शिवलिङ्गार्चनफलम्
(शिवरहस्यान्तर्गते महादेवाख्ये)
- शिवगौरीसंवादे -
ईश्वर उवाच ।
का विवक्षास्ति ते सुभ्रु निःशङ्कं मे वदाग्रतः ॥ ३२॥
त्वं मे शक्तिः परा देवी त्वयाहं शक्तिमान् शिवे ।
त्वत्तेजसा जगद्व्याप्तं सदेवासुरमानुषम् ॥ ३३॥
रहस्यं वा प्रकाशं वा वदामि प्रमुदे त्वयि ।
त्वं मे शरीराधिकृता वद मे तं हृदि स्थितम् ॥ ३४॥
कुमार उवाच ।
इति शम्भोर्वचः श्रुत्वा गिरिजा हर्षनिर्भरा ।
समुह्यदश्रुपुलका प्राह कामारिमीश्वरी ॥ ३५॥
गिरिजा उवाच ।
देव देव महादेव शरणागतवत्सल ।
स्वानन्दराशिवाराशे कृपाराशे महेश्वर ॥ ३६॥
शिवार्चनविधानं मे कालतिथ्यृक्षके तव ।
लिङ्गेऽभिषेकसम्भारः फलपञ्चामृतैः कृतः ॥ ३७॥
पुष्पधूपादि दाने च दीपनैवेद्यकल्पनैः ।
धातुपात्रे तारतम्यमर्घ्यताम्बूलकल्पनम् ॥ ३८॥
तत्फले तारतम्यं च वद मे करुणार्णव ।
सूत उवाच ।
इत्यपर्णावचः श्रुत्वा सम्पूर्णहृदयः शिवः ॥ ३९॥
प्राह प्रमोदभरितः दृष्ट्वा तामद्रिकन्यकाम् ।
महादेवो महानन्दः परानन्दमहोदधिः ॥ ४०॥
ईश्वर उवाच ।
अये सुगिरिकन्यके तव सरोजराजाननं
विलोक्य मुदमादितः प्रभृति पारसारं गतः ।
अनन्तमहिमास्पदं शिवरहस्यरत्नाकरं
सुगोप्यमपि तद्वदे(?) शिवगणेषु तुष्टिप्रदम् ॥ ४१॥
प्रकाश्यमिदमेव ते मम हृदि प्रकृष्टं चिरं
प्रतुष्टिदमिदं शिवे विहितसर्वधर्मैरपि ।
न यागशतकोटिभिर्विविधदानकोट्यापि वा
तुरङ्गगजगोद्मैद्विजवरेषु दत्तैश्च किम् ॥ ४२॥
भक्तो मे यदि लिङ्ग तुङ्गविहितानङ्गाङ्गसङ्गोज्झितो
गङ्गातुङ्गतरङ्गचञ्चलमना गङ्गतरङ्गाप्लुतः ।
भूयाद्भावुकभक्तिभावहृदयो भावो भवेऽप्यध्रुवे
लिङ्गार्चासु निषक्तमुग्धहृदयो व्यक्तं स मुक्तिं गतः ॥ ४३॥
॥ इति शिवरहस्यान्तर्गते शिवलिङ्गार्चनफलं सम्पूर्णम् ॥
- ॥ श्रीशिवरहस्यम् । महादेवाख्यः एकादशमांशः । अध्यायः १ । ३२-४३॥
- .. shrIshivarahasyam . mahAdevAkhyaH ekAdashamAMshaH . adhyAyaH 1 . 32-43..
Proofread by Ruma Dewan