैः तोषयामास कोटिशः ।
शाम्भवाग्रेसरानेव ददौ तेभ्यो धनान्यपि ॥ १५॥
गोसहस्राणि दत्तानि शैवेभ्यस्तेन सादरम् ।
विविधान्यपि धान्यानि तेभ्यो दत्तानि तेन तु ॥ १६॥
प्रत्यहं दृढया भक्त्या पूजामेवं विधाय सः ।
आसायमुपवासेन निशि भुङ्क्ते शिवार्चकः ॥ १७॥
एवं संवसतस्तस्य द्रष्टुं सर्वं शिवोत्सवम् ।
सनकाद्यैः सहानन्तर्मुनिभिरदो ययौ ॥ १८॥
स दूरेणैव तान् दृष्ट्वा भस्मोद्धूलितविग्रहान् ।
रुद्राक्षमालाभरणान् हृष्टः सादरमास्तिकः ॥ १९॥
तानागतान् प्रयत्नेन नत्वा भक्तिपुरस्सरम् ।
पूजां विधाय विहितां रत्नसिंहासनस्थितान् ॥ २०॥
स्वयं च भस्मोद्धूल्य सर्वाङ्गान्यपि भक्तितः ।
रुद्राक्षमालाभरणः पप्रच्छ शिववैभवम् ॥ २१॥
महेश्वराराधनस्य प्रकारः कः परः श्रुतः ।
किं तत्फलं चाधिकारी के वा तन्मे वदन्तु वा ॥ २२॥
॥ इति शिवरहस्यान्तर्गते नन्दिकेशप्रोक्तं शिवधर्मानुवर्णनं सम्पूर्णम् ॥
- ॥ श्रीशिवरहस्यम् । हराख्यः तृतीयांशः । पूर्वार्धम् । अध्यायः ३४। ३-२४ ॥
- .. shrIshivarahasyam . harAkhyaH tRRitIyAMshaH . pUrvArdham . adhyAyaH 34. 3-24 ..
Proofread by Ruma Dewan