देवीकृता शिवस्तुतिः
देवी -
हर हर परिपाहि दीनबन्धो पुरहर देव दयानिधान धीर ।
मुरहरपरिपूजिताङ्घ्रिपद्म प्रकटसुधाकरशेखरोरुवीर ॥ ४२॥
करिवरखरचर्मवस्त्र शम्भो ह्युरगवरोत्तमहार मारमार ।
परिपाहि दयानिधान भर्ग त्रिनयन कालकलाविहीनदेह ॥ ४३॥
श्रुतिवरतुरगोत्तमाद्य शम्भो गरगलनील तमालपुष्पमौले ।
भवभयहर कारणातिगान्तकारे हरिगिरिशरकार्मुकाक्तपाणे ॥ ४४॥
परिपाहि विभो त्रिशूलपाणे नरहरिकृत्तिवसान बालपाल ।
विधिकन्धरहंसशोभिहस्त (विधिकन्धरहन्तृहस्त शम्भो)
पद्मानलनयनाग्निविदग्धकामदेह ॥ ४५॥
इमं दवरसामजप्रकटस्तोत्रकुम्भादरं
सनन्दनसनातनैः कलितवन्दनं शङ्करम् ।
अनिन्दितगुणोत्तमं सुमनिवृन्दवृन्दारकैः
पिचण्डिलसुतुन्दिलैर्गणवरौघनृत्तादरम् ॥ ४६॥
- -
स्कन्दः -
इति संस्तुवते देवी देवीशं परमेश्वरम् ।
रुद्राणीगणसंवीता योगिनीगणसेविता ॥ ४७॥
महाकैलासमध्यस्था दिव्यदेवाङ्कसंश्रया ।
सापि देवं जगन्माता पूजयत्यनिशं शिवा ॥ ४८॥
देवदेवं महादेवं गोवृषोत्तमगामिनम् ।
वतंसितसुधाधामशेखरं श्रुतिसंस्तुतम् ॥ ४९॥
जटाकलापनिटिलानलनेत्रं महेश्वरम् ।
नीलकण्ठं विरूपाक्षं सोमसूर्यानलाक्षिकम् ॥ ५०॥
कुरङ्गरञ्जितकरं कालकालं कृपानिधिम् ।
भस्माभ्यक्तं त्रिपुण्ड्राङ्कं रुद्राक्षवरहारकम् ॥ ५१॥
महोरगफणारत्नमालाकीलितकन्धरम् ।
उद्यदिन्दुकरप्रख्यकर्पूराभकलेवरम् ॥ ५२॥
दिव्यसिह्मासनासीनं महाकैलाससौधगम् ।
गणस्कन्दमहानन्दिभृङ्गिचण्डीशसेवितं ॥ ५३॥
मुकुटोद्दामगङ्गोत्थरयशोभितमस्तकम् ।
अब्जमित्राग्निनयनं सोमखण्डोज्वलालकम् ॥ ५४॥
उत्फुल्लपुण्डरीकाच्छमालाललितकन्धरम् ।
देवं नन्दनमन्दारवरमालाविभूषितम् ॥ ५५॥
खपटं परितो दग्धत्रिपुरासुरगोपुरम् ।
अन्धकान्तकमाशास्यं स्वभक्तजनवत्सलम् ॥ ५६॥
नमिताशेषदेवादिमुकुटोज्वलपादुकम् ।
वामदेवं महासामस्तोमस्तुतमतीन्द्रियम् ॥ ५७॥
रथन्तररवप्रीतं राजद्राजनतोषितम् ।
महावैराजराजश्रीराजराजकलाधरम् ॥ ५८॥
सर्वोपनिषदां सारमेकीभूतमिवेश्वरम् ।
ध्यायन्ती सा महादेवी स्वमनःपद्मसद्मगम् ॥ ५९॥
तध्यानसारभाराभिः प्लाविताननपङ्कजा ।
नान्यत्साचिन्तयदेवी जगज्जन्मादिसंस्थितिम् ॥ ६०॥
इत्थं ध्यायन्ती चन्द्रशेखरपदं चोत्फुल्लहृत्पद्मगं
देवी नन्दननन्दनेऽपि गिरिजा सापारवश्यान्तरा ।
नान्यत्किञ्चन विद्यते (नान्यत्किञ्चिदमन्यत) त्रिभुवने
निस्सारमेतज्जगत्तुच्छीकृत्य महाच्छमानसपरा स्वात्मानमीशं हृदि ॥ ६१॥
॥ इति शिवरहस्यान्तर्गते माहेश्वराख्ये देवीकृता शिवस्तुतिः ॥
- ॥ श्रीशिवरहस्यम् । माहेश्वराख्यः प्रथमांशः । अध्यायः २७ - कैलासवर्णने देवीपूजास्तुतिकथनम् । ४२-६१॥
- .. shrIshivarahasyam . mAheshvarAkhyaH prathamAMshaH . adhyAyaH 27 - kailAsavarNane devIpUjAstutikathanam . 42-61..
Notes:
Skanda स्कन्द narrates the eulogy to Śiva शिव recited by Devī देवी at Her grand residence at Mount Kailāsa कैलास शैल, and goes on to describe Śiva’s Presence there - that itself is like a eulogy to Śiva शिव.
Encoded and proofread by Ruma Dewan