श्रीशिवकर्पूरस्तोत्रम्
कर्पूरस्याद्यवर्णं तदनु गिरिपते पर्दिने हृद्युतस्ते ।
मन्त्रः साक्षात् पडरर्णो भवति शुभकरः शत्रुविध्वंसकारी ।
एतन्मन्त्रं सदा यो जपति निजगुरोः पादपद्मं स्मरन् सन्
पूज्यो भूत्वा सदैव प्रभवति स नरः श्रीयमोऽन्यो रिपूणाम् ॥ १॥
भोः शम्भो सौष्मकान्ते वकरमसहिताकारयुक्ताम्बुतीक्ष्णैः
पञ्चार्णो मन्त्रराजो भवति शुभकरो मुक्तिदः शैवरूपः ।
तारान्ते ये जपन्तो-ह तवमनुवरं शुद्धभावैः प्रशान्ताः
ते ते सिद्धिं लभन्ते शिवरसमुदिता मुक्तरूपा मुनीन्द्राः ॥ २॥
श्रीमत्मासादयुग्मं कृतपुटितमहापञ्चतारैमहेश
त्वन्मन्त्रं शाम्भवाख्यं स्मरति यदि जनोवारमेकं जितात्मा ।
भूत्वा पृथ्व्यां स लक्ष्मी-पतिरपि च महाकालकालः कवीन्द्रः
पश्चान्निर्वाण मुक्तिं सुरनुतलभते पुण्यपापैर्विमुक्तः ॥ ३॥
शम्भो त्वां श्रीमहापाशुपतमनुवरं संस्मरन् बाणलिङ्गे
सद्योजातादिवक्त्रार्चनमपि ललितापूजनं भालदेशे ।
कुर्वञ्च्छ्रीयन्त्रपूजां १ममममहिलाभिर्नरो ब्रह्मरन्ध्रे
साक्षाद्योगीन्द्ररूपः प्रभवति शिवतां याति सर्त्य पृथिव्याम् ॥ ४॥
यस्त्वां ब्राह्म मुहुर्ते यजति सह सदा क्षीररुद्राभिषेकैः
सद्यः सन्तोष्यदेवं ग्रहभयहरणं जायते तस्य शर्व ।
तैलाख्यैः शत्रुनाशं स्मरहरदुरितध्वंशनं गोपयोभिः
निर्वाणो मोक्षरूपः प्रभवति कुलजः २कौलरुद्राभिषेकैः ॥ ५॥
शिवं त्वां पञ्चाश्यं त्रिनयनयुतं शुद्धधवलं
चतुर्हस्तोपेतं सुपरशुमृगाभीतिवरदम् ।
सदानन्दं व्याघ्राम्बरपरिदधानं स्मरहर
स्मरन्ति श्रीशैवास्त्रिवसुदलपीठोपरिगतम् ॥ ६॥
प्रदोषे भक्तोयो यजति तव पादाम्बुजयुगं
सुपत्रैर्विल्वैर्वा कुशुमसलिलैर्वा त्रिषवणम् ।
प्रशान्तो दिव्यो वार्चयति शिवरात्रौ पशुपते
स एव ब्रह्मात्मा स हि भुवनसौख्यञ्चलभते ॥ ७॥
निशायां श्रीचक्रं यजति शिवलिङ्गोपरिसदा
तथा विन्दौ शैवं त्रिपुरहर निर्वाणपरमम् ।
कुलद्रव्यैश्वाहङकृतिमयवलिं यः प्रकुरुते
परो दिव्यः कौलो ब्रजति शिवतां भोः पशुपते ॥ ८॥
व्रती मूलाधारोपरि रसदलं दिग्दलमथो
परं हृत्पत्राख्यं परशिव महाषोडशदलम् ।
त्रिवेण्यां हक्षाभ द्विदलकमलं ब्रह्ममदनं
हठाभ्यां संयोगदलसति सुषुम्णाख्यपथतः ॥ ९॥
सहस्रारेदीपाकृतिपरमलिङ्गं परशिवं
सदा ध्यायन दिव्यं समरसयुतं हंसगपरम् ।
परान्तस्थं शुद्धं जपतियदिमन्त्रं कुलजन-
स्तदा जीवन्मुक्तः परमपदलीनः प्रभवति ॥ १०॥
इदं स्तोत्रं सूक्ष्मं मनुवरसमुद्धारणजप-
स्वरूपाख्यम्पूजा-परमशुभयोगादिसहितम् ॥
मया भक्त्या शम्भो तव परशिवाख्यं विरचितं
प्रसादार्थीतेऽहङ्गिरिश धनशंशेरमनुजः ॥ ११॥
(टिप्पणी
१ मननम् । मन्त्रः । मौनम् । मनः । (योग) मुद्रा ।
एवं पञ्चमकाराः एव मममममहिलाः ।
२ मूलाधारगतस्वयम्भूलिङ्गपरि कुलाकुलक्रमेण
निसृतामृतधाराभिषेकानि एव कौलरुद्राभिषेकानीत्युच्यते ।)
इति श्रीधनशंशेर जङ्गवर्म्मणाविरचितं वीरेन्द्रकेसरिन्
शर्म्मणा संशोधितं श्रीशिवकर्पूरस्तोत्रम् ॥
Proofread by Mohan Chettoor