शिवस्तुतिः देवैः कृता
(सौरपुराणे ६१-अध्यायान्तर्गतं)
देवा ऊचुः-
ॐ नमः परमेशाय त्रिनेत्राय त्रिशूलिने ।
विरूपाय सुरूपाय पञ्चास्याय त्रिमूर्तये ॥ ३३॥
वरदाय वरार्हाय कूर्माय च मृगाय च ।
नीलालकशिखण्डाय मण्डलेशाय ते नमः ॥ ३४॥
विश्वमानाय विश्वाय विश्वेशायाऽऽत्मरूपिणे ।
कालघ्नाय मखघ्नाय अन्धकघ्नाय वै नमः ॥ ३५॥
नमो मन्त्राय जप्याय कोटिजाप्याय ते नमः ।
ध्यानाय ध्येयरूपाय ध्येयध्यानात्मने नमः ॥ ३६॥
ईशोऽनीशस्त्वमेवेश अन्तोऽनन्तस्त्वमेव च ।
अव्ययस्त्वं व्ययश्चैव जन्माजन्म त्वमेव च ॥ ३७॥
नित्यानित्यस्त्वमेवेश धर्माधर्मस्त्वमेव च ।
गुरुस्त्वमगुरुर्देव वीजं वाऽबीजमेव च ॥ ३८॥
कालस्त्वमसि लोकानामकालः परिगीयसे ।
बलस्त्वमबलश्चैव प्राणश्चाप्राण एव च ॥ ३९॥
साक्षी त्वं कर्मणां देव तथाऽसाक्षी महेश्वर ।
शास्ताऽशास्ता विरूपाक्ष ध्रुवश्चाध्रुव एव च ॥ ४०॥
संसारी त्वं हि जन्तूनामसंसारी त्वमेव च ।
गोप्ता त्वं सर्वभूतानां नास्ति गोप्ता तवेश्वरः ॥ ४१॥
जीवस्त्वं जीवलोकस्य जीवस्तेऽन्यो न विद्यते ।
न्यूनातिरिक्तभावेन त्वमायुश्च शरीरिणाम् ॥ ४२॥
देहिनां शङ्करस्त्वं हि न चान्यस्तव शङ्कर ।
अरुद्रस्त्वं महादेव रुद्रस्त्वं घोरकर्मणाम् ॥ ४३॥
देवानां च महादेवो महांस्त्वत्तो न विद्यते ।
कामस्त्वं भविनां सर्वकामदस्त्वं जगत्पते ॥ ४४॥
अजेयो जयिनां श्रेष्ठो जयरूपस्त्वमेव हि ।
पुराणपुरुषस्त्वं हि पुराणोऽन्यो न विद्यते ॥ ४५॥
व्यालयज्ञोपवीताय सरोजाङ्काय ते नमः ।
नमोऽस्तु नीलग्रीवाय शितिकण्ठाय मीढुषे ॥ ४६॥
नमः कपालहस्ताय पाशहस्ताय दण्डिने ।
नमो देवाधिदेवाय नमो नारायणाय च ॥ ४७॥
ऊर्ध्वमार्गप्रणेत्रे च नमस्ते ह्यूर्ध्वरेतसे ।
क्रोधिने वीतरागाय गजचर्मावगुण्ठिने ॥ ४८॥
नमो ब्रह्मशिरोघ्नाय नमस्ते रुक्मरेतसे ।
नमश्चण्डाय धीराय कमण्डलुनिषङ्गिणे ॥ ४९॥
नमः प्रचण्डवेगाय क्रोधचण्डाय ते नमः ।
वरेण्याय शरण्याय ब्रह्मण्यायाम्बिकापते ॥ ५०॥
सर्वानुग्रहकर्ता त्वं धनदाय नमो नमः ।
नमः संसारपोताय आणिमादिप्रदायिने ॥ ५१॥
ज्येष्ठसामादिसंस्थाय। रथन्तराय ते नमः ।
त्रिगाथाय त्रिमात्राय त्रिमूर्ते त्रिगुणात्मने ॥ ५२॥
त्रिवेदिने त्रिसन्ध्याय त्रिशून्याय त्रिवर्मणे ॥
त्रिदेहाय त्रिकालाय त्रिशक्तिव्यापिने नमः ॥ ५३
शक्तित्रयविहीनाय शक्तित्रययुताय च ।
शक्तित्रयात्मरूपाय शक्तित्रयधराय च ॥ ५४॥
योगीशाय विषघ्नाय विजयाय नमो नमः ।
नमस्ते हरिकेशाय लोकपालाय दण्डिने ॥ ५५॥
हलीशाय प्रमेयाय कुलीशाय तु चक्रिणे ।
नमो बिन्दुविसर्गाय नादायानादधारिणे ॥ ५६।
नाडीस्थाय च नाड्याय नाडीवाहाय वै नमः ।
नमो गायत्रीनाथाय गायत्रीहृदयाय ते ॥ ५७॥
नमो गायत्रीगोप्त्रे च गायत्र्याय नमो नमः ॥
य इदं पठते स्तोत्रं गीर्वाणैः समुदीरितम् ॥ ५८
यावज्जीवकृतैः पापैर्मुक्तो याति परां गतिम् ।
एवं स्तुतः सुरैः शम्भुः प्रसन्नो वरदोऽभवत् ॥ ५९॥
इति सौरपुराणे एकषष्ठितमोऽध्यायान्तर्गता देवैः कृता
शिवस्तुतिः समाप्ता ।
Encoded and proofread by PSA Easwaran