शिवप्रोक्तं वृद्धाचलेश्वरक्षेत्रे शिवोपासकान् वर्णनम्
(शिवरहस्यान्तर्गते)
(शिवपार्वतीसंवादे)
पुरा कश्यपकण्वाद्याः शिवतीर्थाटनोत्सुकाः ।
श्रीमद्वृद्धाचलं प्रापुर्दर्शनादेव मोक्षदम् ॥ ७॥
मणिमुक्तानदीं दृष्ट्वा कश्यपाद्या मुनीश्वराः ।
तत्तीरे बिल्ववृक्षांश्च ददृशुर्नवपल्लवान् ॥ ८॥
तत्र शैववरांश्चान्यानपश्यञ्छिवपूजकान् ।
भस्मोद्धूलितसर्वाङ्गान् त्रिपुण्ड्राङ्कितमस्तकान् ॥ ९॥
रुद्राक्षमालाभरणाञ्जटामण्डलमण्डितान् ।
शङ्करेति महेशेति शिवनामजपोत्सुकान् ॥ १०॥
नित्यमव्यभिचारेण मल्लिङ्गाकार्चनप्रियान् ।
अद्वैतं परमं ब्रह्म शिव एवेति वादिनः ॥ ११॥
श्रीमद्रुद्रजपासक्तान्पञ्चाक्षरपरायणान् ।
मणिमुक्तानदीं प्रापुस्ततस्ते मुनिपुङ्गवाः ॥ १२॥
तत्र ते चक्रिरे स्नानं मणिमुक्तानदीजले ।
उद्धूल्य भस्मनाङ्गानि ततस्ते मुनिपुङ्गवाः ॥ १३॥
त्रिपुण्ड्रधारणं चक्रुस्ततस्ते कश्यपादयः ।
अथ सम्पूजयामासुः शिवं मां लिङ्गरूपिणम् ॥ १४॥
ततः सर्वैर्मुनिवरैर्जप्तं पञ्चाक्षरं शिवे ।
ततस्ते बिल्वपत्राणि मणिमुक्ताजलानि च ॥ १५॥
गृहीत्वा मौनमासाद्य जग्मुर्वृद्धाचलेश्वरम् ।
ततो दृष्ट्वा मुनीन्द्रास्ते श्रीमद्वृद्धाचलेश्वरम् ॥ १६॥
सन्तोषं परमं जग्मुरान्दभरिता भृशम् ।
ततः सम्पूजयामासुः श्रीमद्दृद्धाचलेश्वरम् ॥ १७॥
रुद्रसूक्तैर्लिङ्गरूपमभिषित्र्य यथाक्रमम् ।
प्रदक्षिणनमस्कारांस्ततश्चक्रुर्मुनीश्वराः ॥ १८॥
ततः स्तुत्वातिभक्त्या ते शिवनामजपोत्सुकाः ।
पञ्चाक्षरजपं कृत्वा श्रौतन्यासपुरःसरम् ॥ १९॥
श्रीमद्रुद्रजपं कृत्वा तत्र तस्थुरचञ्चलाः ।
तदानीमागतो देवि गौतमोऽप्यरुणाचलात् ॥ २०॥
अगस्त्यः पूजयामास श्रीमद्वृद्धाचलेश्वरम् ।
ततस्तुष्टावं शुद्धात्मा गौतमो मामुमापतिम् ॥ २१॥
शैववर्येषु शृण्वत्सु श्रोत्रानन्दकरं शिवे ।
॥ इति शिवरहस्यान्तर्गते शिवप्रोक्तं वृद्धाचलेश्वरक्षेत्रे शिवोपासकान् वर्णनं सम्पूर्णम् ॥
- ॥ श्रीशिवरहस्यम् । उग्राख्यः सप्तमांशः । अध्यायः २३। ७-२१.१॥
- .. shrIshivarahasyam . ugrAkhyaH saptamAMshaH . adhyAyaH 23 . 7-21.1..
Notes:
Śiva शिव continues to tell Pārvatī पार्वती about the Vṛddhācālakṣetra वृद्धाचलक्षेत्र and the River MaṇiMuktā मणिमुक्ता where several Munī-s मुनि and Ṛṣi-sऋषि including Kaśyapā कश्यप, Kaṇva कण्व, Agastya अगस्त्य and Gautama गौतम visited and performed worship of Vṛddhācaleshvara Śivaliṅga वृद्धाचलेश्वर शिवलिङ्ग in several ways including - observing Silence, proclaiming Śiva शिव as Advaita Paramabrahama अद्वैत परमब्रह्म, offering Bilvapatra बिल्वपत्र, ŚrīmadRudraJapa श्रीमद्रुद्रजप, reciting Rudrasūktam रुद्रसूक्तम् and Pañcākṣarī mantra पञ्चाक्षरी मन्त्र - while being adorned with Bhasma भस्म, Rudrākṣa रुद्राक्ष and Tripuṇḍra त्रिपुण्ड्र.
Proofread by Ruma Dewan