श्रीशिवनीराजनस्तोत्रम्
ॐ नमः शिवाय ।
जय गङ्गाधर हर शिव जय गिरिजाधीश
शिव जय गौरीनाथ त्वं मां पालय नित्यं
त्वं मां पालय शम्भो कृपया जगदीश ॥
ॐ हर हर हर महादेव ॥
पारिजातहरिचन्दनकल्पद्रुमनिचयैः शिव कल्प०
कुसुमितलतावितानै२र्गुञ्जद्भ्रमरमयैः ।
उन्मदकोकिलकूजितशिखिकेकारुचिरैः हर शिखि०
सहकारैश्च कदम्बे २ र्भृङ्गवधूमुखरैः ॥ १॥
ॐ हर हर हर महादेव ॥
मुदितहंसयुगखेलत्सारसपरिवारैः शिव सार०
भ्रमरयुवतिमुखराम्बुज २ सुभगैः कासारैः ।
हारिणि कलधौताद्रेर्देशे मणिरचिते हर देशे०
भवने सुखमासीनं २ चिन्तामणिनिचिते ॥ २॥
ॐ हर हर हर महादेव ॥
पीठे गिरिजासहितं चन्द्रकलाधवलं शिवमिन्दुक०
विशरणशरणं देवं २ विपत्क्षयप्रबलम् ।
सम्पद्विधानरसिकं जगदङ्कुरकन्दं हर जग०
प्रणमामो वयमीशं २ चित्परमानन्दम् ॥ ३॥
ॐ हर हर हर महादेव ॥
यस्याग्रेस्मरवध्वो विबुधाधिपसहिताः शिव विबु०
मुदितमनोहरवेषा २ लास्यकलामहिताः ।
ताथै ताथै तथेति विविधं नृत्यन्ति हर विविधं-
किङ्किणिनूपुरशिञ्जित २ रुचिरं वल्गन्ति ॥ ४॥
ॐ हर हर हर महादेव ॥
तान्धिक धिनकित्थथेति विविधं वादयते शिव विविधं-
मृदङ्गममरी काचित् २ रुचिरं नादयते ।
वीणां काचिद्रमणी गानविदाभरणा हर गान०
गायति कलमपराचित् २ चिन्तितहरचरणा ॥ ५॥
ॐ हर हर हर महादेव ॥
रमया सहितो विष्णुर्ब्रह्मा सावित्र्या शिव ब्रह्मा०
जिष्णुर्नृत्यति भक्त्या २ मुदितमनाः शच्या ।
तुम्बुरुरुचितं मुरजं विविधं वादयते हर विविधं०
नारदमुनिरपि वीणां २ महतीं नादयते ॥ ६॥
ॐ हर हर हर महादेव ॥
तं प्रसन्नवदनं प्रभुमिन्दुकलाभरणं शिवमिन्दु०
प्रणमामः करुणाब्धिं २ तापत्रयहरणम् ।
देवासुरमणिमुकुटैर्नीराजितचरणं हर नीरा०
भक्ताभीष्टदकल्पं २ कातरजनशरणम् ॥ ७॥
ॐ हर हर हर महादेव ॥
जटाकिरीटे गङ्गां चन्द्रकलां भाले शिवमिन्दुकलां०
नेत्रेष्विन्दुशिखीना २ नधरे स्मितममले ।
कण्ठे गरलं पाणौ वरमभयं शूलं हर वर०
पीयूषं कटिदेशे २ कृत्तिं च दुकूलम् ॥ ८॥
ॐ हर हर हर महादेव ॥
श्रीगिरिराजकिशोरीमङ्के निदधानं शिवमङ्के०
निखिलसुरासुरमौलीन् २ चरणेऽमितदानम् ।
शम्भुं तडिदभिगौरं कृतनागाभरणं हर कृत०
भजति स गच्छति मुक्तिं २ तिमिरापाकरणम् ॥ ९॥
ॐ हर हर हर महादेव ॥
निरुपधिकरुणासिन्धुर्भीतत्राणपरः शिव भीत०
दुःखक्षतये भूयात् २ कातरबन्धुवरः ।
यः श्वेतं यमभीतं स्मृतमात्रोऽरक्षत् हर स्मृतमा०
मा भैषीरिति वादी २ कालं समतक्षत् ॥ १०॥
ॐ हर हर हर महादेव ॥
आनन्दाय महेशो युष्माकं भवतात् शिव युष्माकं०
जन्मजरामृतिशोकात् २ करुणानिधिरवतात् ।
येन सुरासुरनिवहस्त्रातो विषभीतो हर त्रातो-
नीलकण्ठ इति भूयो २ निगमगणैर्गीतः ॥ ११॥
ॐ हर हर हर महादेव ॥
यः सृष्ट्यादिविधानं ब्रह्माच्युतरुद्रैः शिव ब्रह्मा-
निजरूपैस्तनुते यो २ दुर्ज्ञेयः क्षुद्रैः ।
तं प्रकाशसुखमच्छं बाधावधिमीशं हर बाधा०
तनुभेदैरिव भिन्नं २ श्रयत धियामीशम् ॥ १२॥
ॐ हर हर हर महादेव ॥
॥ ॐ शान्तिः शान्तिः शान्तिः ॥
इति श्रीहृषीकेशकैलासनिवासिविद्वद्वरिष्ठब्रह्मनिष्ठपरमहंस-
परिव्राजकाचार्य्य १०८ श्रीमत्स्वामिप्रकाशानन्दपुरी-
भिर्विनिर्मितं शिवनीराजनस्तोत्रं सम्पूर्णम् ॥
The Arati is sung in the tune of well known
jaya jagadIsha hare Arati. The 0 at the end
refers to the implied repetition, for example
कल्पद्रुमनिचयैः शिव कल्प० means
कल्पद्रुमनिचयैः शिव कल्पद्रुमनिचयैः
With other repetion
किङ्किणिनूपुरशिञ्जित २ रुचिरं वल्गन्ति means
किङ्किणिनूपुरशिञ्जित किङ्किणिनूपुरशिञ्जित रुचिरं वल्गन्ति
Proofread by Madhura Bal madhurabal11 gmail.com