वेतालभैरवाभ्यां कृतं शिवस्तोत्रम्
वेतालभैरवावूचतुः
पञ्चवक्त्रं महाकाव्यं सर्वज्ञानमयं परम् ।
संसारसागरत्राणं प्रणमावो वृषध्वजम् ॥ १७९॥
त्वं परः परमात्मा च परेशः पुरुषोत्तमः ।
त्वं कूटस्थो जगद्व्यापी प्रधानः परमेश्वरः ॥ १८०॥
रूपात्मा त्वं महातत्त्वं तत्त्वज्ञानालयः प्रभुः ।
साङ्ख्ययोगालयः शुद्धो गुणत्रयविभागवित् ॥ १८१॥
त्वं नित्यस्त्वमनित्यश्च जगत्कर्ता लयः स्मृतः ।
एकोऽनेकस्वरूपश्च शान्तचेष्टो जगन्मयः ॥ १८२॥
निर्विकारो निराधारो नित्यानन्दः सनातनः ।
त्वं विष्णुस्त्वं महेन्द्रस्त्वं ब्रह्मा त्वं जगतां पतिः ॥ १८३॥
यो रूपरूपेश्वररत्नमालः सम्भूतिभूतो निरवग्रहश्च ।
काक्ष्यावतीर्णावगतप्रमाथी योगेश्वरो ज्ञानगतिस्त्वगम्यः ॥ १८४॥
प्रमेयरूपात्मधराधराभो भोगीन्द्रबद्धामृतभोगतन्त्रः ।
सूक्ष्माक्षरस्तत्त्वविदप्रमाथी त्वं देवदेवः शरणं सुराणाम् ॥ १८५॥
विकल्पमानापरिहीनदेहः शुद्धान्तधामानुगतैकविद्यः ।
वर्धिष्णुरुग्रः पुरुषः परात्मा त्वमिन्द्रियौघस्य विचारबुद्धिः ॥ १८६॥
त्वं नाथनाथ प्रभवः परेषां गतिर्मुनीनां परयोगिगम्यः ।
त्वं भूधरो भागधरो ह्यनन्तो विश्वात्मनस्ते बहवः प्रपञ्चाः ॥ १८७॥
ज्ञानामृतस्यन्दकपूर्णचन्द्रो मोहान्धकारस्य परः प्रदीपः ।
भक्तात्मजानां परमः पिता त्वं कामे च पञ्चाननरूपधारी ॥ १८८॥
शास्त्राखिलानां प्रथमो विवस्वांस्तनूनपात् त्वं तनुषे गुणौघान् ।
त्वं ब्रह्मरूपेण करोषि सृष्टिं विष्णुस्वरूपैः सततं स्थितिं च ॥ १८९॥
त्वं रुद्ररूपी कुरुषे तथान्तं त्वत्तो न चान्यज्जगतीह वस्तु ।
त्वं रात्रिनाथो दिवसेश्वरश्च त्वमग्निरापः पवनो धरित्री ॥ १९०॥
नभस्तथा त्वं क्रतुतन्त्रहोता त्वमष्टमूर्तिर्भवतो न चान्यत् ।
अनन्तमूर्तिस्त्विह मुख्यभावान्निगद्यते चाष्टमयी त्रिमूर्तिः ॥ १९१॥
अनन्तमूर्ते कथमन्यथा ते सङ्ख्यास्ति रूपस्य यदष्टमूर्तिः ।
त्वं त्र्यम्बकस्त्वं त्रिपुरान्तकश्च त्वंशम्भुरीशः शमनो विधाता ॥ १९२॥
सहस्रबाहुश्च हिरण्यबाहुः सहस्रमूर्तिस्त्विह पञ्चवक्त्रः ।
प्रभूतनेत्रस्तु षडर्द्धनेत्रः प्रभूतबाहुर्दशबाहुरीशः ॥ १९३॥
प्रभूतभोगी मितभोगयुक्तो भोग्यानुसारो निरवग्रहश्च ॥ १९४॥
नित्यानित्यस्वरूपाय नित्यधामस्वरूपिणे ।
परतत्त्वस्वरूपाय नमस्तुभ्यं शिवात्मने ॥ १९५॥
नान्तं लिङ्गस्य यस्याप्तं विष्णुना ब्रह्मणा तव ।
तस्यावां किं विधास्यावः स्तुतिवाक्यं वृषध्वज ॥ १९६॥
स्वरूपं यस्य जानन्ति न देवा नापि दानवाः ।
आलावावां कथन्तु त्वां स्तोष्यावः परमेश्वरः ॥ १९७॥
भक्तिमात्रेण देवेश तवावां वृषभध्वज ।
कुर्वः प्रणामं गौरीश भूयस्तुभ्यं नमो नमः ॥ १९८॥
इति कालिकापुराणे एकपञ्चाशत्तमाध्यायान्तर्गतं वेतालभैरवाभ्यां
कृतं शिवस्तोत्रं सम्पूर्णम् ।
Proofread by PSA Easwaran