शिवज्ञानबोधः
स्त्रीपुंनपुंसकादित्वाज्जगतः कार्यदर्शनात् ।
अस्ति कर्ता स हृत्वैतत्सृजत्यस्मात्प्रभुर्हरः ॥ १॥
(जगतः कर्तास्ति कार्यदर्शनात् स्त्रीपुंनपुंसजादित्वात् स
एतत् हृत्वा पुनः सृजति अस्मात् हरः प्रभुः ।)
अन्यः सन्व्याप्तितोऽनन्यः कर्ता कर्मानुसारतः ।
करोति संसृतिं पुंसामाज्ञया समवेतया ॥ २॥
नेतितो ममतोद्रेकादक्षोपरतिबोधतः ।
स्वापे निर्भोगतो बोधे बोद्धृत्वादस्त्यणुस्तनौ ॥ ३॥
आत्मान्तःकरणादन्योऽप्यन्वितो मन्त्रिभूपवत् ।
अवस्थापञ्चकस्थोऽतो मलरुद्धस्वदृक्क्रियः ॥ ४॥
विदन्त्यक्षाणि पुंसाऽर्थान्न स्वयं सोऽपि शम्भुना ।
तद्विकारी शिवश्वेन्न कान्तोऽयोवत्स तं नयेत् ॥ ५॥
अदृश्यं चेदसद्भावो दृश्यं चेज्जडिमा भवेत् ।
शम्भोस्तद्व्यतिरेकेण ज्ञेयं रूपं विदुर्बुधाः ॥ ६॥
नाचिच्चित्सन्निधौ किं तु न वित्तस्ते उभे सिथः ।
प्रपञ्चशिवयोर्वेत्ता यः स आत्मा तयोः पृथक् ॥ ७॥
स्थित्वा सहेन्द्रियव्याधैस्त्वां न वेत्सीति बोधितः ।
मुक्त्वौतान्गुरुणाऽनन्यो धन्यः प्राप्नोति तत्पदम् ॥ ८॥
चिद्दृशात्मनि दृष्ट्वेशं त्यक्त्वा वृत्तिमरीचिकाम् ।
लब्ध्वा शिवपदच्छायां ध्यायेत्पञ्चाक्षरीं सुधीः ॥ ९॥
शिवेनैक्यं गतः सिद्धस्तदधीनस्ववृत्तिकः ।
मलमायाद्यसंस्पृष्टो भवति स्वानुभूतिमान् ॥ १०॥
दृशोर्दर्शयिता चात्मा तस्य दर्शयिता शिवः ।
तस्मात्तस्मिन्परां भक्तिं कुर्यादात्मोपकारके ॥ ११॥
मुक्त्यै प्राप्य सतस्तेषां भजेद्वेषं शिवालयम् ।
एवं विद्याच्छिवज्ञानबोधे शैवार्थनिर्णयम् ॥ १२॥
इति श्रीमद् शिवाग्र योगी विरचितः शिवज्ञानबोधः सम्पूर्णः ।
Encoded and proofread by Vani V