शिवगाथा
जय जय गिरिजालङ्कृतविग्रह
जय जय विनताखिलदिक्पाल ।
जय जय सर्वविपत्तिविनाशन
जय जय शङ्कर दीनदयाल ॥ १॥
जय जय सकलसुरासुरसेवित
जय जय वाञ्छितदानवितन्द्र ।
जय जय लोकालोकधुरन्धर
जय जय नागेश्वर धृतचन्द्र ॥ २॥
जय जय पण्डितपुरीनिवासिन्
जय जय करुणाकल्पितलिङ्ग ।
जय जय संसृतिरचनाशिल्पिन्
जय जय भक्तहृदम्बुजभृङ्ग ॥ ३॥
जय जय भोगिफणामणिरञ्जित
जय जय भूतिविभूषितदेह ।
जय जय पितृवनकेलिपरायण
जय जय गौरीविभ्रमगेह ॥ ४॥
जय जय गाङ्गतरङ्गलुलितजट
जय जय मङ्गलपूरसमुद्र ।
जय जय बोधविजृम्भणकारण
जय जय मानसपूर्तिविनिद्र ॥ ५॥
जय जय दयातरङ्गितलोचन
जय जय चित्रचरित्रपवित्र ।
जय जय शब्दब्रह्मविकाशक
जय जय किल्बिषतापधवित्र ॥ ६॥
जय जय तन्त्रनिरूपणतत्पर
जय जय योगविकस्वरधाम ।
जय जय मदन महाभटभञ्जन
जय जय पूरितपूजककाम ॥ ७॥
जय जय गङ्गाधर विश्वेश्वर
जय जय पतितपवित्रविधान ।
जय जय वंवंनादकृपाकर (बंबं)
जय जय शिव शिव सौख्यनिधान ॥ ८॥
य इमं शिवजयवादमुदारं पठति सदाशिवधाम्नि ।
तस्य सदा शिवशासन योगान्माद्यति सम्पन्नाम्नि ॥ ९॥
इति श्रीदुर्गाप्रसादद्विवेदीविरचिता शिवगाथा समाप्ता ।
Encoded and proofread by Lalitha Mallikarjunan